ދީނީ އަދި ދިފާޢީ ދާއިރާއިން އެއްބާރުލުން އިތުރުކުރުމުގެ ގޮތުން ދިވެހިރާއްޖެއާއި މެލޭޝިއާއާ ދެމެދު މުހިންމު ފަހުމުނާމާ (އެމްއޯޔޫ) ތަކެއްގައި މިއަދު ސޮއިކޮށްފިއެވެ.
މި އެމްއޯޔޫތަކުގައި ސޮއިކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަޢުވަތަކަށް މެލޭޝިއާގެ ބޮޑުވަޒީރު އަންވަރު އިބްރާހިމް މިހާރު ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.
އެމްއޯޔޫތަކުގައި ސޮއިކުރުން އޮތީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްޞަ ރަސްމިއްޔާތެއްގައެވެ.
މިއަދުގެ ރަސްމިއްޔާތުގައި ސޮއިކުރެވުނު މައިގަނޑު ދެ އެއްބަސްވުމަކީ:
1) ދިފާޢީ ދާއިރާއިން އެއްބާރުލުން އިތުރުކުރުމުގެ އެއްބަސްވުން (މެމޮރެންޑަމް އޮފް އަންޑަސްޓޭންޑިން ބިޓްވީން ދަ ރިޕަބްލިކް އޮފް މޯލްޑިވްސް އެންޑް ދަ ގަވަމެންޓް އޮފް މެލޭޝިއާ އޮން ޑިފެންސް ކޯޕަރޭޝަން)
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ޑިފެންސް ހަސަން ރަޝީދެވެ. އަދި މެލޭޝިއާ ސަރުކާރުގެ ފަރާތުން ސޮއިކުރެއްވީ އެ ޤައުމުގެ މިނިސްޓަރ އޮފް އިންވެސްޓްމަންޓް، ޓްރޭޑް އެންޑް އިންޑަސްޓްރީ ޖިހާރީ ބިން ޢަބްދުލް ޣަނީއެވެ.
2) އިސްލާމީ ކަންތައްތަކާ ގުޅޭގޮތުން އެއްބާރުލުން ދިނުމުގެ އެއްބަސްވުން (މެމޮރެންޑަމް އޮފް އަންޑަސްޓޭންޑިން ބިޓްވީން ދަ ރިޕަބްލިކް އޮފް މޯލްޑިވްސް އެންޑް ދަ ގަވަމެންޓް އޮފް މެލޭޝިއާ އޮން ކޯޕަރޭޝަން އިން ދަ ފީލްޑް އޮފް އިސްލާމިކް އެފެއާޒް)
މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދެވެ. މެލޭޝިއާ ސަރުކާރުގެ ފަރާތުން މި އެއްބަސްވުމުގައިވެސް ސޮއިކުރެއްވީ މިނިސްޓަރ އޮފް އިންވެސްޓްމަންޓް، ޓްރޭޑް އެންޑް އިންޑަސްޓްރީ ޖިހާރީ ބިން ޢަބްދުލް ޣަނީއެވެ.
Advertisement
This content is created and paid for by advertisers and does not involve Voice Journalists
