ރ.އަތޮޅު ފައިނުން ދަނޑުވެރިކަމަށް ބިން ދޫކުރުމަށް އެރަށު ކައުންސިލުން އާއްމުކޮށް ހުޅުވާލައިފިއެވެ.
ފައިނު ކައުންސިލުން ކޮށްފައިވާ އިއުލާނެއްގައި ބުނެފައިވަނީ، އެ ރަށުގެ ލޭންޑްޔޫސް ޕްލޭންގައި ދަނޑުވެރިކަން ކުރުމަށް ކަނޑައަޅާފައިވާ ސަރަހައްދުން ދަނޑުވެރިކަން ކުރުމަށް ޝައުގުވެރިވާ ފަރާތްތަކަށް ދަނޑުބިން ކުއްޔަށް ނެގުމުގެ ފުރުސަތު ބީލަން އުސޫލުން ހުޅުވާލާފައިވާކަމަށެވެ.
މި އިއުލާނުގައި ވާގޮތުން ދޫކުރުމަށް ހަމަޖެހިފައިވަނީ 10،000 އަކަފޫޓުގެ 9 ދަނޑު ބިމެވެ. ފައިނުން ދަނޑުވެރިކަމަށް ބިން ނެގުމަށް ބޭނުންވާ ފަރާތްތަކަށް މިމަހުގެ 13 ވަނަ ދުވަހާ ހަމަޔަށް ބީލަން ރަޖިސްޓްރީކުރުމަށް ހުޅުވާލާފައިވާއިރު، މިމަހުގެ 17 ވަނަ ދުވަހުގެ ނިޔަލަށް ބިޑް ހުށަހަޅަން ޖެހެއެވެ.
ފައިނަކީ މިހާރުވެސް ދަނޑުވެރިކަން ކުރަމުން އަންނަ ރަށެކެވެ. އެރަށުގެ މީހުން ހައްދާ ކާބޯތަކެތީގެ ބާވަތްތަކުގެ ތެރޭގައި ކަރާ، މިރުސް ހިމެނެއެވެ. ފައިނަކީ ގުދުރަތީގޮތުން ވަރަށް ރީތި ސިފަތަކެއް ލިބިފައިވާ ރަށެކެވެ. ފައިނުގެ އެންމެ ފާހަގަކޮށްލެވެނީ އެރަށުގެ ވައު ހިމެނޭ ސަރަހައްދެވެ.
Advertisement
This content is created and paid for by advertisers and does not involve Voice Journalists
