ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ބުރު ސްޕޯޓްސް ކްލަބްގެ މައްޗަށް 3-1 ގެ ނަތީޖާއަކުން ކާމިޔާބު ހޯދައި، ކްލަބް އީގަލްސް އިން މި ފަހަރުގެ ސީޒަނުގެ ފެށުން ރަނގަޅު ކޮށްފިއެވެ.
ގަލޮޅު ރަސްމީ ދަނޑުގައި ކުޅުނު މި މެޗުގައި އީގަލްސްގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ ފުރަތަމަ ލަނޑު ޖަހައި އެ ޓީމަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ އާމިރު އެލް އެވެ. އޭގެ ފަހުން، ފުރަތަމަ ހާފު ނިމުމުގެ ކުރިން ޒައިން ވަނީ ލަނޑެއް ކާމިޔާބުކޮށް އީގަލްސްގެ ލީޑު ފުޅާކޮށްދީފައެވެ.
ދެވަނަ ހާފުގެ ކުޅުން ފެށިތަނާހެން ބުރު ސްޕޯޓްސް ކްލަބުން ވަނީ ކުޅުން ރަނގަޅުކޮށް، މެޗުގެ ތެރެއަށް އެނބުރި އައުމަށް މަސައްކަތް ކޮށްފައެވެ. އެގޮތުން، އެ ޓީމުގެ މުހައްމަދު ޒިދާން ވަނީ ލަނޑެއް ޖަހައި، ނަތީޖާގެ ފަރަގު ކުޑަކޮށްދީ އެ ޓީމަށް އުއްމީދު އާކޮށްދީފައެވެ. ނަމަވެސް، އީގަލްސް އިން ވަނީ އިތުރަށް ވިސްނުންތެރިކަމާއެކު ކުޅެ މެޗުގެ ކޮންޓްރޯލް ހޯދާފައެވެ.
އީގަލްސް އާއި ބިސްބުރު ބައްދަލުކުރިމެޗްގެ ތެރެއިން.. ފޮޓޯ: ދިވެހި ޕްރިމިއާ ލީގް
އީގަލްސް އަށް މި މެޗުން ތިން ޕޮއިންޓް ކަށަވަރުކޮށްދިން ތިންވަނަ ލަނޑު މެޗުގެ ފަހުކޮޅު ކާމިޔާބުކޮށްދިނީ ތަޖުރިބާކާރު މިޑްފީލްޑަރު އިސްމާއިލް އީސަ (މެސީ) އެވެ.
މި މެޗުން ބަލިވި ނަމަވެސް، ލީގުގައި ބުރު ސްޕޯޓްސް ކްލަބަށް ކުރިއަށް ދެން އޮތީ މުހިންމު މެޗެކެވެ. އެ މެޗުގައި އަންނަ ބްރާސްފަތި ދުވަހު އެ ޓީމު ނުކުންނާނީ ޓީސީ ސްޕޯޓްސް ކްލަބާ ދެކޮޅަށެވެ.
Advertisement
This content is created and paid for by advertisers and does not involve Voice Journalists
