ރާއްޖޭގައި މި ދުވަސްވަރު އަރިދަފުސް ރޯގާ، ހޮޑުލުން އަދި ބޭރަށްހިންގުމުގެ ކޭސްތައް އިތުރުވަމުންދާތީ، އެކަމަށް ސަމާލުވެ ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން ބުނީ ކެއްސުމާއި، އަރިދަފުސް ރޯގާ، ހުން އައުން އަދި ކަރުގައި ރިއްސުން ފަދަ އަލާމާތްތަކަކީ އިންފްލުއެންޒާ ނުވަތަ ކޮވިޑް-19 ފަދަ ވައިރަސްތަކުގެ ސަބަބުން ދިމާވާ ކަންކަން ކަމަށެވެ. އަދި ބޭރަށްހިންގުމާއި ހޮޑުލުން ފަދަ އުނދަގޫތައް އާންމުކޮށް 3 ނުވަތަ 4 ދުވަހުގެ ތެރޭގައި ރަނގަޅުވާ ކަމަށާއި، އާދައިގެ ހާލަތްތަކުގައި ގޭގައި ފަރުވާ ހޯދިދާނެ ކަމަށް ވެސް އެ އެޖެންސީން ފާހަގަކުރެއެވެ.

މިފަދަ ބަލިތަކުން ރައްކާތެރިވުމަށާއި، ބަލި ޖެހިއްޖެނަމަ ގޭގައި ފަރުވާ ދިނުމަށް އެޗްޕީއޭއިން ވަނީ މުހިންމު އިރުޝާދުތަކެއް ދީފައެވެ. އެގޮތުން:

- ގިނަގިނައިން ލޮނުޕެކެޓް، ފެން، ސޫޕް އަދި އެހެނިހެން ދިޔާތަކެތި މަދު މިންވަރަކުން ގިނަގިނައިން ބޭނުންކުރުން.

- ކުޑަކުދިންނަށް ގާތުން ކިރުދިނުން މެދުނުކަނޑައި ކުރިއަށް ގެންދިއުމާއި، އާންމުކޮށް ކާ ކާނާ ބޭނުންކުރުން.

- ހުން އައުމާއި ހަށިގަނޑުގައި ރިއްސާތީ ޕެރަސެޓަމޯލް ބޭނުންކުރުން އަދި ރަނގަޅަށް އަރާމުކުރުން.

- ސައިބޯނި ލައިގެން ގިނަގިނައިން ރަނގަޅަށް އަތްދޮވުން، ހާއްސަކޮށް ފާޚާނާ ކުރުމަށްފަހު އަދި ކާބޯތަކެތި ތައްޔާރުކުރުމުގެ ކުރިން.

- ފާޚާނާ ބޭނުންކުރުމަށްފަހު ރަނގަޅަށް ސެނިޓައިޒްކޮށް ސާފުކުރުން.

- އަރިދަފުސް ރޯގާގެ އަލާމާތެއް ހުރިނަމަ މާސްކު އެޅުމާއި، ބަލިވެ އުޅޭނަމަ މީހުން އެއްވާ ތަންތަނަށް ނުގޮސް ގޭގައި މަޑުކުރުން.

- ބަލީގެ އަލާމާތްތައް ނުފެންނަތާ އެއް ދުވަސް ވަންދެން ކުދިން ސްކޫލަށް ނުފޮނުވުމާއި ވަޒީފާއަށް ނުނިކުމެ ގޭގައި މަޑުކުރުން.

އެޗްޕީއޭއިން އިތުރަށް ބުނީ ނޭވާލާން އުނދަގޫވުން، ދިޔާތަކެތި ބޭނުން ނުކުރެވުން، ހަށިގަނޑުން ފެން މަދުވުމުގެ އަލާމާތްތައް ފެނުން (ކުޑަކަމުދެވޭ މިންވަރު މަދުވުން، ތަލި ހިކުން ފަދަ)، ބޮޑުކަމުދާއިރު ލޭ ފެނުން، ގަދައަށް ބަނޑުގައި ރިއްސުން ނުވަތަ މާގަދައަށް ހުން އައުން ފަދަ ނުރައްކާތެރި އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށެވެ.

ހާއްސަކޮށް ތުއްތުކުދިންނާއި، އުމުރުން ދުވަސްވީ މީހުން، މާބަނޑު މީހުން އަދި ދާއިމީ ބަލިތައް ތަހައްމަލުކުރާ މީހުންގެ ދިފާއީ ނިޒާމު ބަލިކަށިވާނެތީ، އެފަދަ ފަރާތްތަކަށް މި ދުވަސްވަރު އިތުރަށް ސަމާލުކަން ދިނުމަށް އެޗްޕީއޭއިން ވަނީ އެދިފައެވެ.