ކަރަބާއޯކަޕް ދެވަނަ ބުރުގައި ސްޕާސް އާއި ޗާލްޓަން ބައްދަލުކުރިމެޗް ސްޕާސް ކާމިޔާބުކޮށްފިއެވެ.
މިމެޗް ޗާލްޓަންގެ މައްޗަށް އެޓީމުން ކުރި ހޯދީ 5-1 ގެ ނަތީޖާއަކުންނެވެ. މިމެޗްގައި މެންޗެސްޓާ ސިޓީން 75 މިލިއަން ޕައުންޑަށް ގެނައި ބްރެޒިލްގެ ވިންގާ ސާވިއޯ ވަނީ ބަދަލު ކުޅުންތެރިއެއްގެ ގޮތުގައި ކުޅެން ނިކުމެ ލަނޑު ޖަހާފައެވެ.
މެޗްގައި ސްޕާސްއަށް ގޯލް ހުޅުވާލަދިނީ 41 ވަނަ މިނެޓް ތެރޭގައި މައިކީ މޫ ބޮކްސް އެވެ. ފުރަތަަމަ ހާފް ނިމުމުގެ ކުރިން ސޮލަންކޭ ވަނީ އިތުރު ލަނޑެއް ޖަހައި ލީޑް ފުޅާކޮށްދީފައެވެ. މެޗްގެ ފުރަތަމަ ހާފް ނިމުނީ 2-0 ކުން ސްޕާސް ކުރީގައި އޮވެގެންނެވެ.
މެޗްގައި ފެނިގެންދިޔަ ސްޕާސްގެ ތިންވަނަ ލަނޑު ޖަހައިދިނީ 82 ވަނަ މިނެޓް ތެރޭގައި ޑެންސޯއެވެ. ހަތަރުވަނަ ލަނޑު ސާވިއޯ ކާމިޔާބުކޮށްދިން އިރު ފަހު ލަނޑު ޖަހައިދިނީ ޑޭވީސްއެވެ. މިމެޗްގައި ޗާލްޓަންއަށް ސުންކަނޑުވާލަދިނީ ޖޯންސްއެވެ.
ކަރަބާއޯ ކަޕްގެ މި މެޗަށްފަހު މިފަހަރުގެ ސީޒަނަށް 300 މިލިއަން ޕައުންޑަށް ވުރެ ބޮޑު ހޭދައެއް ކޮށްފައިވާ ޓޮޓެންހަމް ދެން ކުޅޭނީ އަންނަ ހޮނިހިރު ދުވަހު ނިއުކާސަލް ޔުނައިޓެޑާ ދެކޮޅަށެވެ. އެ މެޗުގެ ކުރިން މެންޗެސްޓާ ސިޓީގެ ފޯވާޑް ޢުމަރު މަރުމޫޝް ލޯނު އެއްބަސްވުމެއްގެ ދަށުން ގެނައުމުގެ މަސައްކަތް ނިންމައިލެވޭނެ ކަމަށް އުއްމީދުކުރާކަމަށް ސްޕާސްއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
