ދަރިވަރުންގެ ކިބައިގައި މުދައްރިސުންނަށް އިހްތިރާމްކުރުމުގެ ރިވެތި އާދަ އަށަގެންނެވުމުގައި އެންމެ އިސް ދައުރެއް އަދާކުރަންޖެހޭ ބަޔަކީ ބެލެނިވެރިން ކަމަށާއި، އެކަން ހާސިލުވާނީ ބެލެނިވެރިން ދޭ ރަނގަޅު ތަރުބިއްޔަތަކުން ކަމަށް ތައުލީމާ ބެހޭ ވަޒީރު ޑރ. އިސްމާއިލް ޝަފީޢު ވިދާޅުވެއްޖެއެވެ.
ވަޒީރު މިހެން ވިދާޅުވީ ޢިމާދުއްދީން ސްކޫލަށް 25 އަހަރު ފުރުމުގެ މުނާސަބަތުގައި ބޭއްވި ރިހި ޔޫބީލް ފާހަގަކުރުމުގެ ޚާއްޞަ ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި ވާހަކަފުޅު ދައްކަވަމުން ވަޒީރު ފާހަގަކުރެއްވި ގޮތުގައި، ބެލެނިވެރިންނަކީ ސްކޫލެއްގެ ކާމިޔާބީގެ އެންމެ މުހިންމު އެއް ބައެވެ. އަދި ސްކޫލެއް ކާމިޔާބު ކުރުމަށްޓަކައި އެންމެ ބޮޑު މަސައްކަތެއް ކުރަންޖެހޭ އެއް ބަޔަކީވެސް ބެލެނިވެރިން ކަމަށް ވިދާޅުވިއެވެ. ނަމަވެސް، މަދުން ނަމަވެސް ބެލެނިވެރިންނާއި ސްކޫލާ ދެމެދު އޮންނަންޖެހޭ ގުޅުން ކުޑަވަމުންދާ މަންޒަރު ފެންނަމުންދާކަމީ ކަންބޮޑުވާންޖެހޭ ކަމެއް ކަމުގައި އެމަނިކުފާނު ވިދާޅުވިއެވެ.
ސްކޫލެއް ބިނާކުރެވިދާނެ، މުދައްރިސުންވެސް ހޯދިދާނެ، އަދި ވަސީލަތްތައްވެސް ޤާއިމުކުރެވިދާނެ. އެކަމަކު ތަޢުލީމަކީ އެއަށްވުރެ މާ ފުޅާ މާނައެއްގައި އަޅުގަނޑުމެން ކުރަންޖެހޭ މަސައްކަތެއް
ރާއްޖޭގެ ހުރިހާ ބެލެނިވެރިންނަށް މުޚާޠަބު ކުރައްވަމުން ވަޒީރު ވިދާޅުވިއެވެ
މާލޭ ސަރަޙައްދުގެ ސްކޫލްތަކުގެ ހާލަތަށް އަލިއަޅުއްވާލައްވަމުން ވަޒީރު ޝަފީއު ވިދާޅުވީ، ކޮންމެ ސްކޫލެއްގައިވެސް މަދުވެގެން އެއްހާހާއި ދެހާހާ ދެމެދުގެ އަދަދަކަށް ދަރިވަރުން ތަޢުލީމު ހާސިލުކުރަމުންދާއިރު، މުދައްރިސުންނަށް ގިނަގުނަ ގޮންޖެހުންތަކާ ކުރިމަތިލާންޖެހޭ ކަމަށެވެ. އެހެންކަމުން، މުދައްރިސުންނަށް އިޙުތިރާމު ކުރުމުގެ ވިސްނުމާއި އާދަ ދަރިވަރުންގެ ކިބައިގައި އަށަގެންނެވުމުގެ މައިދާނުގައި އެންމެ ނަގާކިޔަންޖެހޭނީ ބެލެނިވެރިން ކަމަށާއި، ބެލެނިވެރިން އެ މަސައްކަތް ކޮށްގެން މެނުވީ ބުރަ މަސައްކަތްކުރާ މުދައްރިސުންގެ އަގު މުޖުތަމަޢުގައި ޙަޤީޤީ ގޮތެއްގައި ވަޒަން ނުކުރެވޭނެ ކަމަށްވެސް ވިދާޅުވިއެވެ.
ކޭމްބްރިޖް ނުވަތަ އެޑެކްސެލް އިމްތިޙާނުތަކުން ދަރިވަރުން ކިތަންމެ މަތީ ވަނަތަކެއް ހޯދައި، "އޭ ސްޓާ" ހޯދި ނަމަވެސް އަދި ސްކޮލަރޝިޕް ލިބުނު ކަމުގައި ވިޔަސް، ދަރިވަރުންގެ ކިބައިގައި ރިވެތި އަޚްލާޤާއި، އެހެން މީހުންނަށް އިޙްތިރާމްކުރުމުގެ ސިފަ އަދި ޤައުމައިގެން ކުރިއަށްދިއުމުގެ ވިސްނުން ނެތްނަމަ، ތަޢުލީމަށް ކުރާ އިންވެސްޓްމަންޓުގެ ފުރިހަމަ ނަތީޖާ ނުފެންނާނެ ކަމަށް މިނިސްޓަރު ފާހަގަކުރެއްވިއެވެ.
ވަޒީރުގެ ވާހަކަފުޅު ނިންމަވާލައްވަމުން ވަނީ، މި ލަނޑުދަނޑިތައް ހާސިލުކުރުމަށްޓަކައި މުދައްރިސުންނާއި، ބެލެނިވެރިން އަދި ސްކޫލްތަކުގެ ވެރިން އެކަތިގަނޑެއްގެ ގޮތުގައި ގުޅިގެން މަސައްކަތްކުރުމަށް ހުރިހާ ފަރާތްތަކަށް އިލްތިމާސްކުރައްވާފައެވެ.
Advertisement
This content is created and paid for by advertisers and does not involve Voice Journalists
