ރާއްޖެ އާއި މެލޭޝިއާއާ ދެމެދު އިޤްތިޞާދީ ގުޅުން އިތުރަށް ބަދަހިކުރުމުގެ ގޮތުން "ޕްރިފަރެންޝަލް ޓްރޭޑް އެގްރީމެންޓް" (ޕީޓީއޭ) އެއް އެކުލަވާލުމަށް ދެ ޤައުމުން އެއްބަސްވެއްޖެއެވެ.
މިކަން ހާމަކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަޢުވަތަކަށް މިހާރު ރާއްޖެއަށް ރަސްމީ ދަތުރުފުޅެއް ކުރައްވަމުން ގެންދަވާ މެލޭޝިއާގެ ބޮޑުވަޒީރު އަންވަރު އިބްރާހީމާއެކު ރައީސް އޮފީހުގައި ބޭއްވެވި ރަސްމީ މަޝްވަރާތަކަށްފަހު ދެއްވި ގުޅިފައިވާ ބަޔާނުގައެވެ.
ރައީސް މުޢިއްޒު ދެއްވި ބަޔާނުގައި ވިދާޅުވީ، ދެ ޤައުމުގެ ދެމެދުގައި އިޤްތިޞާދީ ގުޅުން ހަރުދަނާކުރުމަށް ފުޅާ ދާއިރާއެއްގައި މަޝްވަރާކުރެވުނު ކަމަށެވެ. އަދި ވިޔަފާރީގެ އައު އެއްބަސްވުމަކީ ދެ ޤައުމަށްވެސް ފައިދާހުރި ފުރުޞަތުތަކެއް ފަހިވެގެންދާނެ ކަމެއްކަން ފާހަގަކުރެއްވިއެވެ.
"ޕްރިފަރެންޝަލް ޓްރޭޑް އެގްރީމެންޓެއް އެކުލަވާލުމަށް މި މަޝްވަރާތަކުގައި އެއްބަސްވެވުނު. މިއީ ދެ ޤައުމުގެ ވިޔަފާރިތަކަށް ވެސް އިތުރު ފުރުސަތުތައް ފަހިވާނެ ކަމެއް،" ރައީސް ވިދާޅުވިއެވެ.
މީގެއިތުރުން، ރާއްޖޭގައި ހުރި އިންވެސްޓްމަންޓް ފުރުޞަތުތަކުގެ ބޭނުން ހިފުމަށް މެލޭޝިއާގެ ސަރުކާރަށާއި ވިޔަފާރިވެރިންނަށް ރައީސް ވަނީ ދަޢުވަތު އަރުވާފައެވެ. ހާއްސަކޮށް އިއާދަކުރަނިވި ހަކަތަ އާއި ޑިޖިޓަލް އިންފްރާސްޓްރަކްޗާ، ކޮންސްޓްރަކްޝަން އަދި އިސްލާމިކް ފައިނޭންސްގެ ދާއިރާ އިން ހުރި ފުރުސަތުތަކުގައި އިންވެސްޓު ކުރުމަށް ދައުވަތު ދެއްވާފައިވެއެވެ.
ހަމައެއާއެކު ރާއްޖޭގައި ހަލާލް ޓޫރިޒަމް ކުރިއެރުވުމުގައި މެލޭޝިއާގެ އެހީތެރިކަން ހޯދުމަށްވެސް ވަނީ މަޝްވަރާކުރައްވާފައެވެ.
މީގެ އިތުރުން، ބޮޑުވަޒީރު އަންވަރު އިބްރާހީމްގެ މި ދަތުރުފުޅަކީ ދެ ޤައުމުގެ ދެމެދުގައި އޮތް 58 އަހަރުވީ ޚާރިޖީ ގުޅުމާއި ޒަމާންވީ އެކުވެރިކަން އިތުރަށް ބަދަހިވެގެންދިޔަ ދަތުރުފުޅެއްކަން ފާހަގަކުރައްވަމުން، އދ. އާއި އޯއައިސީ އަދި ކޮމަންވެލްތު ފަދަ ބައިނަލްއަޤްވާމީ މައިދާންތަކުގައި އެކުގައި މަސައްކަތްކުރުމަށް އެއްބަސްވެވުނު ކަމަށްވެސް ރައީސް ވިދާޅުވިއެވެ.
މި ބައްދަލުވުމުގެ ތެރެއިން ދިފާޢީ ދާއިރާއިންނާއި އިސްލާމީ ކަންކަމާ ގުޅޭ ދާއިރާއިން ދެ ޤައުމުގެ ދެމެދުގައި މުހިންމު އެއްބަސްވުންތަކެއް ބަދަލުކުރެވުނެވެ.
މެލޭޝިއާއިން ރާއްޖޭގެ އިންސާނީ ވަސީލަތް ތަރައްޤީކުރުމަށް ވެދޭ އެހީތެރިކަމަށް ޝުކުރު އަދާކުރައްވަމުން، ވިސާގެ ލުއިފަސޭހަތަކާއި ސްކޮލަޝިޕްގެ ފުރުޞަތުތައް އިތުރުކުރުމަށް މަޝްވަރާކުރެވުނު ކަމަށް ރައީސް ވިދާޅުވިއެވެ.
އަދި މެލޭޝިއާގައި ދިރިއުޅޭ ދިވެހިންނާއި، ކިޔަވާ ދަރިވަރުންގެ އިތުރުން ޞިއްޙީ ފަރުވާއަށް އެ ޤައުމަށްދާ ދިވެހިންނަށް ދިމާވާ ދަތިތައް ޙައްލުކުރުމަށް ޢަމަލީ ގޮތުން ފިޔަވަޅުތައް އެޅުމާ ގުޅޭގޮތުން ވެސް މި މަޝްވަރާތަކުގައި ވަނީ އަލިއަޅުވާލައްވާފައެވެ.
Advertisement
This content is created and paid for by advertisers and does not involve Voice Journalists
