ހައުސިން މިނިސްޓްރީ ތެރެއިން ނުއަގުގައި ބިމެއް ވިއްކިކަމަށް ސޯޝަލް މީޑިއާގައި ދައުރުވަމުންދާ ލިޔުމެއްގެ ހަޤީގަތް ހައުސިން މިނިސްޓަރު  ޑރ. އަބްދުﷲ މުއްތަލިބް ސާފް ކޮށްދެއްވައިފިއެވެ.

ސޯޝަލް މީޑިއާގައި ދައުރުވަމުންދާ އެ ލިޔުމުގައި ވާގޮތުން ހުޅުމާލެއިން ވިއްކި 1,250 އަކަފޫޓުގެ އެ ބިމަށް ޖެހިފައިވަނީ އަކަފޫޓަކަށް 375 ރުފިޔާއެވެ. ބިން ވިއްކި އަގެއްކަމަށް ވަނީ 468,750 ދިވެހި ރުފިޔާއެވެ.

މިކަމާ ގުޅިގެން ހައުސިން މިނިސްޓަރު ޑރ.މުއްތަލިބް ވިދާޅުވެފައިވަނީ ފައިސާގެ މުއާމަލާތެއް ހަމަޖެއްސުމަށް ފޮނުވި އެ މެމޯ ހަޤީޤަތް އޮޅޭގޮތަށް މައުލޫމާތު ފަތުރަމުންދާކަމަށެވެ. މިނިސްތަރު ވިދާޅުވީ އެ ލިޔުމުގައި ބުނާ ބިމަކީ އިންސާފް ނުލިބި 23 އަހަރުވީ މައްސަލައެއްގެ ލިޔުމެއް ކަމަށެވެ.

ހަގީގަތް ނުބަލައި އެ ލިޔުން ދައުރުކުރުމުގެ ސަބަބުން އިންސާފު ހޯދުމަށް 23 އަހަރު ވަންދެން މަސައްކަތް ކުރަމުންދިޔަ އުމުރުން ދުވަސްވީ އެ ފަރާތަށް މިކަމުގެ ސަބަބުން ނޭދެވޭ އަސަރުތަކެއް ކޮށްފައިވާކަން މިނިސްޓްރުގެ ޕޯސްޓްގައި ވަނީ ފާހަގަކޮށްފައެވެ.

މިނިސްޓަރުގެ ޕޯސްޓްގައި އިތުރަށް ބުނެފައިވަނީ މިކަމުގެ ހަގީގަތް ހާމަކޮށް މިއަދުގެ ވަގުތެއްގައި ހައުސިން މިނިސްޓްރީން ބަޔާނެއް ނެރޭނެ ކަމަށެވެ.