މުސްލިމުންގެ އެންމެ މާތް އެއް ބިން ކަމުގައިވާ މައްކާގެ ވައިގެ ސަރަހައްދަށް އަމާޒުކޮށް ޔަމަނުގެ ހޫތީ ހަނގުރާމަވެރިން ފޮނުވާލި ޑްރޯނެއް ސައުދީ އެއާ ޑިފެންސުން ވައްޓާލައި ނައްތާލައިފިއެވެ.

މިކަން ހާމަކޮށްފައިވަނީ ޔަމަނުގެ ސަރުކާރަށް ތާއީދުކުރާ އަރަބި ކޯލިޝަނުންނެވެ.

ކޯލިޝަންގެ ތަރުޖަމާނު މޭޖަރ ޖެނެރަލް ތުރުކީ އަލްމާލިކީ ބުނީ، ރޯޔަލް ސައުދީ އެއާ ޑިފެންސް ފޯސަސްއިން މި ޑްރޯން ވައްޓާލާފައިވަނީ ސެޕްޓެމްބަރު އިއްޔެ ހަވީރު 6:50 ހާއިރު، މައްކާގެ މަނާ ވައިގެ ސަރަހައްދަށް އެ ޑްރޯން ވަނުމުގެ ކުރިން މައްކާގެ ދެކުނު ސަރަހައްދުން ކަމަށެވެ.

އަލްމާލިކީ ފާހަގަކުރި ގޮތުގައި މިއީ ހޫތީން މައްކާއަށް އަމާޒުކޮށް ހަމަލާދޭން މަސައްކަތްކުރި ދެވަނަ ފަހަރެވެ. މީގެ ކުރިން 2017 ވަނަ އަހަރުގެ ޖުލައި މަހުގެ 27 ވަނަ ދުވަހު ވެސް ހޫތީން ވަނީ މައްކާއަށް އަމާޒުކޮށް ބެލިސްޓިކް މިސައިލެއް ފޮނުވާލާފައެވެ.

މުޅި ދުނިޔޭގެ މުސްލިމުންގެ ހިތްތަކުގައި ޚާއްސަ އަދި މަތިވެރި ޤަދަރެއް ދެވިފައިވާ މާތްވެގެންވާ ރަށަކަށް އަމާޒުކޮށް ދޭން އުޅުނު މި ހަމަލާއަކީ، ޢުމްރާވެރިންނާއި، ސައުދީގެ ރައްޔިތުން އަދި އެ ގައުމުގައި ދިރިއުޅޭ އެންމެހައި ފަރާތްތަކުގެ ހިތްތަކުގައި ބިރުވެރިކަން އުފައްދައި، އެމީހުންގެ ފުރާނައަށް ނުރައްކާ ކުރުމުގެ ނިޔަތުގައި ދިން ފިނޑި ހަމަލާއެއް ކަމަށް އަލްމާލިކީ ބުންޏެވެ.

މީގެއިތުރުން، ދެ ހަރަމްފުޅާއި އަޅުކަންކުރަން އަންނަ މީހުންގެ ސަލާމަތާއި ރައްކާތެރިކަމަކީ ކަނޑައެޅިފައިވާ "ރަތް ރޮނގެއް" ކަމަށާއި، ހޫތީންގެ މިފަދަ ހަމަލާތައް ހުއްޓުވައި ރައްދު ދިނުމަށްޓަކައި އަޅަންޖެހޭ ކޮންމެ ފިޔަވަޅެއް އެޅުމުގައި ކޯލިޝަނުން ފަސްނުޖެހޭނެ ކަމުގެ އިންޒާރުވެސް ތަރުޖަމާނު ވަނީ ދެއްވާފައެވެ.