އުމްރާއަށް ގެންދިއުމަށް ފައިސާ ނަގައި އަސްކޮއި ގްރޫޕުން ލަނޑުދިން ބަޔަކަށް ފައިސާ ދެއްކުމަށް ސިވިލްކޯޓުން ހުކުމްކޮށްފިއެވެ.

ސިވިލްކޯޓުން މި ހުކުން ކޮށްފައިވަނީ އުމްރާގެ އަޅުކަން އަދާކުރުމަށް ފައިސާ ދެއްކިނަމަވެސް އުމްރާއަށް ގެންގޮސްފައި ނުވާ މައްސަލާގައި އެ ގްރޫޕާ ދެކޮޅަށް ސިވިލްކޯޓަށް ހުށަހެޅި މައްސަލާގައެވެ. މި މައްސަލާގައި އަސްކޮއި ގްރޫޕާ ދެކޮޅަށް ހަ މީހަކު ހިމެނޭހެން ދައުވާ ކުރިއެވެ. 

އުމްރާގެ އަޅުކަން އަދާކުރުމަށް އެ ހަ މީހުން އަސްކޮއި ގްރޫޕަށް ފައިސާ ދައްކާފައިވަނީ މިދިޔަ އަހަރުގެ ފެބުރުއަރީމަހުގެ 19 ވަނަ ދުވަހުއެވެ. އެ ހަ މީހުންގެ މަތިން 155،700 ރުފިޔާ ދައްކާފައިވާއިރު، އަސްކޮއި ގްރޫޕުން ވަނީ ދައުވާއަށް އެއްބަސްވެފައެވެ. 

މި ދައުވާ އާ ގުޅިގެން ސިވިލްކޯޓުގެ ހުކުމްގައި ބުނެފައިވަނީ އިއްޔެއިން ފެށިގެން 7 ދުވަހުގެ ތެރޭގައި ކޯޓަށް ދައްކައި ހަލާސްކުރަންޖެހޭ ކަމަށެވެ. މި ދައުވާގައި ޝަރީއަތުގެ ހަރަދުގެ ގޮތުގައި ހޯދަން ދައުވާކުރި 42،000 ރުފިޔާ ނަގައިދިނުމަށް އެދިފައެއް ނުވެއެވެ. އެއީ އެ ހަރަދު ކުރިކަން އެނގެން ނެތުމުންނެވެ.

އުމްރާއަށް މީހުންގެންދިއުމަށް ފައިސާ ނެގުމަށްފަހު އެތައް ބަޔަކަށް ލަނޑުދިން މައްސަލާގައި އިސްލާމިކް މިނިސްޓްރީން ވަނީ މިދިޔަ އަހަރުގެ ޖުލައިމަހު އަސްކޮއި ގްރޫޕަށް ދީފައިވާ ހުއްދަވެސް އަތުލާފައެވެ. 

- އަސްކޮއި ޓްރެވަލް ކުންފުންޏާއި އަދި އެކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް އުމްރާއަށް މީހުން ގެންދިއުމުގެ ހުއްދަ ނުދިނުން

- މިއަހަރުގެ ޖުލައި އުމްރާ ދަތުރަށް ކުރިން ފައިސާ ދެއްކި މީހުންގެ ފައިސާ ހަވާލުކުރުމަށް އެންގުން

- މައްސަލާގައި އަސްކޮއިގެ މައްޗަށް ޤާނޫނީ ފިޔަވަޅު އެޅުމަށް ފުލުހުންނަށް ހުށަހެޅުން 

މި މައްސަލާގައި އިސްލާމިކް މިނިސްޓްރީން ވަނީ އަސްކޮއި ގްރޫޕް 130،000 ރުފިޔާއިން ޖޫރިމަނާވެސް ކޮށްފައެވެ.