މިދިޔަ އަހަރުގެ މި މުއްދަތާ އަޅާބަލާއިރު، މިއަހަރުގެ މިހާތަނަށް ރައީސުލްޖުމްހޫރިއްޔާގެ އޮފީހުން ކޮށްފައިވާ ހަރަދުތައް ނިސްބަތުން ދަށަށް ގޮސްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

މިނިސްޓްރީ އޮފް ފިނޭންސްއިން އާންމުކޮށްފައިވާ އެންމެ ފަހުގެ "ވީކްލީ ފިޒްކަލް ރިޕޯޓް" ގައިވާ ގޮތުން، މިއަހަރުގެ އޮގަސްޓް މަހުގެ 20 ވަނަ ދުވަހުގެ ނިޔަލަށް ރައީސުލްޖުމްހޫރިއްޔާގެ އޮފީހުގެ ހަރަދުތައް ހުރީ 123 މިލިއަން ރުފިޔާގައެވެ. ނަމަވެސް ވޭތުވެދިޔަ 2023 ވަނަ އަހަރުގެ މި މުއްދަތުގެ ތެރޭގައި ރައީސް އޮފީހުން ވަނީ 126.3 މިލިއަން ރުފިޔާ ހަރަދުކޮށްފައެވެ. އެހެންކަމުން މިއީ މިދިޔަ އަހަރާ އަޅާބަލާއިރު ބޮޑުތަނުން ދަށް އަދަދެކެވެ.

ރައީސުލްޖުމްހޫރިއްޔާގެ އޮފީހުގެ އިތުރުން، މިނިސްޓްރީ އޮފް ފޮރިން އެފެއާޒް (ހާރިޖިއްޔާ) ގެ ހަރަދުތައްވެސް މިއަހަރު ވަނީ ފާހަގަކޮށްލެވޭ މިންވަރަކަށް ކުޑަކުރެވިފައެވެ. ފިނޭންސްގެ ރިޕޯޓުން ދައްކާގޮތުގައި މިއަހަރުގެ މިހާތަނަށް ހާރިޖިއްޔާއިން ހަރަދުކޮށްފައިވަނީ 193.3 މިލިއަން ރުފިޔާއެވެ. މިދިޔަ އަހަރުގެ މި މުއްދަތުގައި ހާރިޖިއްޔާގެ ހަރަދުތައް ހުރީ 248.5 މިލިއަން ރުފިޔާގައެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ދައުލަތުގެ ހަރަދުތައް ކުޑަކުރުމަށާއި، އިސްރާފު މަދުކުރުމަށް ހާއްސަ ފިޔަވަޅުތަކެއް އަޅަމުންދާ މި ދަނޑިވަޅުގައި، ދައުލަތުގެ މުހިންމު އިދާރާތަކުގެ ހަރަދުތައް ކުޑަކުރެވިފައި މިވަނީ ހަރަދު ކުޑަކުރުމުގެ ސިޔާސަތުތަކުގެ ދަށުންނެވެ. ސަރުކާރުގެ އޮފީސްތަކުގެ ހިންގުމުގެ ހަރަދުތައް ކުޑަކުރުމަށް ގިނަ ފިޔަވަޅުތަކެއް އަންނަނީ ތަންފީޒު ކުރަމުންނެވެ.