ކޮމިޝަނާ އޮފް ސްޕޯޓްސްގެ މަގާމުގައި ހުންނެވި މުޙައްމަދު ޠަލާލް އެހެން މަގާމަކަށް ބަދަލުކުރެއްވުމާ ގުޅިގެން، އެ އޮފީސް ހިންގުމުގެ އެންމެހައި ޒިންމާތައް ވަގުތީ ގޮތުން ޑެޕިއުޓީ ސްޕޯޓްސް ކޮމިޝަނަރު މުޙައްމަދު ހާނިމްއާ ހަވާލުކޮށްފިއެވެ.
މި ބަދަލު ގެންނަން ޖެހުނީ، ސްޕޯޓްސް ކޮމިޝަނަރުގެ މަގާމުގައި ހުންނެވި ގ. ފިނިވިލު، މުޙައްމަދު ޠަލާލް، ރައީސުލްޖުމްހޫރިއްޔާގެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް ފޯ ޓާޝަރީ ހެލްތު ސާވިސަސްގެ މަގާމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ އައްޔަން ކުރެއްވުމާ ގުޅިގެންނެވެ.
މިނިސްޓަރު ފެންވަރުގައި ޠަލާލް ސްޕޯޓްސް ކޮމިޝަނަރުގެ މަގާމަށް އައްޔަން ކުރެއްވީ ނޮވެމްބަރު 2023 ގައެވެ. އަދި ރައީސް އޮފީހުގެ އާ މަގާމަށް ވެސް އޭނާ ހަމަޖައްސަވާފައި ވަނީ މިނިސްޓަރު ފެންވަރުގައެވެ.
ސްޕޯޓްސް ކޮމިޝަނަރުގެ އޮފީސް ވަގުތީ ގޮތުން ހިންގެވުމާ ހަވާލުވެވަޑައިގެންނެވި މުޙައްމަދު ހާނިމް އަކީ މި އަހަރުގެ ކުރީކޮޅު ޑެޕިއުޓީ ސްޕޯޓްސް ކޮމިޝަނަރުގެ މަގާމަށް އައްޔަން ކުރައްވާފައިވާ ބޭފުޅެކެވެ.
ހާނިމް އަކީ ރާއްޖޭގެ ކުޅިވަރުގެ އިދާރީ ދާއިރާގައި ގިނަ ދުވަސްތަކެއް ވަންދެން އަގުހުރި ޚިދުމަތްތަކެއް ކުރައްވާފައިވާ ތަޖުރިބާކާރު ބޭފުޅެކެވެ.
އެގޮތުން، އެތުލެޓިކްސް އެސޯސިއޭޝަނާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީކަމުގެ އިތުރުން އެފްއޭއެމްގެ އެގްޒެކެޓިވް ކޮމިޓީގެ މެންބަރުކަން ވެސް އޭނާ ވަނީ އަދާކުރައްވައިފައެވެ. މީގެއިތުރުން، ދިވެހިރާއްޖެއިން 2008 ވަނަ އަހަރު ސާފް ޗެމްޕިއަންޝިޕް ކާމިޔާބުކުރި ތާރީޚީ ގައުމީ ފުޓްބޯޅަ ޓީމުގެ މެނޭޖަރަކީ ވެސް ހާނިމްއެވެ.
Advertisement
This content is created and paid for by advertisers and does not involve Voice Journalists
