ސިޔާސީ މައިދާނުގައި ޒިންމާދާރުކަން ކުޑަ ޢަމަލުތައް ހިންގައި ޤައުމުގައި ހަމަނުޖެހުން އުފެއްދުމަށް ޕީއެންސީގެ ބަދަހި ލަޝްކަރުން ޖާގަ ދީގެން ނުވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ސޯޝަލް ސެންޓަރުގައި ބޭއްވި ޕީއެންސީގެ މަތީ މަޖިލީހުގެ ޖަލްސާގައި ވާހަކަފުޅު ދައްކަވަމުން އެ ޕާޓީގެ ރައީސް ޑރ. މުޢިއްޒު ވިދާޅުވީ ޕީއެންސީގެ އަސާސީ ފަލްސަފާ ބިނާވެފައި އޮންނަނީ ހަމަޖެހުމާއި ތަރައްޤީ އަދި ރައްކާތެރިކަމުގެ މައްޗަށް ކަމަށެވެ. ރިޔާސީ މެނިފެސްޓޯ އާއި ސަރުކާރުގެ ސިޔާސަތުތައް ވެސް ގުޅިލާމެހެނީ މި ތިން ކަމާ ކަން އެމަނިކުފާނު ފާހަގަކުރެއްވިއެވެ. ހަމައެއާއެކު ޚާރިޖީ ސިޔާސަތުގައި ވެސް އެންމެ ފުރަތަމަ އިސްކުރައްވަނީ ދިވެހި ޤައުމު ކަމަށް ވިދާޅުވިއެވެ.
"އަޅުގަނޑުމެންނަކީ ޒިންމާދާރު ސިޔާސީ ޕާޓީއެއް އަޅުގަނޑުމެން އިސް ކުރަނީ ހަމަ ޔަގީނުން ވެސް ގައުމު. އަޅުގަނޑުމެންގެ އަމިއްލަ ނޫނީ ވަކި މީހެއްގެ މަސްލަހަތެއް ނޫން އިސްކުރަނީކީ. އަޅުގަނޑުމެން އިސް ކުރަނީ ގައުމު. ގައުމިއްޔަތު. ދީނާއި އަޅުގަނޑުމެންގެ ސަގާފަތާއި އަޅުގަނޑުމެންގެ އަމިއްލަވަންތަކަން."
ރައީސް މުޢިއްޒު
ރާއްޖޭގެ ސިޔާސީ މައިދާނުގައި ކަންކަން ހިނގަމުންދާ ގޮތާ މެދު ކަންބޮޑުވުން ފާޅުކުރައްވައި ރައީސް ވިދާޅުވީ އެއްވެސް އިމެއް ނެތި ޒިންމާދާރުކަން ކުޑަ ގޮތުގައި ޢަމަލުކުރާ ތަން ފެންނަ ކަމަށެވެ.
"އެއްވެސް ކަހަލަ އިމެއް ނެތް ގޮތަށް ގައުމުގައި ހަމަޖެހުން އުފެއްދުމަށް، އެކި ކަހަލަ ކަންކަމުގައި ޒިންމާދާރު ކަން ކުޑަ ގޮތުގައި ކަންތައްތައް ކުރާ ތަން ފެނޭ. އެކަހަލަ އެއްވެސް ކަންކަމަކަށް އަޅުގަނޑުމެންގެ މި ބަދަހި ލަޝްކަރުގެ ތެރެއަށް ފުރުސަތު ދީގެން ނުވާނެ،"
ރައީސް މުޢިއްޒު
ރައީސް ވިދާޅުވީ، ޕީއެންސީއަކީ ޒިންމާދާރު ސިޔާސީ ޕާޓީއެއް ކަމަށާއި އެއްވެސް އަމިއްލަ ވަކި ބޭފުޅެއްގެ ނުވަތަ ވަކި މީހެއްގެ މަޞްލަޙަތު އެ ޕާޓީން އިސްނުކުރާނެ ކަމަށެވެ. އަދި ޕާޓީގެ މެންބަރުން އެއް ރޫޙެއްގައި ބަދަހި ގުޅުމެއް ބާއްވައިގެން ކޮންގްރެސްގެ ކަންކަން ކުރިއަށް ގެންދެވުމަށް ވެސް އެމަނިކުފާނު އިލްތިމާސްކުރެއްވިއެވެ.
"ގައުމުގެ ކަންކަން ކުރުމުގައި ޕާޓީގެ ދައުރު ފުޅާކޮށް، އިތުރުކޮށް ޕާޓީގެ ހުރިހާ ގުނަންތަކެއް އެކުގައި މަސައްކަތްކޮށް، ޕާޓީގެ ހުރިހާ މެމްބަރުން އެއް ރޫހެއްގައި އެއް އާއިލާއެއްގެ ގޮތުގައި މަސައްކަތް ކުރުމަށް އަޅުގަނޑުމެން މިތަނަށް އައިސް މި ތިބީ،"
ރައީސް މުޢިއްޒު
2023 ވަނަ އަހަރުގެ ނޮވެމްބަރު 17 ގައި ޕީއެންސީގައި ތިބީ 3000 މެންބަރުން ކަމަށް ވީ ނަމަވެސް މިހާރު އެ ޢަދަދު ގާތްގަނޑަކަށް 80000 އަށް އިތުރުވެފައިވާ ކަމަށް ރައީސް ވިދާޅުވިއެވެ. ރާއްޖޭގައި އޮތް އެންމެ ބޮޑު ސިޔާސީ ޕާޓީގެ ގޮތުގައި ޕީއެންސީ ކުރިއަށް ދާއިރު މި ކާމިޔާބީ އެމަނިކުފާނު ސިފަކުރެއްވީ މެންބަރުން ޕާޓީ ވަރުގަދަކުރުމަށް ކުރައްވާ މަސައްކަތުގެ ނަތީޖާގެ ގޮތުގައެވެ.
Advertisement
This content is created and paid for by advertisers and does not involve Voice Journalists
