މެލޭޝިޔާގެ ބޮޑުވަޒީރު އަންވަރު އިބްރާހީމް މިހާރު ރާއްޖެއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި މެލޭޝިޔާގެ ބޮޑުވަޒީރު ރަސްމީ ވާހަކަފުޅުތައް މިއަދު ބާއްވަވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި ދެ ޤައުމުގެ އިސް ވަފުދުގެ ބޭފުޅުން ބައިވެރިވެވަޑައިގެންނެވިއެވެ.
މި ވާހަކަފުޅުތަކުގައި، މެލޭޝިޔާއިން ދިވެހިރާއްޖޭގެ ތަރައްޤީއަށް ޒަމާނުއްސުރެ ވެދެއްވަމުން ގެންދަވާ އެހީތެރިކަމާއި އެއްބާރުލުމަށް ރައީސުލްޖުމްހޫރިއްޔާ ޑރ. މުޢިއްޒު ވަނީ ޝުކުރު އަދާކުރައްވާފައެވެ. އަދި ބޮޑުވަޒީރު އަންވަރު އިބްރާހީމް ވަނީ ރާއްޖެއަށް ވަޑައިގެންނެވުމުން ލިބިވަޑައިގެންނެވި އުފާފާޅުކުރައްވައި، ރައީސް ޑރ. މުޢިއްޒުގެ ލީޑަރޝިޕަށް ތަޢުރީފު ކުރައްވާފައެވެ.
މި ބައްދަލުވުމުގައި ދެ ޤައުމުގެ ދެމެދުގައިވާ ޒަމާންވީ ގުޅުން އިތުރަށް ބަދަހިކުރުމާ ގުޅޭގޮތުންނާއި، އިސްލާމީ ކަންކަމާއި، ދިފާޢީ ދާއިރާއާއި، ވިޔަފާރިއާއި އިންވެސްޓްމަންޓް، ޞިއްޙަތު އަދި ފަތުރުވެރިކަމުގެ ދާއިރާއިން ގުޅުން ފުޅާކުރުމަށް ފުޅާ ދާއިރާއެއްގައި މަޝްވަރާކުރެވުނެވެ. މީގެއިތުރުން ޤުދުރަތީ ވަސީލަތްތަކުގެ ދާއިރާއިން އެއްބާރުލުން ދިނުމާއި، މެލޭޝިޔާގައި ދިރިއުޅޭ ދިވެހިންނަށް ދިމާވާ ދަތިތައް ޙައްލުކުރުމާ ގުޅޭގޮތުންވެސް ދެބޭފުޅުން ވާހަކަދެއްކެވިއެވެ.
މި ވާހަކަތަކުގެ ތެރެއިން ދެ ޤައުމުގެ ދެމެދުގައި ޕްރިފަރެންޝަލް ޓްރޭޑް އެގްރީމަންޓެއް (ޕީ.ޓީ.އޭ) އެކުލަވާލުމުގެ މަޝްވަރާތައް ފެށުމަށް މެލޭޝިޔާގެ ބޮޑުވަޒީރު ވަނީ އުޞޫލެއްގެ ގޮތުން އެއްބަސްވެވަޑައިގެންފައެވެ.
ބައިނަލްއަޤްވާމީ މައިދާނުގައި ދެ ޤައުމުން ޙިއްޞާކުރާ މުހިންމު ކަންކަމުގައި، ޚާއްޞަކޮށް ފަލަސްޠީނުގެ ޙައްޤުގައި ވަކާލާތުކުރުމާއި، އދ. ފަދަ ބައިނަލްއަޤްވާމީ ޕްލެޓްފޯމްތަކުގައި ގުޅިގެން މަސައްކަތްކުރުމުގެ އަޒުމް ދެ ލީޑަރުން ވަނީ އައުކުރައްވާފައެވެ.
ދިވެހިރާއްޖެއާއި މެލޭޝިޔާއާ ދެމެދު ޚާރިޖީ ގުޅުން ޤާއިމުކުރިތާ 58 އަހަރު ވެފައިވާއިރު، މި ގުޅުމަކީ މަތީ ފަންތީގެ ބައްދަލުވުންތަކާއި، ދެ ޤައުމުގެ ރައްޔިތުންގެ މެދުގައި އޮތް ގާތް ގުޅުމާއި، ދެމެހެއްޓެނިވި ތަރައްޤީގެ ބައިވެރިވުމުގެ މައްޗަށް ބިނާވެފައިވާ ވަރުގަދަ ގުޅުމެކެވެ.
Advertisement
This content is created and paid for by advertisers and does not involve Voice Journalists
