ހުޅުމާލޭގައި ޤަވާއިދާ ޚިލާފަށް ހިންގަމުންދިޔަ ސެލޫން އަދި ސްޕާތަކެއް ބަލައި ފާސްކޮށް، އެ ތަންތަނުގައި މަސައްކަތް ކުރަމުންދިޔަ ބިދޭސީންތަކެއް މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިިމިގްރޭޝަނުން ބުނީ މި އޮޕަރޭޝަނަކީ ޤަވާއިދާ ޚިލާފަށް އުޅޭ ބިދޭސީން ބަލައި ފާސްކުރުމަށް އެކުލަވާލާފައިވާ ޚާއްޞަ ޓާސްކް ފޯސްއިން އިއްޔެ ހުޅުމާލޭގައި ކުރިއަށްގެންދިޔަ އިންސްޕެކްޝަނެއް ކަމަށެވެ. މި އޮޕަރޭޝަން އަމާޒުކޮށްފައިވަނީ ހުޅުމާލޭގައި ސެލޫން އަދި ސްޕާގެ ޚިދުމަތް ދެމުން އަންނަ ތަންތަނެވެ.

މި އިންސްޕެކްޝަންގެ ތެރޭގައި ޖުމްލަ 8 ތަނެއް ބަލައި ފާސްކޮށްފައިވާއިރު، އެ ތަންތަނުގައި މަސައްކަތްކުރަން ތިބި 26 ބިދޭސީއެއްގެ ލިޔެކިޔުންތައް ވަނީ ޗެކްކޮށްފައެވެ. އަދި އޭގެ ތެރެއިން ޤަވާއިދާ ޚިލާފަށް މަސައްކަތްކުރަމުންދިޔަ 7 ބިދޭސީއަކު ފާހަގަކުރެވި، އެ މީހުން މިހާރު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.

ރާއްޖޭގައި ޤަވާއިދާ ޚިލާފަށް ވިޔަފާރިކޮށް، ވަޒީފާ އަދާކުރަމުންދާ ބިދޭސީން ހޯދައި، އެފަދަ ފަރާތްތަކާމެދު ފިޔަވަޅު އެޅުމަށް ސަރުކާރުން އިސްނަންގަވައިގެން ގުޅިފައިވާ މުއައްސަސާތަކުން ދަނީ މާލެ ސަރަޙައްދުގައި ސިލްސިލާކޮށް މިފަދަ ޚާއްޞަ އޮޕަރޭޝަންތައް ހިންގަމުންނެވެ.