ސުޕްރީމް ކޯޓުގެ ފުރާޅުން ޓިނު ނަގައިގެން އެމަނިކުފާނު ފަނޑިޔާރުންނަށާއި ސިޔާސީންނަށް އަނިޔާވެރިވި ކަމަށް ބުނެ ދައްކަމުންދާ ވާހަކަތަކަށް ކުރީގެ ރައީސުލްޖުމްހޫރިއްޔާ ޢަބްދުالله ޔާމީން ޢަބްދުލްޤައްޔޫމް ވަރުގަދަ ރައްދެއް ދެއްވައިފިއެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން ބޭއްވި ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން އެމަނިކުފާނު ވަނީ އެރޭ ހިނގައިދިޔަ ކަންކަމުގެ ތަފްސީލު ހާމަކުރައްވާފައެވެ.
2018 ވަނަ އަހަރުގެ ފެބްރުއަރީ މަހުގެ އެއްވަނަ ދުވަހު ސުޕްރީމް ކޯޓުން ނެރުނު އަމުރާ ގުޅިގެން ހިނގައިދިޔަ ކަންކަމަށް އިޝާރާތް ކުރައްވައި ރައީސް ޔާމީން ވިދާޅުވީ، ޤާނޫނާ ޚިލާފަށް އެއްވެސް ކަމެއް ނުކުރައްވާ ކަމަށާއި އެމަނިކުފާނު މަސައްކަތް ކުރެއްވީ އިންސާފު ޤާއިމުކުރެއްވުމަށް ކަމަށެވެ. އަދި ސިޔާސީ ގޮތުން އެއްވެސް ބޭފުޅަކު ހައްޔަރުކޮށް އަނިޔާވެރިވެފައި ނުވާނެ ކަމަށްވެސް އެމަނިކުފާނު ވިދާޅުވިއެވެ.
އެގޮތުން ރައީސް ޔާމީން ވިދާޅުވީ، ކުރީގެ ރައީސް މުޙައްމަދު ނަޝީދާއި، ޤާސިމް އިބްރާހީމާއި، ޝައިޚް ޢިމްރާން ޢަބްދުالله ހިމެނޭހެން ސިޔާސީ ބޭފުޅުން ޖަލަށްލާފައި ތިބީ ޝަރުޢީ ތިން މަރުޙަލާ ނިމިގެން ކަމަށެވެ. އަދި އެއީ ޤާނޫނާ އެއްގޮތަށް ނިމިފައިވާ މައްސަލަތަކެއް ކަމަށާއި، ފަހުން ސުޕްރީމް ކޯޓުން ނެރުނު އަމުރުގައި އެ މައްސަލަތައް ކުރިން ނިންމީ އަވަސްއަރުވާލައިގެން ކަމަށް ބުނެފައި އޮތުމަކީ ޢަދުލުވެރިކަމެއް ނޫން ކަމަށްވެސް އެމަނިކުފާނު ވިދާޅުވިއެވެ.
މީގެއިތުރުން، އެރޭ ސިފައިންނާއި ފުލުހުން ސުޕްރީމް ކޯޓަށް ވަދެގަތް ހާދިސާއާ ގުޅިގެން ރައީސް ޔާމީން ވިދާޅުވީ، އެކަން ކުރީ ސިޔާސީ ބޭނުމެއްގައި ނޫން ކަމަށެވެ.
”ސުޕްރީމް ކޯޓުގެ ޓިނު ނަގައިގެން ފަނޑިޔާރުން ނެރެގެން އެކަން ކުރީކީ އެއްގޮތަކަށް ސިޔާސީ ކަމެއް ނޫން. އެކަން ދިމާވީ ކިހިނެއްވެގެންތޯ ދެނެގަންނަން އަޅުގަނޑު ކުރި މަސައްކަތުގައި އަޅުގަނޑަށް މިއަންނަނީ މެސެޖުތަކެއް. ހަމަ އެރޭ އެމްއެންޑީއެފް އެކަން ހިންގަމުން ދިޔައިރު އަޅުގަނޑު ފޯނަށް އަންނަ ފެށީ މެސެޖުތަކެއް. ތަފްސީލާއެކީ، ހުއްޖަތާއެކީ.“
ރައީސް ޔާމީން.
މިއާއެކު ޔާމީން ވިދާޅުވީ، ސުޕްރީމް ކޯޓުގެ އޭރުގެ އުއްތަމަ ފަނޑިޔާރު ޢަބްދުالله ސަޢީދާއި ފަނޑިޔާރު ޢަލީ ޙަމީދު ފުލުހަށް ހާޒިރުކުރަން ޖެހުނީ އެބޭފުޅުން ނެރުއްވި އަމުރަކާ ގުޅިގެން ނޫން ކަމަށެވެ. އެގޮތުން އެ ދެ ފަނޑިޔާރުންނަށް ލިބިވަޑައިގަންނަވާ އާމްދަނީއާ ނުބައްދަލު މުއްސަނދިކަން ހުރި ކަމުގެ ތުހުމަތުތަކެއް ފުލުހުންނަށް ހުށަހެޅިފައިވާ ކަމަށް އެމަނިކުފާނު ފާހަގަކުރެއްވިއެވެ.
”އަބްދުالله ސައީދަށް މީ މެލޭޝިއާގެ ދެ ފްލެޓް. އަލީ ހަމީދަށް މެލޭޝިއާގެ މިތައް ފްލެޓް. މީ ގެންދެވިފައި މިއޮތީ، ޖާމިނުވެފައި މިއޮތީ މިއެނި ކުންފުންޏަކުން މިއެނި މީހެއްގެ ދަރިއެކޭ. އެހެންވީމަ އެއްކަންކަމަށް ބިނާކޮށްފަ ޢަލީ ޙަމީދާ ޢަބްދުالله ސަޢީދާ ގެންދެވީ އެ މީހުންނަށް ދެވޭ ޢާމްދަނީއާ ނުބައްދަލު ހޭދައެއް ކުރި ކަމެއްގައިކަންތޯ ސުވާލުކުރަން ޕޮލިސްއަށް ހާޒިރުކުރީ. އެއް ގޮތަކަށްވެސް އެބޭފުޅުން ކުރި އަމުރާ ގުޅޭ ކަމެއް ނޫން،“
ރައީސް ޔާމީން.
ރައީސް ޔާމީން އިތުރަށް ވިދާޅުވީ، ސުޕްރީމް ކޯޓުގައި ތަޅުއެޅުވި ކަމަށް ބުނެ ދައްކަނީ ސިޔާސީ ވާހަކަތަކެއް ކަމަށާއި، ފަނޑިޔާރުންނާ މެދު ޢަމަލުކުރާނެ އުޞޫލުތައް ޤާނޫނުއަސާސީގައި ސާފުކޮށް ބަޔާންކޮށްފައިވާ ކަމަށެވެ. އަދި ފަނޑިޔާރުންގެ ސުލޫކީ މައްސަލައެއް ނުވަތަ ކުށުގެ ތުހުމަތެއް އޮތްނަމަ އެކަމެއް ތަޙުޤީޤު ކުރެވެން ޖެހޭނެ ކަމަށްވެސް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
