އެމްއެމްޕީއާރުސީން މޯލްޑިވްސް ޕޯޓްސް ލިމިޓެޑަށް އަދިވެސް 85 މިލިއަނަށް ވުރެ ގިނަ ރުފިޔާ ނުދައްކާ އޮތްކަން ހާމަވެއްޖެއެވެ.

އޮޑިތަރ ޖެނެރަލް ނެރުއްވާފައިވާ އެމްޕީއެލްގެ 2025 ވަނަ އަހަރުގެ މާލީ އޮޑިޓަށް ބަލާއިރު، އެކުންފުންޏަށް ލިބެންޖެހޭ ފައިސާގެ ތެރެއިްނ އެއް ކުންފުންޏަކުން އަދިވެސް އެންމެ ގިނަ އަދަދެއް ދައްކަންޖެހެނީ އެމްއެމްޕީއާރުސީންނެވެ. އެމްޕީއެލްގެ ބެލެންޝީޓަށް ބަލާއިރު އެކުންފުންޏަށް ލިބެންޖެހޭ ފައިސާގެ އަދަދު އުޅެނީ 446.8 މިލިއަން ރުފިޔާގައެވެ. 

އެމްޕީއެލަށް އެންމެ ގިނަ ފައިސާ ލިބެންޖެހެނީ ސަރުކާރުގެ އެކިއެކި ކުންފުނިތަކުންނެވެ. އެގޮތުން ސަރުކާރުގެ ކުންފުނިތަކުން އެމްޕީއެލަށް 118 މިލިއަނަށްވުރެ ގިނަ ރުފިޔާ ލިބެންޖެހެއެވެ.

އެމްއެމްޕީއާރުސީއަށް ބަލާއިރު، އެކޯޕަރޭޝަނުން އެމްޕީއެލަށް ޑޮލަރު ވިއްކި މުއާމަލާތުން މިހާތަނަށް 85.4 މިލިއަން ރުފިޔާ ލިބެންޖެހެއެވެ. އޮޑިޓް ރިޕޯޓުން ދައްކާ ގޮތުގައި އެމްޕީއެލުން ވަނީ އެމްއެމްޕީއާރުސީއާއެކު 2020 ވަނަ އަހަރުގެ ފެބުރުއަރީމަހުގެ 14 ވަނަ ދުަވަހު އެއްބަސްވުމެއް ގާއިމްކޮށް ލިބެންޖެހޭ މި ފައިސާ އަހަރަކު %4.6 ގެ އިންޓްރެސްޓަކާއެކު 15 އަހަރު ދުވަހުގެ ތެރޭގައި ދައްކާ ނިންމަން އެއްބަސްވެފައެވެ. ނަމަވެސް މި ފައިސާ ނުދެއްކި އިންޓަރެސްޓް އަރަމުންދާކަން ފާހަގަކޮށްލެވެއެވެ. 

2014 ވަނަ އަހަރު އޮޑިޓަރ ޖެނެރަލް ނެރުއްވި އެމް.އެމް.ޕީ.އާރު.ސީގެ ހާއްސަ އޮޑިޓް ރިޕޯޓުގައިވާ ގޮތުން، ބޭރު ފައިސާ މާރުކުރުމަށްޓަކައި އެމް.ޕީ.އެލް އިން އެމްއެމްޕީއާރުސީއަށް އަށް 77.1 މިލިއަން ރުފިޔާ ދިނުމަށް އެއްބަސްވެފައިވެއެވެ. މި ފައިސާގެ ބަދަލުގައި އެމްއެމްޕީއާރުސީން އެމްޕީއެލަށް 6.3 މިލިއަން ޑޮލަރު ދޭންޖެހެއެވެ. ނަމަވެސް އޭގެ ތެރެއިން މިލިއަނެއްހާ ޑޮލަރުވެސް އެމްޕީއެލަށް ދައްކާފައި ނުވާކަމަށް ރިޕޯޓްތަކުން ދައްކައެވެ.

އެމްއެމްޕީއާރުސީން ނެގި އެ ފައިސާ އެމްޕީއެލަށް ދިނުމަށް މީގެ ކުރިން އެކި ފަހަރުމަތިން މަސައްކަތްކޮށްފައިވީނަމަވެސް އެ ފައިސާ ދިނުމުގެ ކަންކަން އަދިވެސް ނިމުމަކާ ހަމަޔަށް އައިސްފައި ނުވާކަން ފާހަގަކޮށްލަން ޖެހެއެވެ.