ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ތަންފީޒު ކުރަމުންދާ 'ދޯހަޅި' އިޤްތިޞާދީ އަދި މާލީ ސިޔާސަތުތައް ބަދަލުނުކޮށްފިނަމަ، ރައީސް އިސްތިއުފާ ދެއްވަންދެން ސީދާ ހަރަކާތްތަކަށް ނުކުތުމަށް އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޤައުމީ މަޖިލީހުން ރޭ ގަރާރެއް ފާސްކޮށްފިއެވެ.

ރިޔާސަތުން ހުށަހެޅި މި ޤަރާރު ފާސްކޮށްފައިވަނީ ރޭ ބޭއްވި އެމްޑީޕީގެ ޤައުމީ މަޖިލީހުގެ 4 ވަނަ ދައުރުގެ 137 ވަނަ ބައްދަލުވުމަށް ހާޒިރުވި މެންބަރުންގެ އަޣުލަބިއްޔަތުންނެވެ.

މި ޤަރާރުގައި ފާހަގަކޮށްފައިވާ ގޮތުގައި، ރިސޯޓުތަކަށް ލިބޭ ބޭރު ފައިސާގެ އާމްދަނީގެ 40 އިންސައްތަ ދިވެހި ރުފިޔާއަށް މާރުކުރަން ލާޒިމުކުރުމަކީ އޭގެ ސަބަބުން ނޭދެވޭ އެތައް ނަތީޖާއެއް ނުކުންނާނެ ކަމެކެވެ. ރިސޯޓުތަކުގެ އާމްދަނީގެ ގާތްގަނޑަކަށް 60 އިންސައްތަ މިހާރުވެސް ޓެކުހާއި އެކި ފީތަކުގެ ގޮތުގައި ސަރުކާރަށް ދައްކަމުންދާކަން ޤަރާރުގައި ބަޔާންކޮށްފައިވެއެވެ. އޭގެ ތެރޭގައި ޖީއެސްޓީގެ ގޮތުގައި ނަގާ 17 އިންސައްތައާއި، ސާވިސް ޗާޖުގެ 10 އިންސައްތައިގެ އިތުރުން ގްރީން ޓެކުހަށް ނަގާ 12 އިންސައްތަ ހިމެނެއެވެ.

މީގެއިތުރުން، ރިސޯޓުތައް ތަރައްގީކުރުމަށް ނަގާފައިވާ ލޯނުތައް ދެއްކުމަށާއި، ބޭރުގެ މުވައްޒަފުންގެ މުސާރަ ދިނުމަށް ބޭރު ފައިސާ ބޭނުންވާ ހިނދު، ވިޔަފާރިތަކަށް ނުއުފުލޭވަރުގެ ބުރައެއް ޖެއްސުމުން ރާއްޖެއަށް ވަންނަ ޑޮލަރުގެ މިންވަރު އިތުރުނުވާނެ ކަމަށްވެސް އެމްޑީޕީގެ ޤަރާރުގައިވެއެވެ. އަދި ޑޮލަރުގެ އަގު ކޮންޓްރޯލް ކުރަންވާނީ އެމްއެމްއޭއިން ވަކި އަގެއް ކަނޑައަޅައިގެން ނޫން ކަމަށާއި، އެކަން ކުރަންވާނީ މާކެޓު އުސޫލުން ސަރުކާރުގެ ރިޒާވުން ޑޮލަރު ވިއްކައިގެން ކަމަށްވެސް ބުނެފައިވެއެވެ.

ޑޮލަރުގެ އަގާއި ތަކެތީގެ އަގު ތިރިކުރުމަށްޓަކައި ދައުލަތުގެ ބޭރު ދަރަނި ރީސްޓްރަކްޗަރ ކުރުމަށާއި، ސަރުކާރުގެ ޚަރަދުތައް ކުޑަކުރުމަށް އެމްޑީޕީން ވަނީ ގޮވާލާފައެވެ. އަދި ސަރުކާރުގެ ނިންމުންތަކުގެ ސަބަބުން އިންވެސްޓަރުންގެ އިތުބާރު ގެއްލި، ރާއްޖެ ބަނގުރޫޓުވުމުގެ މަގަށް ދަތުރުކުރަމުންދާ ކަމަށް އެ ޕާޓީން ބުނެފައިވެއެވެ.

އެހެންކަމުން، މިފަދަ ޒިންމާދާރުކަން ކުޑަ ފިޔަވަޅުތައް އެޅުން ހުއްޓާލައި، އިޤްތިޞާދީ މައްސަލަތައް ހައްލުކުރުމަށް އެމްޑީޕީއާއެކު މަޝްވަރާގެ މޭޒަށް ވަޑައިގަތުމަށް ރައީސް މުޢިއްޒަށް ވަނީ ގޮވާލާފައެވެ. އަދި އެކަން އެގޮތަށް ނުކުރައްވާނަމަ، ރައީސް އިސްތިއުފާ ދެއްވަންދެން ސީދާ ހަރަކާތްތައް ހިންގުމަށް ނިންމައި، އެ ހަރަކާތްތަކަށް މާލީ އަދި އެހެނިހެން ގޮތްގޮތުން އެހީތެރިވެދިނުމަށް ވިޔަފާރިވެރިންނަށް އެމްޑީޕީގެ ޤަރާރުގައި ވަނީ އިލްތިމާސްކޮށްފައެވެ.