ޒުވާން ޚަޠީބުން ތަމްރީނުކުރުމުގެ ޕްރޮގްރާމުގެ ފަސް ވަނަ ބުރު ފުރިހަމަކުރި 91 ބައިވެރިއަކަށް ސަނަދު ހަވާލުކުރުމުގެ ރަސްމިއްޔާތު ބާއްވައިފިއެވެ.
އިސްލާމީ މަރުކަޒުގައި މިއަދު ބޭއްވި މި ރަސްމިއްޔާތުގައި ބައިވެރިންނާ ސަނަދު ހަވާލުކޮށްދެއްވީ އިސްލާމީ ކަންތައްތަކާ ބެހޭ ވަޒީރު ޝަހީމެވެ.
އިސްލާމީ ކަންތައްތަކާ ބެހޭ ވުޒާރާއިން ހިންގާ މި ޕްރޮގްރާމް ޚާއްޞަކޮށް އަމާޒުކޮށްފައި ވަނީ ގްރޭޑް 10 11 އަދި 12 ގައި ތަޢުލީމް ޙާސިލްކުރާ ދަރިވަރުންނާއި ސްކޫލް ނިންމާފައިވާ ޒުވާނުންނަށް ހުކުރުކުރުމުގެ ހުއްދަ ދިނުމަށެވެ.
ޕްރޮގްރާމުގެ ތެރެއިން ބައިވެރިންނަށް ޚުޠުބާ ކިޔުމާއި އިމާމުވެ ނަމާދުކުރުމުގެ އިތުރުން ދީނާ ގުޅުން ހުރި އެހެން ބައެއް ދާއިރާތަކުން ޚާއްޞަ ތަމްރީނު ދެވޭ ކަމަށް އިސްލާމީ ކަންތައްތަކާ ބެހޭ ވުޒާރާއިން ބުނެފައިވެއެވެ. މި ޕްރޮގްރާމުގެ ސަބަބުން ޚަޠީބުން މަދު ރަށްރަށުގެ ކައުންސިލްތަކަށް ވެސް ބޮޑު ލުއިފަސޭހައެއް ލިބިފައިވާ ކަމަށް އެ ވުޒާރާއިން ފާހަގަކޮށްފައިވެއެވެ.
ޒުވާން ޚަޠީބުން ތަމްރީނުކުރުމުގެ ޕްރޮގްރާމަކީ އިސްލާމީ ކަންތައްތަކާ ބެހޭ ވުޒާރާއިން ސިލްސިލާ ގޮތެއްގައި ކުރިއަށް ގެންދާ ޕްރޮގްރާމެކެވެ.
Advertisement
This content is created and paid for by advertisers and does not involve Voice Journalists
