މަންފާއިން އިންތިޒާމުކޮށްގެން ކޮންމެ އަހަރަކު ރާއްޖޭގެ ރަށެއްގައި ސިލްސިލާކޮށް ކުރިއަށް ގެންދިއުމަށް ނިންމާފައިވާ "މަންފާ ޤުރުއާން ކޭމްޕް" ގެ ފުރަތަމަ ކޭމްޕްގައި ކުރިއަށް ގެންދިޔަ ޤުރުއާން މުބާރާތުގެ ފަޚުރުވެރި އެއްވަނަ، އދ. ދިގުރަށު ޔޫޢާން ހޯދައިފިއެވެ.

މި އޮގަސްޓް މަހުގެ 26 އިން 28 ގެ ނިޔަލަށް ކުރިއަށް ގެންދިޔަ މި ކޭމްޕުގައި އެކި އުމުރުފުރާތަކަށް ބަހާލައިގެން ޤުރުއާން މުބާރާތް ކުރިއަށް ގެންގޮސްފައިވާއިރު، މުބާރާތުގައި އދ އަތޮޅުގެ ރަށްތަކުން ވަނީ ބައިވެރިވެފައެވެ. 

ކޭމްޕް ނިންމުމުގެ ގޮތުން މިރޭ ބޭއްވި ޚާއްސަ ރަސްމިއްޔާތުގައި އެކި އުމުރުފުރާތަކުންނާއި މުޅި މުބާރާތުން ވަނަވަނައަށް އައި ކުދިންނަށް ވަނީ ޓްރޮފީއާއި ފައިސާގެ އިނާމް ހަވާލު ކޮށްފައެވެ.

އެގޮތުން މުޅި މުބާރާތުން އެއްވަނަ ދަރިވަރަށް 25،000 ރުފިޔާގެ ފައިސާގެ އިނާމް، ދެވަނަ ދަރިވަރަށް 15،000 ރުފިޔާގެ ފައިސާގެ އިނާމް އަދި ތިންވަނަ ދަރިވަރަށް 10،000 ރުފިޔާގެ ފައިސާގެ އިނާމް ދީފައިވެއެވެ. 

1) އެއްވަނަ މުޙައްމަދު ޔޫޢާން އިބްރާހީމް، ޕެރިސް/ އދ. ދިގުރަށް

2) ދެވަނަ މުޙައްމަދު ތަސްނީމް ރަޝީދު، ތިޔަރަމާގެ/ އދ. މަހިބަދޫ

3) ތިންވަނަ ރުދައިނާ މުޙައްމަދު ފަޒީލް، ގުލޭނޫރަންމާގެ/ އދ. މަހިބަދޫ

މި ޤުރުއާން ކޭމްޕުގައި ގުރުއާން ކިޔެވުމުގެ މުބާރާތްތަކުގެ އިތުރުން، ގުރުއާން އުނގަންނައިދިނުމާއި، އެކި ތަމްރީންތަކާއި ސެޝަންތައްވެސް ވަނީ ކުރިއަށް ގެންގޮސްފައެވެ. އަދި ކޭމްޕުގެ ބައިވެރިންގެ މެދުގައި ގުރުއަތު ލައިގެން ހޮވުނު ފަރާތަށް އުމްރާ ދަތުރެއް ވެސް ދީފައެވެ.

މީގެ އިތުރުން މިރޭގެ ރަސްމިއްޔާތުގައި ވަނީ މަހިބަދޫގައި ގުރުއާނުގެ އިލްމު އުނގަންނައި ދިނުމަށް ދިގު މިއްދަތަކަށް ޚިދުމަތްކުރައްވާފައިވާ އެދުރުންގެ އަގު ވަޒަންކޮށް ހަދާނީ ފިލާ އަރުވާފައެވެ. 

މި ރަސްމިއްޔާތުގައި ވާހަކަދައްކަވަމުން މަންފާ ޖަމިއްޔާގެ ރައީސް އަލީ ރަމީޒް ވަނީ، މިއީ ޖަމިއްޔާއިން މުޅި ރާއްޖޭގައި ކުރިއަށްގެންދިއުމަށް ފެށި ސިލްސިލާ ހަރަކާތެއްކަން ފާހަގަކުރައްވައި، އަންނަ އަހަރު އިތުރު އަތޮޅެއްގައި މަންފާ ކޭމްޕް ކުރިއަށްގެންދާނެކަން އިއުލާން ކުރައްވާފައެވެ.

މިފަހަރުގެ ކޭމްޕުގައި ޖުމުލަ 10 ގާރީންގެ އިތުރުން ދީނީ ޢިލްމުވެރިން ވަނީ ބައިވެރިވެވަޑައިގެންފައެވެ.