ވެނެޒުއެލާގެ ކުރީގެ ރައީސް ނިކޮލަސް މަދޫރޯގެ އެންމެ އަރިސް އެއް އެހީތެރިޔާ އަދި އެ ގައުމުގެ ކުރީގެ އޮފިޝަލެއް ކަމަށްވާ އެލެކްސް ސާބް، އެމެރިކާގެ ކޯޓެއްގައި މަނީ ލޯންޑްރިންގެ ކުށަށް އިއުތިރާފުވެއްޖެއެވެ.

އަންގާރަ ދުވަހު އެމެރިކާގެ ފްލޮރިޑާގެ މިއާމީ ކޯޓުގައި ވެވުނު އިއުތިރާފު އެއްބަސްވުމުގެ (ޕްލީ ޑީލް) ދަށުން، އުމުރުން 54 އަހަރުގެ ސާބް ވަނީ 195 މިލިއަން އެމެރިކާ ޑޮލަރު (145 މިލިއަން ޕައުންޑް) ދައުލަތަށް ދެއްކުމަށާއި، އެމެރިކާގެ ޕްރޮސެކިއުޓަރުންނަށް ފުރިހަމައަށް އެއްބާރުލުން ދިނުމަށް އެއްބަސްވެފައެވެ. މީގެ ކުރިން ކުށަށް އިންކާރުކުރަމުން ދިޔަ ސާބްގެ މައްޗަށް މި ކުށުގައި 20 އަހަރުގެ ޖަލު ހުކުމެއް އައުން އެކަށީގެންވެއެވެ.

ކޮލަމްބިއާގެ ވިޔަފާރިވެރިއެއް ކަމަށްވާ ސާބްގެ މައްޗަށް ތުހުމަތުކުރެވިފައިވަނީ ވެނެޒުއެލާގެ ނިކަމެތި ރައްޔިތުންނަށް ކާބޯތަކެތި ފޯރުކޮށްދިނުމަށް ހިންގި ވެލްފެއާ މަޝްރޫއަކުން ފައިސާ ނަހަމަ ގޮތުގައި ބޭނުންކޮށް، އެ ފައިސާގެ ތެރެއިން ބައެއް އެމެރިކާގެ ބޭންކު އެކައުންޓުތަކަށް ޖަމާކުރި ކަމަށެވެ. ފާއިތުވި އަހަރުތަކުގައި ކުރިމަތިވި ސިޔާސީ އަދި އިގުތިސާދީ ކާރިސާތަކުގެ ސަބަބުން ވެނެޒުއެލާގެ ރައްޔިތުން ވަނީ ކާބޯތަކެއްޗާއި ބޭސްފަރުވާއަށް ނުހަނު ބޮޑަށް ޖެހިފައެވެ.

އެފްބީއައިގެ ޑިރެކްޓަރު ކޭޝް ޕަޓޭލް ބުނީ، ވެނެޒުއެލާގެ ރައްޔިތުންގެ އަތުން ވައްކަންކޮށް، ޣައިރު ގާނޫނީ ކަންކަމަށް ފައިސާ ހޯދުމަށް އެމެރިކާގެ މާލީ އިދާރާތައް ނަހަމަ ގޮތުގައި ބޭނުންކުރި އެލެކްސް ސާބް ފަދަ ކުށްވެރިންނަށް އެފްބީއައި އިން ފިޔަވަޅު އަޅައި އިންސާފުގެ ކުރިމައްޗަށް ގެންނާނެ ކަމަށެވެ.

މި މައްސަލައަކީ އެމެރިކާގައި ސާބްގެ މައްޗަށް ހިންގުނު ދެވަނަ ޖިނާއީ މައްސަލައެވެ. މީގެ ކުރިން 2020 ވަނަ އަހަރު ވެނެޒުއެލާ އިން 350 މިލިއަން ޑޮލަރު ވަގަށް ނެގި ކަމުގެ ތުހުމަތުގައި އޭނާ އެމެރިކާއަށް ގެނެވުނު ނަމަވެސް، 2023 ގައި އެމެރިކާގެ ކުރީގެ ރައީސް ޖޯ ބައިޑަން ވަނީ ގައިދީން ބަދަލުކުރުމުގެ އެއްބަސްވުމެއްގެ ދަށުން އޭނާއަށް މާފު ދީފައެވެ. ނަމަވެސް، މަދޫރޯގެ ވެރިކަން ބަދަލުވެ، އެ ގައުމުގެ ވަގުތީ ރައީސް ޑެލްސީ ރޮޑްރިގޭޒްގެ ސަރުކާރުން މިދިޔަ މެއި މަހު ސާބް އަލުން ވަނީ އެމެރިކާއާ ހަވާލުކޮށްފައެވެ.

މިދިޔަ ޖެނުއަރީ މަހު ކަރަކަސްގައި އެމެރިކާ ސިފައިން ހިންގި ވަރުގަދަ އޮޕަރޭޝަނެއްގައި މަދޫރޯ އަދި އޭނާގެ އަނބިކަނބަލުން ސިލިއާ ފްލޮރެސް ވަނީ ހައްޔަރުކޮށްފައެވެ. އަންނަ އަހަރު ނިއުޔޯކްގައި ހަތިޔާރާއި މަސްތުވާތަކެތީގެ މައްސަލައިގައި އެ ދެމަފިރިންގެ ޝަރީއަތް ފެށުމަށް ހަމަޖެހިފައިވާއިރު، ސާބް ހެދި އިއުތިރާފު އެއްބަސްވުމުގެ ސަބަބުން މަދޫރޯއާ ދެކޮޅަށް އޭނާ ހެކިބަސް ދީފާނެ ކަމަށް ވަނީ ބެލެވިފައެވެ. މި އެއްބަސްވުމުގައި ސީދާ މަދޫރޯގެ ވާހަކަ ނެތް ނަމަވެސް، އެއްވެސް މީހަކު ހިމާޔަތްކުރުމަށްޓަކައި ދޮގު މައުލޫމާތު ނުދިނުމަށާއި އެއްވެސް ކަމެއް ސިއްރު ނުކުރުމަށް ސާބް ވަނީ އެއްބަސްވެފައެވެ.