ދައުލަތުން ގެއްލިފައިވާ މުދަލާއި ފައިސާ އަނބުރާ ހޯދުމަށް މީގެކުރިން ކުރެވުނު މަސައްކަތްތަކުގައި އިޚްލާޞްތެރިކަމެއް ނެތް ކަމަށާއި، އެއީ ސިޔާސީ މަޤްޞަދެއްގައި ވަކި ބަޔަކު މައިތިރިކުރުމަށް ކުރި ކަންކަން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ނޭޝަން ޗެޓް ޕްރޮގްރާމްގައި ވާހަކަދައްލަވަމުން ރައީސް ވިދާޅުވީ، ދައުލަތުން ގެއްލިފައި ހުރި މުދަލާއި ފައިސާ ހޯދުމުގެ ނަމުގައި ވޭތުވެދިޔަ ސަރުކާރުތަކުން މަސައްކަތް ކޮށްފައި ހުރި ނަމަވެސް އެކަންކަން ސިފަވަނީ ސިޔާސީ ގޮތުން ވަކި ފަރާތްތަކެއްގެ ފަހަތުން ދިއުމަށް ކުރި ކަންކަމުގެ ގޮތުގައި ކަމަށެވެ. އަދި އެ މަސައްކަތްތަކުގައި އިޚްލާޞްތެރި ނިޔަތެއް ނެތުމުގެ ސަބަބުން އެދެވޭ ނަތީޖާއެއް ނުފެނުނު ކަމަށްވެސް އެމަނިކުފާނު ފާހަގަކުރެއްވިއެވެ.
ރައީސް މުޢިއްޒު ވިދާޅުވީ، މި ސަރުކާރުން މަސައްކަތް ކުރަމުންދަނީ ނިޒާމީ ގޮތެއްގައި މިކަން ހަރުދަނާކުރުމަށް ކަމަށެވެ. އެގޮތުން، މިހާރު ޢަމަލުކުރަމުންދާ ޤާނޫނުތަކުން ލިބޭ ބާރުތަކަށްވުރެ ފުޅާ ދާއިރާއެއްގައި މިކަން ކުރުމަށްޓަކައި "އެސެޓް ރިކަވަރީ" އާ ބެހޭ ޚާއްޞަ ބިލަކާއި، ޖިނާއީ އިޖުރާއަތުގެ ޤާނޫނަށް ގެންނަންޖެހޭ އިޞްލާޙުތައް މިހާރު ރައްޔިތުންގެ މަޖިލީހަށް ފޮނުވާފައިވާ ކަމަށް އެމަނިކުފާނު ވިދާޅުވިއެވެ.
ރައްޔިތުންގެ ފައިސާ ނުގަވާއިދުން ބޭނުންކޮށްގެން މުދާ މި ހޯދަނީ. މިސާލަކަށް އެ ހޯދާ މުދާ އަނބުރާ ނެގޭނެ ގޮތެއް ވާންޖެހޭނެ. އެހެންވީމަ އެކަން ކުރުމަށްޓަކައި ގެންނަންވާ ގާނޫނީ ނިޒާމު ގެންނަން މަސައްކަތް ކުރަނީ. ދެން އޮންނާނީ ތަންފީޒުކުރުން
ރައީސް ޑރ.މުއިއްޒު
މީގެ އިތުރުން، ދައުލަތުގެ ނިޒާމުގެ ތެރެއިން ކޮރަޕްޝަން ވީހާވެސް ބޮޑަކަށް ކުޑަކުރުމަކީ މި ސަރުކާރުގެ މުހިންމު އަމާޒެއް ކަމަށާއި، ނުޙައްޤުން ހޯދާ މުދަލާއި ރައްޔިތުންގެ ފައިސާ އަނބުރާ ދައުލަތަށް ނެގޭނެ ވަރުގަދަ ޤާނޫނީ ނިޒާމެއް ޤާއިމުކުރަންޖެހޭ ކަމަށް ރައީސް ވިދާޅުވިއެވެ. އަދި ޤާނޫނުތައް އެކުލަވާލުމުގެ އިތުރުން، އެކަންކަން ތަންފީޒުކުރާ އިދާރާތައްވެސް ކުރިއަށްވުރެ ބޮޑަށް ހަރުދަނާކޮށް ވަރުގަދަކުރައްވާނެ ކަމުގެ ޔަޤީންކަން އެމަނިކުފާނު ދެއްވިއެވެ.
ދައުލަތުން ގެއްލުނު ފައިސާ އާއި މުދާ ހޯދުމަށް މިދިޔަ ސަރުކާރުތަކުން މަސައްކަތްކުރީ ހެޔޮނިޔަތެއްގައި ނޫންކަމަށް ރައީސް ވިދާޅުވިއިރު، ކުރީގެ ރައީސް އިބްރާހިމް މުޙައްމަދު ޞާލިޙުގެ ވެރިކަމުގައި ފުރަތަމަ 100 ދުވަހުގެ ވަޢުދުތަކުގެ ތެރޭގައި ހިމަނައިގެން ދައުލަތުގެ މުދަލާއި ފައިސާ ހޯދުމަށް "އެސެޓް ރިކަވަރީ ކޮމިޝަން" ގެ ނަމުގައި ރިޔާސީ ކޮމިޝަނެއް އުފެއްދެވިއެވެ. ނަމަވެސް އެކަށީގެންވާ ގޮތެއްގައި މަސައްކަތްތައް ކުރިއަށް ނުގެންދެވި، ފަހުން އެ ކޮމިޝަން ވަނީ އުވާލާފައެވެ.
އެ ކޮމިޝަން އުވާލަމުން އޭރު ރައީސުލްޖުމްހޫރިއްޔާގެ އޮފީހުން ނެރުނު ބަޔާނުގައި ބުނެފައިވަނީ، ކޮމިޝަނުން ބެލުމަށް ހަމަޖެހުނު ދައުލަތުގެ މުދަލާއި ފައިސާ ނަހަމަގޮތުގައި ބޭނުންކުރުމުގެ ގިނަ މައްސަލަތައް، ދިމާވި އެކިއެކި ސަބަބުތަކާހެދި ކުރިއަށް ނުގެންދެވި، އެކަށީގެންވާ މިންވަރަށް ތަޙުޤީޤު ކުރެވި އިންސާފު ޤާއިމުކުރެވިފައި ނުވާތީ ކޮމިޝަން އުވާލީ ކަމަށެވެ.
މީގެ އިތުރުން ރައީސް ޢަބްދުﷲ ޔާމީންގެ ވެރިކަމުގައިވެސް ވަނީ އެސެޓް ރިކަވަރީ ކޮމިޝަނެއް އުފައްދާފައެވެ. ނަމަވެސް އެ ކޮމިޝަނުންވެސް އެދެވޭފަދަ ނަތީޖާތަކެއް ހާސިލްވެފައެއް ނުވެއެވެ.
Advertisement
This content is created and paid for by advertisers and does not involve Voice Journalists
