ތަޢުލީމީ ދާއިރާގެ ތަޖުރިބާތައް ޙިއްޞާކޮށް، ކިޔަވައިދިނުމުގެ ފެންވަރު މަތިކުރުމުގެ މަޤްޞަދުގައި ބާއްވާ 8 ވަނަ އިންޓަރނޭޝަނަލް ޓީޗާސް ކޮންފަރަންސް (އައި.ޓީ.ސީ) މިއަދު ފަށައިފިއެވެ.

ހުޅުމާލޭ ޝަހީދު ޢަލީ ހިނގުމުގައި ހުންނަ ޝަހީދު ޢަލީ ސްކޫލްގައި މިފަހަރުގެ ކޮންފަރެންސް ފައްތަވައިދެއްވީ ނައިބުރައީސް އަލްއުސްތާޛް ހުސައިން މުހައްމަދު ލަތީފެވެ.

މިއީ ތަޢުލީމީ ދާއިރާގެ އެކި ދިރާސާތަކާއި އައު އީޖާދުތަކާ ގުޅޭގޮތުން މަޝްވަރާކުރުމަށް ކޮންމެ ދެ އަހަރަކުން އެއްފަހަރު ބާއްވަމުން އަންނަ ބައިނަލްއަޤްވާމީ ފެންވަރުގެ ކޮންފަރެންސެކެވެ. މި ކޮންފަރެންސް ސިލްސިލާކޮށް ރާއްޖޭގައި ބާއްވަން ފަށާފައިވަނީ 2012 ވަނަ އަހަރުން ފެށިގެންނެވެ.

މި ކޮންފަރެންސްގެ މައިގަނޑު މައުޟޫޢުތަކުގެ ތެރޭގައި އެންމެން ޝާމިލުކޮށްގެން ކިޔަވައިދިނުން (އިންކްލޫސިވް އެޑިއުކޭޝަން)، އާޓިފިޝަލް އިންޓެލިޖެންސް (އޭއައި) އަދި ޑިޖިޓަލް ޕެޑަގޮޖީގެ އިތުރުން ދިވެހި ބަހާއި އިސްލާމް ދީނުގެ މުހިންމު މައުޟޫޢުތައް ހިމެނެއެވެ.

މި ކޮންފަރެންސްގައި ރާއްޖެއާއި ބައިނަލްއަޤްވާމީ ފެންވަރުގެ ތަޢުލީމީ ޚިދުމަތްތެރިންނާއި އެކަޑަމިކް ބޭފުޅުން ތައްޔާރުކޮށްފައިވާ 60 އަށްވުރެ ގިނަ ރިސާޗް ޕޭޕަރު ހުށަހެޅުމަށް ވަނީ ހަމަޖެހިފައެވެ. ޚާއްޞަ ސެޝަންތަކުގެ ތެރޭގައި ތަޢުލީމީ ދާއިރާއަށް ޚާއްޞަ 4 ވޯކްޝޮޕަކާއި، 2 ޕެނަލް ޑިސްކަޝަން އަދި ކީނޯޓް 2 ސްޕީޗް ހިމެނެއެވެ. މީގެ އިތުރުން މިފަހަރުގެ ޓީޗާސް ކޮންފަރެންސްގައި އިސްކަންދެވޭ މައިގަނޑު ދާއިރާތަކުގެ ތެރޭގައި ދަރިވަރުން ޝާމިލުކޮށްގެން ކިޔަވައިދޭނެ އުކުޅުތަކާއި، ކްލާސްރޫމްތަކުގައި ޒަމާނީ ޓެކްނޮލޮޖީ ބޭނުންކުރުމުގައި ވިސްނަންޖެހޭ މުހިންމު ކަންކަމުގެ އިތުރުން ކޯޑިންގ އަދި ރޮބޮޓިކްސް ފަދަ ޒަމާނީ އަދި އައު ދާއިރާތަކަށް އަލިއަޅުވާލުން ހިމެނެއެވެ.

މި ކޮންފަރެންސްގެ ސަބަބުން ކިޔަވައިދިނުމުގެ ދާއިރާގައި ހަރަކާތްތެރިވާ ފަރާތްތަކަށް ބައިނަލްއަޤްވާމީ ފެންވަރުގެ އައު މައުލޫމާތާއި، ކިޔަވައިދިނުމުގެ ޒަމާނީ އުކުޅުތައް ދަސްވެ، ރާއްޖޭގެ ތަޢުލީމީ ނިޒާމު އިތުރަށް ހަރުދަނާކުރުމަށް ބޮޑު އެހީތެރިކަމެއް ލިބިގެންދާނެ ކަމަށް ތައުލީމާ ބެހޭ ވުޒާރާއިން ބުނެއެވެ.