ބޮސްނިޔާ ހަނގުރާމައިގައި މުސްލިމުންނާ ދެކޮޅަށް ނަސްލު ނައްތައިލުމުގެ ޖަރީމާތައް ހިންގި ކަމުގެ ކުށް ސާބިތުވެ އުމުރު ދުވަހުގެ ޖަލު ހުކުމެއް ތަންފީޒުކުރަމުން ދިޔަ ރަޓްކޯ މްލަޑިޗް މަރުވެއްޖެއެވެ.

މުޅި ދުނިޔޭގެ އެތައް ބައެއްގެ ނަފްރަތު ލިބިފައިވާ އަދި ފަހުން އެކަނިވެރި ހަޔާތެއް ޖަލުގައި ހޭދަކުރި މުލަޑިޗް މަރުވީ އުމުރުން 84 އަހަރުގައި ނެދަލެންޑްސްގެ ދަ ހޭގްގައި ކުށްވެރިން ބަލަހައްޓާ ޖަލުގައެވެ. "ބޮސްނިޔާގެ ގަތުލުވެރިޔާ" ގެ ނަމުން މަޝްހޫރުވި މްލަޑިޗް ހުރީ 1990 ގެ އަހަރުތަކުގައި ކުރި ބޮސްނިޔާ ހަނގުރާމައިގައި ބޮސްނިޔަން ސާބް ލަޝްކަރުގެ އިސް ކޮމާންޑަރެއްގެ މަޤާމުގައެވެ. އޭނާގެ ބެލުމުގެ ދަށުން 1995 ވަނަ އަހަރު ސްރެބްރެނިކާގައި ކުށެއް ނެތް 7000 އަށް ވުރެ ގިނަ މުސްލިމު ފިރިހެނުންނާއި ކުޑަކުދިން ރަޙުމެއް ނެތި ޝަހީދުކޮށްލެވުނެވެ. ހަމައެހެންމެ ސަރަޖޭވޯ ވަށައިލައިގެން އެތައް އަހަރެއް ވާންދެން ދެވުނު ހަމަލާތަކުގައި 10000 އަށް ވުރެ ގިނަ ޢާންމު ރައްޔިތުން މަރައިލެވުނެވެ. މިއީ މުސްލިމުންގެ ނަސްލު ނައްތާލުމަށް ހިންގި ވަރުގަދަ ޖަރީމާއެއްކަމަށް ބައިނަލްއަޤްވާމީ އެކި ފަރާތްތަކުން ބުނެއެވެ.

މި ޖަރީމާތަކަށް ފަހު ގާތްގަނޑަކަށް 16 އަހަރު ފިލައިގެން އުޅުމަށް ފަހު 2011 ވަނަ އަހަރު ސާބިއާއިން މްލަޑިޗް ހައްޔަރުކުރެވުނެވެ. ދަ ހޭގްގެ ބައިނަލްއަޤުވާމީ ކޯޓުގައި ޝަރީޢަތް ހިންގައި ނަސްލު ނައްތައިލުމާއި ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޢަމަލުތައް ސާބިތުވެ 2017 ވަނަ އަހަރު ޢުމުރު ދުވަހުގެ ޖަލު ހުކުމް އިއްވުނެވެ.

ސިއްޙީ ހާލު ދެރަވެ ޖަލުން މިނިވަންކޮށްދިނުމަށް އެދި އޭނާގެ ޤާނޫނީ ވަކީލުން ތަކުރާރުކޮށް ކޯޓަށް ހުށަހެޅި ނަމަވެސް ކޯޓުން ވަނީ އެ ހުރިހާ ހުށަހެޅުމެއް ބޭރުކޮށްލާފައެވެ.

ސްރެބްރެނިކާ ގަތުލުޢާންމަކީ ދެވަނަ ބޮޑު ހަނގުރާމައަށް ފަހު ޔޫރަޕުގައި ހިންގުނު އެންމެ ބޮޑު ނަސްލު ނައްތައިލުމުގެ ޖަރީމާގެ ގޮތުގައި ބައިނަލްއަޤުވާމީ ކޯޓުތަކުން ކަނޑައަޅާފައިވާ ހާދިސާއެކެވެ. އަދި މިއީ ދުނިޔެދުށް އެންމެ ބޮޑެތި ޖަރީމާތަކުގެ ތެރޭގައި ހިމެނޭ އެއް ޖަރީމާއެވެ.