ސިނަމާލެ ބްރިޖް ކައިރިއަށް އުރުނު ބޭރުގެ އުޅަނދުތަކުގެ މައްސަލަ މީގެ ކުރިން އެ ކޮމިޝަނުގެ ސަމާލުކަމަށް އައިސްފައިވާ ކަމަށާއި، އެ މައްސަލައިގައި ބޯޓުގެ ފަޅުވެރިންނަށް އެހީތެރިކަން ފޯރުކޮށްދީފައިވާނެ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ބުނެފިއެވެ.

އެޗްއާރުސީއެމުން ބުނީ މި މައްސަލައަކީ މިއަހަރުގެ ޖުލައި މަހުގެ ތެރޭގައި އެ ކޮމިޝަނުގެ ސަމާލުކަމަށް އައިސްގެން ބަލަމުން ގެންދާ މައްސަލައެކެވެ. އެގޮތުން މި މައްސަލަ ކޮމިޝަނަށް ހުށަހެޅުނީ އެ އުޅަނދުގައި ބޯފެނާއި، ކާތަކެއްޗާއި އަދި އެހެނިހެން އަސާސީ ސާމާނު ހުސްވެފައިވާ ކަމަށް ބުނެ އެ އުޅަނދުގެ ފަޅުވެރިންގެ ފަރާތުން ކަމަށް އެޗްއާރުސީއެމުން ބުންޏެވެ.

މި ޝަކުވާއާ ގުޅިގެން، އުޅަނދުގައި ތިބި ފަޅުވެރިންގެ ޞިއްޙީ ޙާލަތާއި، ކެއިންބުއިމުގެ އިންތިޒާމުތަކުގެ އިތުރުން އެހެނިހެން އަސާސީ ބޭނުންތައް ފުރިހަމަވެފައިވޭތޯ އެ ކޮމިޝަނުން ވަގުތުން ބެލިކަމަށް ބުންޏެވެ.

މީގެ އިތުރުން، އެ ފަރާތްތަކަށް ބޭނުންވާ އިންސާނީ އެހީތެރިކަން ފޯރުކޮށްދިނުމަށާއި، އެމީހުންގެ ޙައްޤުތައް ކަށަވަރުކުރުމަށްޓަކައި ކަމާބެހޭ މުއައްސަސާތަކާ ގުޅިގެން ގިނަ މަސައްކަތްތަކެއް ކޮށްފައިވާ ކަމަށްވެސް އެޗްއާރުސީއެމުން ބުންޏެވެ. އެގޮތުން ދިވެހި ފުލުހުންގެ ޚިދުމަތާއި، މޯލްޑިވްސް ކަސްޓަމްސް ސަރވިސް އަދި އެ އުޅަނދަށް ރާއްޖެއިން ކަނޑައަޅާފައިވާ އެޖެންޓާ ގުޅިގެން، ޖުލައި މަހުގެ ތެރޭގައި ފަޅުވެރިންނަށް ބޭނުންވާ އެހީތެރިކަން ފޯރުކޮށްދީފައިވާ ކަމަށް އެ ކޮމިޝަނުން ވަނީ ޔަގީންކޮށްދީފައެވެ.