އެމެރިކާގެ މިއާމީ އިންޓަނޭޝަނަލް އެއާޕޯޓަށް ޖައްސަން އުޅުމުގެ ތެރޭގައި، އެމެޒޯން ޕްރައިމް އެއާގެ މުދާ އުފުލާ ބޯޓެއް ރަންވޭ މަތިން ކަހާލައިގެން ގޮސް ވެއްޓުނު ހާދިސާގައި މަދުވެގެން ފަސް މީހުން މަރުވެއްޖެއެވެ.

މި ހާދިސާ ހިނގާފައިވަނީ އާދީއްތަ ދުވަހުގެ މެންދުރުފަހު އެމެރިކާ ގަޑިން ގާތްގަނޑަކަށް 2:00 ހާއިރުއެވެ. ޕުއެޓޯ ރީކޯގެ ސެން ހުއާން އިން ފުރައިގެން އައި "ޕްރައިމް އެއާ ފްލައިޓް 7598" ރަންވޭ އިން ބޭރަށް ކަހާލައިގެން ގޮސް، އެ ސަރަހައްދުގައި ހުރި އެތައް އެއްގަމު އުޅަނދެއްގައި ޖެހިފައިވާ ކަމަށް އޮފިޝަލުން މައުލޫމާތު ދެއްވައެވެ.

މިއާމީ-ޑޭޑް ފަޔާ ޗީފް ރޭ ޖަދައްލާ ވިދާޅުވީ، މި ހާދިސާގައި ފަސް މީހަކު މަރުވުމުގެ އިތުރުން އިތުރު ފަސް މީހަކު ޒަޚަމްވެފައިވާ ކަމަށެވެ. އަދި ޒަޚަމްވި މީހުންގެ ތެރެއިން ތިން މީހެއްގެ ހާލު ސީރިއަސް ކަމަށްވެސް އޭނާ ވިދާޅުވިއެވެ. މީގެއިތުރުން ބޯޓު ޖެހުނު އެއްގަމު އުޅަނދުތަކުގެ ތެރޭގައި ދެ މީހަކު ތާށިވި ކަމަށާއި، ބޯޓުގެ ޕައިލެޓާއި ކޯ-ޕައިލެޓް ވެސް ބޯޓު ތެރޭގައި ތާށިވި ކަމަށް އޮފިޝަލުން ހާމަކުރެއްވިއެވެ. ނަމަވެސް މި ހާދިސާގައި މަރުވި މީހުންގެ ވަނަވަރު އަދި ހާމަކޮށްފައެއް ނުވެއެވެ.

މި ހާދިސާއާ ގުޅިގެން ރެސްކިއު 60 އަށް ވުރެ ގިނަ ޔުނިޓާއި 200 އެއްހާ މީހުން ހަރަކާތްތެރިވެފައިވެއެވެ. އަދި ބޯޓުން ތެޔޮ ލީކުވަމުން ދިޔުމުގެ ސަބަބުން، އިމަޖެންސީ ޓީމުތަކުން އެކަން ހައްލުކުރުމަށް ގިނަ މަސައްކަތްތަކެއް ކުރަން ޖެހުނެވެ. މި ހާދިސާއާ ގުޅިގެން އެއާޕޯޓް ވަގުތީ ގޮތުން ބަންދުކުރި ނަމަވެސް، އާދީއްތަ ދުވަހުގެ ހަވީރުގެ ވަގުތެއްގައި އެއާޕޯޓުގެ ދެ ރަންވޭއެއް އަލުން ވަނީ ހުޅުވާލާފައެވެ.

ފްލައިޓް ޓްރެކްކުރާ 'ފްލައިޓްރާޑާ24' އިން ހާމަކުރި ގޮތުގައި، މި ހާދިސާ ހިނގި ބޮއިންގް 767-300 މަރުކާގެ މި ބޯޓަކީ 32 އަހަރު ވެފައިވާ ބޯޓެކެވެ. އަދި ބޯޓު ރަންވޭއިން ކަހާލައިގެން ދިޔަ ވަގުތު އޭގެ ދުވެލި ހުރީ ގަޑިއަކު 112 ނޮޓްސް (129 މޭލު) ގައެވެ. މި ބޯޓަކީ އެމެޒޯނަށްޓަކައި "21 އެއާ" އިން އޮޕަރޭޓް ކުރަމުން އައި ބޯޓެކެވެ.

"21 އެއާ" އިން ނެރުނު ބަޔާނެއްގައި، މި ހިތާމަވެރި ހާދިސާއާ ގުޅިގެން ފުން ހިތާމައެއް ލިބިފައިވާ ކަމަށް ބުނެ، މަރުވި މީހުންގެ އާއިލާތަކަށް ތައުޒިޔާ ފޮނުވާފައިވެއެވެ.

އެމެރިކާގެ ސިވިލް އޭވިއޭޝަން އެކްސިޑެންޓްތައް ތަހުގީގުކުރާ ނޭޝަނަލް ޓްރާންސްޕޯޓޭޝަން ސޭފްޓީ ބޯޑު (އެންޓީއެސްބީ) ގެ ޗެއާވުމަން ޖެނިފާ ހޮމެންޑީ އިސްވެ ހުންނަވައިގެން ޓީމެއް މިހާރު ވަނީ މި ހާދިސާ ތަހުގީގު ކުރުމަށް މިއާމީއަށް ފޮނުވާފައެވެ. އަދި މި ހާދިސާއާ ގުޅޭ ފުރަތަމަ މީޑިއާ ބްރީފިން ހޯމަ ދުވަހު ބާއްވާނެ ކަމަށް އެ އިދާރާއިން ބުނެފައިވެއެވެ.