ކުޑަކުދިންނާއި ފުރާވަރު ޢުމުރުގެ ކުދިން ރައްކާތެރިކުރުމުގައި އިހުމާލުވެފައިވާ ކަމަށް ބުނެ ބްރެޒިލް ސަރުކާރުން ޗެޓް ޕްލެޓްފޯމް ޑިސްކޯޑު އަތުން 97 މިލިއަން ޑޮލަރުގެ ބަދަލު ހޯދުމަށް ދައުވާ ހުށަހަޅައިފިއެވެ.

ބުދަ ދުވަހު ހުށަހެޅި މި ދައުވާގައި ބްރެޒިލް ސަރުކާރުން ބުނީ ޑިސްކޯޑާ އެކު ކުރި މަޝްވަރާތައް ނާކާމިޔާބުވެފައިވާ ކަމަށެވެ.

ނަމަވެސް ޑިސްކޯޑުން ބުނީ މި ދައުވާއަކީ މާ ހަރުކަށި ފިޔަވަޅެއް ކަމަށާއި ބްރެޒިލްގެ ޤާނޫނުތަކާ އެ ކުންފުނިން ޢަމަލުކުރާ ގޮތް ދައުވާގައި ސީދާކޮށް ސިފަކޮށްފައި ނުވާ ކަމަށެވެ.

ޖުލައި މަހު ބްރެޒިލްގެ ހުޅަނގުގައި އޮންނަ މާޓޮ ގްރޮސޯ ޑޮ ސޫލް ސްޓޭޓުގައި ހިނގި ޙާދިސާއަކާ ގުޅިގެން ޑިސްކޯޑަށް ބޮޑެތި ފާޑުކިޔުންތައް އަމާޒުވިއެވެ. ބްރެޒިލްގެ ޖަސްޓިސް ވުޒާރާއިން ހާމަކުރި ގޮތުގައި ފުރާވަރުގެ ކުދިންތަކެއް އެ ކުދިންގެ އެކުވެރިއެއް މެރުމަށް ބާރު އެޅީއެވެ. އެކަން ނުވުމުން އެ ކުއްޖާ އަމިއްލައަށް ފުރާނަ ދުއްވައިލުމަށް ހިތްވަރު ދިނީއެވެ. މި މައްސަލައާ ގުޅިގެން ހަތަރު ފުރާވަރުގެ ކުއްޖަކާއި 18 އަހަރު ފުރިފައިވާ މީހެއް ހައްޔަރުކޮށްފައިވެއެވެ.

މި ޙާދިސާއާ ގުޅިގެން ބްރެޒިލްގެ ޑޭޓާ ޕްރޮޓެކްޝަން އެޖެންސީ (އޭއެންޕީޑީ) އިން އޮގަސްޓް 12 ގައި ޑިސްކޯޑުގެ ލައިވްސްޓްރީމް ޚިދުމަތް މެދުކަނޑައިލުމަށް އެންގިއެވެ. ބްރެޒިލްގެ ފަސްޓް ލޭޑީ ރޮސެންޖެލާ ލޫލާ ޑާ ސިލްވާ ވެސް އެ ސައިޓު އެއްކޮށް ބަންދުކުރުމަށް ގޮވައިލެއްވިއެވެ.

ދުވާލަކު ގާތްގަނޑަކަށް 90 މިލިއަން މީހުން ބޭނުންކުރާ ޑިސްކޯޑުން ބުނީ ސްޓްރީމިން ޚިދުމަތް ހުއްޓައިލައި "ފުރާވަރު ކުދިންނަށް ޑިސްކޯޑު ރައްކާތެރި ތަނަކަށް ހެދުމަށް" ފިޔަވަޅު އަޅާނެ ކަމަށެވެ. އެހެނަސް ބްރެޒިލް ސަރުކާރުން ބުނީ "ޢުމުރު ކަށަވަރުކުރުމާއި ބޭނުންކުރާ ފަރާތްތައް ރައްކާތެރިކުރުމުގެ ނިޒާމުގައި ކުންފުނީގެ އުނިކަންތައް ދެމިއެބަހުރި" ކަމަށެވެ.

ޑިސްކޯޑުގެ ދައުވާގެ އެއް ދުވަސް ކުރިން އޭއެންޕީޑީ އިން ވަނީ ކުޑަކުދިންގެ ޒާތީ މަޢުލޫމާތު ހިމާޔަތްނުކުރި ކަމަށް ބުނެ ޓިކްޓޮކް 30 މިލިއަން ޑޮލަރުން ޖޫރިމަނާކޮށްފައެވެ. މި ފިޔަވަޅުތަކުން ދައްކައިދެނީ ސޯޝަލް މީޑިއާ ކުންފުނިތަކާ މެދު ބްރެޒިލުން ގެންގުޅޭ ހަރުކަށި ސިޔާސަތު ކަމަށް އަލް ޖަޒީރާއިން ރިޕޯޓުކޮށްފައިވެއެވެ.