ބައިނަލްއަޤުވާމީ ތެލުގެ ބާޒާރުގައި ތެލުގެ އަގު ބޮޑުވަމުންދާ މި ދަނޑިވަޅެއްގައި ޕާކިސްތާނުގެ ތެލާއި ގޭހާ ބެހޭ ރެގިއުލޭޓަރީ އޮތޯރިޓީ (އޯޖީއާރުއޭ) އިން ޕެޓްރޯލާއި ޑީސެލްގެ އަގު ބޮޑުކޮށްފައިވާ ކަމަށް އެ އިދާރާއިން ހާމަކޮށްފިއެވެ.

އޯޖީއާރުއޭ އިން އާއްމުކުރި އާ އަގުތަކަށް ބަލާއިރު ޕެޓްރޯލް ލީޓަރަކުން ވަނީ 39 ޕައިސާ ބޮޑުކޮށްފައެވެ. އެގޮތުން މިހާރު ޕެޓްރޯލް ލީޓަރެއް ވިއްކާ އަގަކީ 341.98 ރުޕީސްއެވެ. ޕާކިސްތާނުގައި މިހާރު އެންމެ ބޮޑީ ޑީސަލްގެ އަގެވެ. އެގޮތުން އަލަށް ބޮޑުކުރި މިންވަރުން މިހާރު ޑީސަލް ލީޓަރެއްގެ އަގަކީ 370.69 ރުފީސްއެވެ. 

ދުނިޔޭގެ ސާފުނުކުރާ ތެލުގެ ބާޒާރަށް ބަލާ އިރު ހޯމަ ދުވަހު އޭޝިއާގެ ވިޔަފާރީގެ ވަގުތުތަކުގައި ދެ ބެންޗްމާކުގެ އަގު ދަށަށް ދިޔައެވެ. ޑަބްލިއުޓީއައި ސާފުނުކުރާ ތެޔޮ 2.16 އިންސައްތަ ދަށްވެ ފީފާއެއް 85.18 ޑޮލަރަށް ވެއްޓުނު އިރު ބްރެންޓް ސާފުނުކުރާ ތެޔޮ 2.19 އިންސައްތަ ދަށްވެ ފީފާއެއްގެ އަގު ވަނީ 92.32 ޑޮލަރަށް ތިރިވެފައިވެއެވެ. ނަމަވެސް ފާއިތުވި ހަފުތާގައި ދެ ބެންޗްމާކް ފަހެއް އިންސައްތައަށް ވުރެ ބޮޑު ތަނުން އުފުލިފައިވެއެވެ. އަގުތައް އުފުލުމުގެ ފަހަތުގައި ވަނީ އީރާނުގެ ތެޔޮ ބޭރުކުރުމާ މެދު ބޮޑުވެފައިވާ ކަންބޮޑުވުންތަކާއި އެމެރިކާއާއި އީރާނާ ދެމެދު ނުތަނަވަސްކަން އިތުރުވުމާއި ހޮރްމޫޒް ކަނޑުއޮޅި ހުރަސްކޮށް ދަތުރުކުރާ ތެޔޮ ޓޭންކަރުތައް ބޮޑު ތަނުން މަދުވެގެން ދިއުމެވެ.

އީރާނާ ދެކޮޅަށް އެމެރިކާ އިން އެޅުމަށް ތައްޔާރުވަމުންދާ ދަތިކުރުމުގެ އައު ފިޔަވަޅުތަކާއެކު ތެލުގެ އަގުތައް އިތުރަށް އުފުލިގެންދާނޭކަމަށް ވަނީ ބެލެވިފައެވެ.