މި ވަގުތާ ހަމައަށް ރާއްޖޭގައި ކީރިތި ޤުރްއާން ހިތުދަސްކޮށްފައިވާ ޙާފިޡުންގެ ޖުމްލަ ޢަދަދު 322 އަށް އަރައިފައިވާ ކަމަށާއި، ސަރުކާރުގެ އަމާޒަކީ މި ދައުރުގެ ތެރޭގައި އެ ޢަދަދު 500 އަށް އެރުވުން ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އިސްލާމިކް މިނިސްޓަރު ވިދާޅުވީ، ރާއްޖޭގައި ޙާފިޡުންގެ ޢަދަދު އިތުރުވަމުން ދިއުމަކީ ނުހަނު އުފާވެރި ކަމެއް ކަމަށެވެ. އަދި ވަކިން ޚާއްޞަކޮށް ޒުވާނުން ޤުރްއާން ހިތުދަސްކުރުމަށް ދެމުންދާ އަހައްމިއްޔަތުކަމަކީ ރާއްޖޭގެ އިސްލާމީ މުސްތަޤްބަލު އުޖާލާވެގެންދާނެ ކަމެއް ކަމުގައި ފާހަގަކުރެއްވިއެވެ. މީގެއިތުރުން، ކުރިއަށް އޮތް ރަމަޟާން މަހުގެ ތެރޭގައި ވެސް ގިނަ ޢަދަދެއްގެ ޙާފިޡުން ދަސްވެނިވާނެ ކަމަށް ލަފާކުރެވޭ ކަމަށް ވެސް މިނިސްޓަރު ވިދާޅުވިއެވެ.

ޙާފިޡުން އިތުރުކުރުމަށް ސަރުކާރުން ވަރަށް ބޮޑު އިސްކަމެއް ދެއްވައިގެން ގިނަ މަސައްކަތްތަކެއް ކުރަމުންދާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ޙާފިޡުންނަށް ހިތްވަރު ދެއްވުމުގެ ގޮތުން ދައުލަތުން ދޭ ޢިނާޔަތް ވެސް އިތުރުކޮށްދެއްވާފައެވެ. އަދި ޤުރްއާން ހިތުދަސްކުރުމުގެ މަޝްރޫޢުތައް މިހާރު ވަނީ މުޅި ރާއްޖެއަށް ފުޅާކުރެވިފައެވެ.

މިނިސްޓަރު ހާމަކުރެއްވި ގޮތުގައި، މިވަގުތާ ހަމައަށް ރާއްޖޭގެ އެކި ކަންކޮޅުތަކުގައި 2،000 އަށް ވުރެ ގިނަ ދަރިވަރުން ޤުރްއާން ހިތުދަސްކުރުމުގެ މަސައްކަތް ކުރަމުން އެބަގެންދެއެވެ. މިގޮތުން އެންމެ ގިނަ ދަރިވަރުން މިހާރު ތަޢުލީމު ޙާޞިލްކުރަމުން ދަނީ ކީރިތި ޤުރްއާނާ ބެހޭ ޤައުމީ މަރުކަޒުގައާއި ޢިލްމު އިންސްޓިޓިއުޓްގައެވެ.

ރާއްޖޭގެ ހުރިހާ ރަށަކަށް ޤުރްއާނުގެ ޢިލްމު ފުޅާކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން، މިހާތަނަށް 30 ރަށެއްގައި ޤުރްއާނާ ބެހޭ މަރުކަޒުގެ ގޮފިތައް ރަޖިސްޓްރީކޮށް، ޢަމަލީ ގޮތުން ޚިދުމަތް ވަނީ ފަށާފައެވެ. މީގެ އިތުރުން 20 ތަނެއް ރަޖިސްޓްރީ ކުރުމުގެ މަސައްކަތާއި، އެފަދަ އިތުރު 38 ތަނެއް ބިނާކުރުމުގެ މަސައްކަތް މިހާރު ވެސް ބާރަށް ކުރިއަށްދާ ކަމަށް މިނިސްޓަރު ވިދާޅުވިއެވެ. ސަރުކާރުގެ ޢަމާޒަކީ ކުރިއަށް އޮތް 2 އަހަރު ދުވަހުގެ ތެރޭގައި ރާއްޖޭގެ ހުރިހާ ރަށަކަށް މި މަޝްރޫޢު ގެންދިއުމެވެ.

ހަމައެއާއެކު، ރަށްރަށުގައި ހިންގާ ޤުރްއާން މަރުކަޒުގެ ގޮފިތަކުގައި އިމާމުން މެދުވެރިކޮށް ޤުރްއާން ކިޔަވައިދިނުމުގެ މަސްއޫލިއްޔަތު، އެ ބޭފުޅުންގެ ވަޒީފާގެ ބަޔާނަށް އިތުރުކުރުމުގެ މަސައްކަތް ވެސް މިނިސްޓްރީން މިހާރު ދަނީ ކުރަމުންނެވެ.