ބޭރުގެ ޓެކްނޮލޮޖީ ކުންފުނިތަކަށް ބަރޯސާވުން ކުޑަކޮށް، ޑިޖިޓަލް މިނިވަންކަން (ޑިޖިޓަލް ސޮވަރިންޓީ) ކަށަވަރުކުރުމުގެ ގޮތުން، ސަރުކާރުގެ އިދާރާތަކުގައި އޯޕަން ސޯސް ސޮފްޓްވެއާ ބޭނުންކުރުމަށް ސްވިޒަލޭންޑް ސަރުކާރުން 11 މިލިއަނަށް ވުރެ ގިނަ އެމެރިކާ ޑޮލަރު (9 މިލިއަން ސްވިސް ފްރޭންކް) ޚަރަދުކުރުމަށް ފާސްކޮށްފިއެވެ.

ސްވިޒަލޭންޑުގެ ފެޑެރަލް ކައުންސިލުން ފާސްކުރި މި މަޝްރޫޢުގެ ދަށުން، ސަރުކާރުގެ 3،000 ކޮމްޕިއުޓަރުގައި އޯޕަން ސޯސް ސުއިޓެއް ކަމަށްވާ "އޯޕަންޑެސްކް" ޤާއިމުކުރެވިގެންދާނެއެވެ. މި ނިޒާމު ކުރިއަށް ގެންދިއުމަށް ހަމަޖެހިފައިވަނީ މިހާރު ބޭނުންކުރަމުންދާ "މައިކްރޯސޮފްޓް 365" އެއްކޮށް ހުއްޓާލުމުގެ ބަދަލުގައި، އޭގެ ބެކަޕް ނުވަތަ އިތުރު އިޚްތިޔާރެއްގެ ގޮތުގައެވެ.

"ބޮސް"ގެ ނަމުގައި ފެޑެރަލް ޗާންސެލަރީން ކުރިއަށްގެންދާ މި ޕްރޮގްރާމަކީ ސްވިޒަލޭންޑް ސަރުކާރުގެ މުވައްޒަފުން ބޭނުންކުރާ ޖުމްލަ 54،000 ވޯކްސްޓޭޝަންގެ ގާތްގަނޑަކަށް 7 އިންސައްތައެވެ. މި މަޝްރޫޢުގެ ޢަމަލީ މަސައްކަތް 2027 ވަނަ އަހަރުގެ ކުރީކޮޅު ފަށައި، އެ އަހަރުގެ ނިޔަލަށް ނިޒާމު ފުރިހަމައަށް ބޭނުންކުރަން ފެށުމަށް ވަނީ އަމާޒުހިފާފައެވެ. ސަރުކާރުގެ ހުރިހާ ދާއިރާތަކަކަށް މި ބަދަލު ގެންނާނީ 2027 ވަނަ އަހަރުގެ ޓެސްޓު މަރުޙަލާގެ ނަތީޖާއަށް ބެލުމަށްފަހުގައެވެ.

ޖަރުމަނުގެ "ޒެންޑިސް"އިން ތަރައްޤީކޮށްފައިވާ "އޯޕަންޑެސްކް" އަކީ އީމެއިލް، ފައިލް ސްޓޯރޭޖް، ވީޑިއޯ ކޮންފަރެންސް އަދި ޗެޓް ކުރުމަށް ޚާއްޞަ އެތައް އޯޕަން ސޯސް ޓޫލްތަކެއް އެކުލެވޭ ފުރިހަމަ ޕެކޭޖެކެވެ. ސިވިލް އިދާރާތަކުގައި މި މަސައްކަތް މަޑުމަޑުން ކުރިއަށްދާއިރު، ސްވިޒަލޭންޑުގެ އަސްކަރިއްޔާ (ސައިބާ ކޮމާންޑް) އިން ވަނީ އޮކްޓޫބަރު މަހުގެ ނިޔަލަށް މައިކްރޯސޮފްޓް ބޭނުންކުރުން އެއްކޮށް ހުއްޓާލައި، އޯޕަންޑެސްކަށް ބަދަލުވާން ނިންމާފައެވެ.

ސްވިޒަލޭންޑުން މިފަދަ ބަދަލެއް ގެންނަން ނިންމި މައިގަނޑު ސަބަބުތަކުގެ ތެރޭގައި، އެމެރިކާގެ ކުންފުނިތަކަށް ބަރޯސާވުމުން ޑޭޓާގެ ރައްކާތެރިކަމަށް އޮތް ނުރައްކާތައް ކުޑަކުރުމާއި، އަހަރުން އަހަރަށް މައިކްރޯސޮފްޓްގެ އަގުތައް އިންތިހާއަށް އުފުލެމުން ދިއުން ހިމެނެއެވެ. އަދި މިއީ 2024 ވަނަ އަހަރު ސްވިޒަލޭންޑުގައި ޢަމަލުކުރަން ފެށި "އެމްބެގް" ޤާނޫނުގެ ދަށުން، ސަރުކާރުގެ ޑިޖިޓަލް މިނިވަންކަން ޤާއިމުކުރުމަށް އެޅުނު މުހިންމު ފިޔަވަޅެކެވެ.

މި ޓެސްޓް މަރުޙަލާ ކާމިޔާބުވެއްޖެނަމަ، މުޅި ސަރުކާރުގެ ހުރިހާ އިދާރާތަކެއް އޯޕަން ސޯސްއަށް ބަދަލުކުރުމަކީ ޔޫރަޕްގެ ތާރީޚުގައިވެސް މައިކްރޯސޮފްޓާ ދުރަށް ޖެހުމަށް ސަރުކާރަކުން އަޅާ އެންމެ ބޮޑު އެއް ފިޔަވަޅަށް ވެގެންދާނެއެވެ.