ރާއްޖޭގައި ކުރެވޭ ހުރިހާ މުއާމަލާތްތަކެއް ދިވެހި ރުފިޔާއިން ކުރެވޭ ގޮތަށް ނިޒާމު ބަދަލުކުރުމަކީ ސަރުކާރުގެ މައިގަނޑު އަމާޒު ކަމަށާއި، މި ބަދަލު އެއްކޮށް ގެނައުމަށް 10 ވަރަކަށް އަހަރު ދުވަސް ހޭދަވާނެ ކަމަށް ބެލެވޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މުހިންމު ބިލްތަކެއް ތަސްދީގުކުރުމަށް މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ދިވެހި ރުފިޔާއިން ހުރިހާ މުއާމަލާތެއް ކުރެވޭ ދިމާލަށް ދިޔުމަކީ ސަރުކާރުގެ ވިސްނުމުގައި އަބަދުވެސް އޮތް ކަމެއް ކަމަށާއި، ކަމާބެހޭ ހުރިހާ މުއައްސަސާތައް ގުޅިގެން އެ އަމާޒަށް ވާސިލުވުމަށް ގިނަ މަސައްކަތްތަކެއް ކުރެވެމުންދާ ކަމަށެވެ. ނަމަވެސް، މިއީ އެއްދުވަހުން ނުވަތަ ދެދުވަހުން ނިންމާލެވޭނެ ކަމެއް ނޫން ކަމަށާއި، ރާއްޖޭގެ އިންވެސްޓްމަންޓްތަކާއި ނަގާފައިވާ ލޯނުތަކާއި އެހެނިހެން މާލީ ކަންކަމަށް ވަރަށް ބޮޑަށް ބަލަންޖެހޭ ކަމަށް އެމަނިކުފާނު ފާހަގަކުރެއްވިއެވެ.
އިރާދުކުރެއްވިއްޔާ ކަމާބެހޭ ހުރިހާ މުއައްސަސާތައް ގުޅިގެން އެ އަމާޒަށް ދިޔުމުގެ މަސައްކަތް ކުރެވޭނެ
ރައީސް ޑރ.މުއިއްޒު
ރައީސްގެ ވާހަކަފުޅުގައި، މި އަމާޒަށް އެއްކޮށް ވާސިލުވުމަށް ދިހަވަރަކަށް އަހަރު ދުވަހުގެ ރާސްތާއެއް ބޭނުންވާނެ ކަމަށް ގަބޫލުކުރައްވާ ކަމަށް ވިދާޅުވިއެވެ. އެއީ ގާތްގަނޑަކަށް 2035 ވަނަ އަހަރާ ހިސާބަށް ދާއިރު މުޅި ރާއްޖޭގެ މާލީ ނިޒާމު އެއްކޮށް ދިވެހި ރުފިޔާއަށް ބަދަލުކޮށްލެވޭނެ ކަމަށް އަންދާޒާ ކުރެވޭތީކަމަށްވެސް ރައީސް ފާހަގަކުރެއްވިއެވެ.
މީގެ އިތުރުން ރައީސް ވިދާޅުވީ، ރާއްޖޭގައި މިހާރު އޮތް ހާލަތަށް ބަލާއިރު ބޭރު ފައިސާ، ހާއްސަކޮށް ޑޮލަރުގެ މުއާމަލާތްތައް ވަރަށް ބޮޑަށް ކުރެވެމުންދާ ކަމަށެވެ. އެހެންކަމުން، މި ހަގީގަތްތަކަށް ރިއާޔަތްކޮށް، ފިޔަވަޅަކަށް ފަހު ފިޔަވަޅެއް ވަރަށް ބޮޑަށް ބަލައިގެން، ވަރަށް ތަފްސީލީ ގޮތެއްގައި އުސޫލުތައް އެކަށައަޅައިގެން މަސައްކަތް ކުރަމުންދާ ކަމަށް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
