ސިންގަޕޫރުގެ އާބާދީ އިތުރުވާ ނިސްބަތް ރެކޯޑު މިންވަރަކަށް ދަށަށް ގޮސްފައިވާތީ، ދަރިން ހޯދުމަށް ހިތްވަރު ދިނުމުގެ ގޮތުން ކޮންމެ ކުއްޖަކަށް ގާތްގަނޑަކަށް 55،000 އެމެރިކާ ޑޮލަރު (70،000 ސިންގަޕޫރު ޑޮލަރު) ގެ މާލީ އެހީ ދިނުމަށް އެ ގައުމުގެ ސަރުކާރުން ނިންމައިފިއެވެ.

މިކަން ރަސްމީކޮށް އިއުލާނުކުރެއްވީ އެ ގައުމުގެ ބޮޑުވަޒީރު ލޯރެންސް ވޮންގް، ސިންގަޕޫރުގެ ގައުމީ ދުވަހުގެ ޖަލްސާގައެވެ. މި އެހީއަކީ ކުއްޖާ އުފަންވާ ދުވަހުން ފެށިގެން އުމުރުން 17 އަހަރު ވަންދެން އެކި މަރުހަލާތަކަށް ބަހާލައިގެން ދިނުމަށް ހަމަޖެހިފައިވާ އެހީއެކެވެ. މީގެ ތެރޭގައި ފައިސާގެ އިނާޔަތްތަކާއި، ސިއްހީ އަދި ތައުލީމީ ޚަރަދުތަކަށް ދޭ އެހީތައް ހިމެނެއެވެ.

އާ އޮނިގަނޑުގެ ދަށުން ތައާރަފުކުރާ "އެސްޖީ ޗައިލްޑް ސަޕޯޓް ޕެކޭޖް" އަށް އަމަލުކުރަން ފަށާނީ 1 އޭޕްރީލް 2027 ގައެވެ. މި ޕެކޭޖުގެ ދަށުން އަލަށް އުފަންވާ ކޮންމެ ކުއްޖެއްގެ ފުރަތަމަ އަހަރު 10،000 ސިންގަޕޫރު ޑޮލަރުގެ ނަގުދު ފައިސާ ދެ އިންސްޓޯލްމަންޓަކަށް ބަހާލައިގެން ދޭނެއެވެ. މީގެ އިތުރުން ކުއްޖާގެ ޗައިލްޑް ޑިވެލޮޕްމަންޓް އެކައުންޓަށް 5،000 ޑޮލަރު ޖަމާކޮށްދިނުމާއި، ބެލެނިވެރިން ޖަމާކުރާ އަދަދާ އެއްވަރުގެ 5،000 ޑޮލަރުގެ މެޗިންގ ގްރާންޓެއް ދިނުމާއި، ކުއްޖާގެ އުމުރުން 16 އަހަރު ވަންދެން ކޮންމެ އަހަރަކު 2،000 ޑޮލަރު އަދި އުމުރުން 17 އަހަރު ފުރުމުން މަތީ ތައުލީމަށް 10،000 ޑޮލަރު ސަރުކާރުން ހަމަޖައްސައިދޭނެއެވެ.

ސިންގަޕޫރު ސަރުކާރުން މިފަދަ ބޮޑު ނިންމުމެއް ނިންމީ އެ ގައުމުގައި ދަރިން ވިހާ މިންވަރު އިންތިހާއަށް ދަށަށް ދިއުމާ ގުޅިގެންނެވެ. ތަފާސްހިސާބުތައް ދައްކާ ގޮތުން 2024 ވަނަ އަހަރު ފާޓިލިޓީ ރޭޓް 0.97 ގައި ހުރިއިރު، 2025 ވަނަ އަހަރު އެ އަދަދު ވަނީ 0.87 އަށް ވެއްޓިފައެވެ. އަދި 2025 ވަނަ އަހަރު ވިހޭ ކުދިންގެ އަދަދު އޭގެ ކުރީ އަހަރާ އަޅާބަލާއިރު %11.4 ވަނީ ދަށްވެފައެވެ.

އާބާދީ ދަށަށް ދިއުމަކީ ކުރިއަށް އޮތް ތަނުގައި މަސައްކަތްކުރާ އުމުރުގެ މީހުން މަދުވެ، އިގުތިސާދަށާއި ސިއްހީ ޚިދުމަތްތަކަށް ބޮޑެތި ގޮންޖެހުންތަކެއް ކުރިމަތިވާނެ ކަމެކެވެ. އެހެންކަމުން ސިންގަޕޫރު ސަރުކާރުން މި މައްސަލަ ދެކެނީ ގައުމީ ފެންވަރުގެ ބޮޑު ނުރައްކަލެއްގެ ގޮތުގައެވެ.

ބޮޑުވަޒީރު ވޮންގް ފާހަގަކުރެއްވި ގޮތުގައި، ހަމައެކަނި ފައިސާ ދީގެން ދަރިން ހޯދުމަށް މަޖުބޫރު ނުކުރެވޭނެ ކަމަށާއި، މި އެހީގެ މައިގަނޑު މަގުސަދަކީ ދަރިން ހޯދަން ބޭނުންވާ ފަރާތްތަކަށް އޮތް މާލީ އަދި އިޖުތިމާއީ ބުރަ ލުއިކޮށްދިނުމެވެ. މިގޮތުން މާލީ އެހީގެ އިތުރުން ވަޒީފާ އަދާކުރާ ބެލެނިވެރިންނަށް ލިބޭ ޗުއްޓީ އިތުރުކުރުމާއި، ކުދިން ބެލެހެއްޓުމުގެ ނިޒާމު ހަރުދަނާ ކުރުމަށް ވެސް ސަރުކާރުން ވަނީ ނިންމާފައެވެ.