ޗައިނާގެ ބޮޑެތި ސިޓީތަކުގައި ހުންނަ ބޮޑެތި ސްކްރީންތަކާއި ބިލްބޯޑުތަކުގައި މީގެކުރިން ދައްކަމުން ދިޔަ ފެޝަން އަދި މޯބައިލް ފޯނުތަކުގެ ވިޔަފާރި އިޝްތިހާރުތައް ނަގައި، ގައުމު ތަރައްގީކުރުމުގައި މުހިންމު ދައުރެއް އަދާކުރި ސައިންސްވެރިންގެ ފޮޓޯތަކާއި މައުލޫމާތު ދައްކަން ފަށައިފިއެވެ.

މި ބަދަލު އެންމެ ބޮޑަށް ފާހަގަކުރެވިގެން ދިޔައީ ހެނާން ޕްރޮވިންސްގެ ޒެންގްޒޫގައި ހުންނަ ކޮންވެންޝަން އެންޑް އެގްޒިބިޝަން ސެންޓަރުގެ މެޓްރޯ ސްޓޭޝަނުންނެވެ. މިދިޔަ އޮގަސްޓް މަހުގެ 27 ވަނަ ދުވަހު ނަގާފައިވާ ފޮޓޯތަކުން ފެންނަ ގޮތުގައި، އެ ސަރަހައްދުން ދަތުރުކުރާ އާންމުންނަށް ފެންނަ ގޮތަށް ވަނީ ޗައިނާގެ ރޮކެޓް ސައިންސްވެރިޔާ ޗިއާން ޒުއެސެން އާއި ނިއުކްލިއާ ފިޒިސިސްޓް ޑެންގް ޖިއާޒިއާން ފަދަ ބޭފުޅުންގެ ބޮޑެތި ޕޯޓްރެއިޓްތައް ބަހައްޓާފައެވެ.

ޗައިނާގެ ސަރުކާރު ހިންގާ ގްލޯބަލް ޓައިމްސް އިން ރިޕޯޓްކޮށްފައިވާ ގޮތުގައި، ސައިންސްވެރިންނަށް އިސްކަން ދިނުމުގެ ގޮތުން ފެށި މި ހަރަކާތް ފުރަތަމަ ފެށުނީ ޝަންޑޮންގް ޕްރޮވިންސްގައެވެ. އޭގެ ފަހުން އަންހުއީ، އިނާ މޮންގޯލިއާ، ޖިއަންގްޒީ އަދި ހެނާން ޕްރޮވިންސްގެ ޝޮޕިންގ މޯލްތަކާއި މެޓްރޯ ސްޓޭޝަންތައް ފަދަ އާންމު ތަންތަނަށް މި ކެމްޕޭން ވަނީ ފުޅާވެފައެވެ.

މި ބޯޑުތަކުގައި ހިމަނާފައިވާ މަޝްހޫރު ބޭފުޅުންގެ ތެރޭގައި ހައިބްރިޑް ހަނޑޫ އުފައްދައިގެން ގައުމުގެ ކާބޯތަކެތީގެ ރައްކާތެރިކަން ކަށަވަރުކޮށްދިން އެގްރޮނޮމިސްޓް ޔުއާން ލޮންގްޕިންގ އާއި، މެލޭރިއާ ބައްޔަށް ފަރުވާއެއް ހޯދައިގެން 2015 ވަނަ އަހަރު ނޮބެލް އިނާމު ހާސިލްކުރި ޓޫ ޔޫޔޫ އަދި ރޭޑިއޯ އެސްޓްރޮނޮމަރ ނަން ރެންޑޮންގ ހިމެނެއެވެ.

މީގެ އިތުރުން، އެމެރިކާގެ އެމް.އައި.ޓީ އިން ކިޔަވައިވިދާޅުވެ، އެމެރިކާގެ ޖެޓް ޕްރޮޕަލްޝަން ލެބޯޓްރީ ތަރައްގީކުރުމުގައި ބައިވެރިވެވަޑައިގެންނެވި ނަމަވެސް، ފަހުން 1950 ގެ އަހަރުތަކުގައި އެމެރިކާއިން ފޮނުވާލި މަޝްހޫރު ސައިންސްވެރިޔާ ޗިއާން ޒުއެސެންގެ ވާހަކަ މި ކެމްޕޭނުގައި ވަރަށް ބޮޑަށް ފާހަގަކޮށްފައިވެއެވެ. ޗައިނާއަށް އެނބުރި ވަޑައިގަތުމަށްފަހު އޭނާ ވެގެންދިޔައީ އެގައުމުގެ މިސައިލް އަދި ޖައްވީ ޕްރޮގްރާމްތަކުގެ "ބައްޕަ" ކަމުގައެވެ.

ޗައިނާއިން ފެށި މި ކެމްޕޭނަށް ބައިނަލްއަގުވާމީ ފެންވަރުގައި ބޮޑު ސަމާލުކަމެއް ލިބިފައިވާއިރު، އަވަށްޓެރި އިންޑިއާ ފަދަ ގައުމުތަކުގައި މިކަމާ ގުޅޭގޮތުން ވަނީ ބޮޑު ބަހުސެއް އުފެދިފައެވެ. އިންޑިއާގެ ވިޔަފާރިވެރިޔާ ހަރޝް ގޮއެންކާ މީސްމީޑިއާގައި ލިޔުނު ޕޯސްޓެއްގައި ބުނި ގޮތުގައި، ޗައިނާއިން ސައިންސްވެރިންނަށް ބޮޑު އިސްކަމެއް ދެމުންދާއިރު، އިންޑިއާގެ ބިލްބޯޑުތަކުން ފެންނަނީ ސިޔާސީ ވެރިންނާއި ފިލްމުކުޅޭ މީހުންނެވެ. އަދި ގައުމު ބިނާކުރާ ޓީޗަރުންނާއި، ޑޮކްޓަރުންނާއި ސައިންސްވެރިންނަށް އާންމުންގެ ތެރޭގައި މިފަދަ ޝަރަފެއް ނުދެވެނީ ކީއްވެގެންތޯ އޭނާ ސުވާލު އުފެއްދިއެވެ.