މާފަންނު ދިލްކުޝާ ގޯޅީގައި ހުންނަ ގެއެއްގެ ތެރޭގައި ގޭސް ލީކުވެ ހިނގި ހާދިސާގައި ޙާލު ދެރަވި ޒުވާނާގެ ހާލަތު ރަނގަޅުވަމުން އަންނަ ކަމަށް ފުލުހުން ބުނެފި އެވެ.

މިއަދު ހިނގި ހާދިސާގައި އެކަކު ވަނީ ނިޔާވެފަ އެވެ. ނިޔާވީ ރސ6210 ޒާހިދާ ތައުފީގެވެ.

މި ހާދިސާގައި އިތުރު މީހެއްގެ ވެސް ހާލު ދެރަވެ ފަރުވާ ދޭން ޖެހުނެވެ. އެއީ 19 އަހަރުގެ ޒުވާނެކެވެ. ފުލުހުން މިރޭ ނެރުނު ބަޔާނެއްގައި ބުނީ އޭނާގެ ހާލަތު ރަނގަޅު ވަމުން އަންނަ ކަމަށެވެ. ޒުވާނައަށް ފަރުވާ ދެމުން ގެންދަނީ އޭޑީކޭ ހޮސްޕިޓަލްގައެވެ.

މި ހާދިސާ ހިނގަން މެދުވެރިވީ ސަބަބާއި ގުޅޭގޮތުން ފުލުހުން އަދި ވާހަކައެއް ނުދައްކަ އެވެ. މިރޭގެ ބަޔާނުގައި ބުނީ ހާދިސާއާ ގުޅިގެން ތަހުގީގެެއް ފަށާފައިވާ ކަމަށެވެ.

ގޭސް ލީކުވުމުގެ ހާދިސާތައް ހިނގުން މި ފަހުން ވަނީ ވަރަށް ބޮޑަށް އިތުރުވެފަ އެވެ. ނަމަވެސް މިއީ މިފަދަ އެންމެ ހިތާމަވެރި އެއް ހާދިސާ އެވެ. މި ފަހުން ހިނގި މިފަދަ ހާދިސާއެއްގައި މީހަކު ނިޔާވެފައެއް ނުވެ އެވެ.