މާލެ ސަރަހައްދަށް ރޭ ޖެހުނު ގަދަ ވަޔާއެކު ސިނަމާލެ ބްރިޖު ކައިރިއަށް އޮޔާދިޔަ ތެޔޮ ބޯޓު ހާލުގައި ޖެހިފައި އޮންނަތާ އެތައް ދުވަހެއް ވެފައިވާ ކަމަށާއި، އެ ދެ ބޯޓަށް ބޭނުންކުރަމުން ދިޔައީ އެންމެ ނަގިއްޔެއް ކަމަށް އެނގިއްޖެއެވެ.

މި ހާދިސާ ހިނގާފައިވަނީ މާލެ ސަރަހައްދުގެ މޫސުން އާދަޔާ ޚިލާފަށް ގޯސްވެ، ޖެހުނު ބާރު ވަޔާއެކު ނަގިލި ކަހައިގެން ގޮހެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، މި ތެޔޮ ބޯޓު އުތުރު ފަރާތުން އޮޔާ އައިސް އެންމެ ފުރަތަމަ ޖެހުނީ ސިނަމާލެ ބްރިޖުގެ ތަނބެއްގައެވެ. ތަނބުގައި ޖެހުމުގެ ސަބަބުން ބޯޓަށް އެކި ވަރުގެ ގެއްލުންތައް ލިބިފައިވާއިރު، މި ހާދިސާގައި ބްރިޖަށް އެއްވެސް ގެއްލުމެއް ލިބުނުތޯ ކަމާބެހޭ ފަރާތްތަކުން މިހާރު ދަނީ ބަލަމުންނެވެ.

މި ދެ ބޯޓުގެ ހާލަތާ ގުޅޭގޮތުން ބޯޓުގެ ފަޅުވެރިން މިދިޔަ ޖުލައި މަހުގެ މެދުތެރޭގައި އާންމުކުރި ވީޑިއޯއެއްގައި ބުނެފައިވަނީ، "ކޭޖީ 1" އަދި "އޭއެލް 1" ނަމަކަށް ކިޔާ މި ދެ ބޯޓުގައި އިންޑިއާގެ 20 ފަޅުވެރިން (ކޭޖީ 1 ގައި 9 މީހުން އަދި އޭއެލް 1 ގައި 11 މީހުން) ތާށިވެފައިވާ ކަމަށެވެ. އެ މީހުން ތިބީ ކެއިންބުއިމަށް ބޭނުންވާ ތަކެއްޗާއި، ސާފު ބޯފެނާއި، ތެޔޮ އަދި އެހެނިހެން ޒަރޫރީ ސާމާނަށް އިންތިހާއަށް ޖެހި، އިންސާނީ ބޮޑު ކާރިސާއެއްގެ ތެރޭގައި ކަމަށްވެސް ބުނެފައިވެއެވެ.

ފަޅުވެރިން ހާމަކޮށްފައިވާ ގޮތުގައި، މި ދެ ބޯޓުގެ ތެރެއިން "ކޭޖީ 1" ގެ ނަގިލި ގެއްލިފައިވާއިރު، "އޭއެލް 1" ގެ ނަގިލީގެ ހާލަތު ވެސް ހުރީ ވަރަށް ދެރަކޮށެވެ. މޫސުން ގޯސްވެ، ނުރައްކާތެރި ހާލަތެއްގައި ނަގިލި އަޅައިގެން ތިބެން ޖެހުމުގެ ސަބަބުން އެ މީހުންގެ ފުރާނައަށާއި ކައިރީގައި ހުރި އެހެން އުޅަނދުފަހަރުގެ ސަލާމަތަށް ވެސް އޮތީ ބޮޑު ނުރައްކަލެއް ކުރިމަތިވެފައިވާ ކަމަށްވެސް ބުނެފައިވެއެވެ.

މި މައްސަލައާ ގުޅިގެން ނޭޝަނަލް ޔޫނިއަން އޮފް ސީފެއަރާސް އިންޑިއާ (NUSI) އިން ވަނީ އިންޓަނޭޝަނަލް މެރިޓައިމް އޯގަނައިޒޭޝަން (IMO)، އިންޓަނޭޝަނަލް ލޭބަރ އޯގަނައިޒޭޝަން (ILO)، އިންޓަނޭޝަނަލް ޓްރާންސްޕޯޓް ވޯކާސް ފެޑެރޭޝަން (ITF)، އިންޑިއާ ސަރުކާރު، މާލޭގައި ހުންނަ އިންޑިއާ ހައިކޮމިޝަން އަދި އެމްއެންޑީއެފް ކޯސްޓްގާޑަށް އެމީހުންނަށް އެހީވުމަށް އިލްތިމާސް ކޮށްފައެވެ. އެ ޔޫނިއަނުން އެދިފައިވަނީ މި 20 ފަޅުވެރިންނަށް ބޭނުންވާ އިންސާނީ އެހީތެރިކަން ވަގުތުން ފޯރުކޮށްދީ، އެ މީހުންގެ ރައްކާތެރިކަން ކަށަވަރުކުރުމަށެވެ. އަދި ނުލިބި ހުރި މުސާރަތައް ހޯދައިދީ، ވީ އެންމެ އަވަހަކަށް އެ މީހުން އަނބުރާ ޤައުމަށް ފޮނުވައިދިނުމުގެ އިންތިޒާމު ހަމަޖައްސައިދިނުމަށެވެ.

ބޯޓުތަކާ ގުޅޭގޮތުން ޤާނޫނީ ނުވަތަ އިދާރީ މައްސަލައެއް ހިނގަމުން ދިޔަ ނަމަވެސް، ކުށެއް ނެތް ފަޅުވެރިންނަށް ކާބޯތަކެއްޗާއި، ސާފު ބޯފެނާއި، ބޭސްފަރުވާއާއި ތެޔޮ ފަދަ ޒަރޫރީ ޚިދުމަތްތައް ހުއްޓުވައިގެން ނުވާނެ ކަމަށާއި، އަބަދުވެސް އެންމެ އިސްކަންދޭންވާނީ އިންސާނިއްޔަތުކަމަށް ކަމަށް އެ ޔޫނިއަނުން ފާހަގަކޮށްފައިވެއެވެ.

ފަޅުވެރިން ވީޑިއޯ މެދުވެރިކޮށް ބުނެފައިވަނީ، އެ މީހުންގެ ހާލަތު އިންތިހާއަށް ގޯސްވެ، ފުރާނައަށް ނުރައްކާވާނެ ކަމުގެ ބިރުހީވެފައިވާ ކަމަށެވެ. އަދި މި އިންސާނީ ކާރިސާ ކަނޑުމަތީގެ ބޮޑު ހިތާމަވެރި ހާދިސާއަކަށް ބަދަލުވުމުގެ ކުރިން، ކަމާބެހޭ ހުރިހާ ފަރާތްތަކުން ވަގުތުން ފިޔަވަޅު އަޅައިދިނުމަށް އެ މީހުން ވަނީ އާދޭހާއެކު ގޮވާލާފައެވެ.