ކީރިތި ޤުރުއާން ކިޔަވައިދިނުމާއި އުނގަންނައިދިނުމުގެ ދާއިރާއިން އދ. މަހިބަދޫގައި ދިގު މުއްދަތަކަށް އަގުހުރި ޚިދުމަތްތަކެއް ކޮށްދެއްވާފައިވާ އެދުރުންގެ ޚިދުމަތުގެ އަގު ވަޒަންކޮށް، އެ ފަރާތްތަކަށް ހަނދާނީ ފިލާ އަރުވައިފިއެވެ.

މި ފަރާތްތަކުގެ އަގުވަޒަންކޮށްފައިވަނީ "މަންފާ ޖަމްޢިއްޔާ" އިން މަހިބަދޫގައި ކުރިއަށްގެންދިޔަ އެ ޖަމްޢިއްޔާގެ ފުރަތަމަ ޤުރުއާން ކޭމްޕް ނިންމުމުގެ ގޮތުން ރޭ ބޭއްވި ޚާއްޞަ ރަސްމިއްޔާތުގައެވެ.

މި ރަސްމިއްޔާތުގައި މަހިބަދޫގެ ތިން އެދުރަކަށް ހަނދާނީ ފިލާ އަރުވާފައިވާއިރު، އެ ފަރާތްތަކަށް ފިލާ ހަވާލުކޮށްދެއްވީ މަންފާ އެކަޑަމީގެ ނައިބު ރައީސް އަލްޤާރީ މުޙައްމަދު ތައުފީޤެވެ.

މި ރަސްމިއްޔާތުގައި ހަނދާނީ ފިލާ އެރުވުނު ޚިދުމަތްތެރި އެދުރުންނަކީ:

- ޙައްވާ އަބްދުالله، ފިނިވާގެ/ އދ. މަހިބަދޫ

- އިބްރާހީމް ޤާސިމް، ނަފާ/ އދ. މަހިބަދޫ

- ޚަދީޖާ މުޙައްމަދު، ބިޖިލީގެ/ އދ. މަހިބަދޫ

މި ތިން ބޭފުޅުންނަކީވެސް އެއްވެސް އުޖޫރައަކާ ނުލައި، ހިލޭސާބަހަށް އެތައް އަހަރެއް ވަންދެން ރަށުގެ ދަރިންނަށް ޤުރުއާނުގެ ޢިލްމު އުނގަންނައިދިނުމުގައި ދެމިތިއްބެވި ޚިދުމަތްތެރިންކަން ފާހަގަކޮށްލެވެއެވެ.

"މަންފާ ޤުރުއާން ކޭމްޕް" އަކީ ކޮންމެ އަހަރަކުވެސް ރާއްޖޭގެ ކޮންމެވެސް އެއް ރަށެއްގައި ސިލްސިލާކޮށް ކުރިއަށް ގެންދިއުމަށް އެ ޖަމްޢިއްޔާއިން ރާވާފައިވާ ޕްރޮގްރާމެކެވެ.

މި ސިލްސިލާގެ ފުރަތަމަ ކޭމްޕް އދ. މަހިބަދޫގައި ކުރިއަށް ގެންގޮސްފައިވަނީ މި ހިނގާ އޮގަސްޓް މަހުގެ 26 އިން 28 ގެ ނިޔަލަށެވެ.

ތިން ދުވަހުގެ މުއްދަތަށް ކުރިއަށްދިޔަ މި ކޭމްޕުގައި ޤުރުއާން މުބާރާތްތަކާއި، ޤުރުއާން އުނގަންނައިދިނުމުގެ ތަފާތު ސެޝަންތަކާއި، ޚާއްޞަ ވޯކްޝޮޕްތަކުގެ އިތުރުން ދީނީ ދަރުސް ދިނުންވެސް ވަނީ ކުރިއަށް ގެންގޮސްފައެވެ.

އަދި މި ކޭމްޕުގެ އެކި ހަރަކާތްތައް ހިންގުމުގައި ރާއްޖޭގެ ފުންނާބުއުސް 10 ޤާރީއަކު ޢަމަލީ ގޮތުން ބައިވެރިވެވަޑައިގެންފައިވެއެވެ.