އިސްރާއީލުގެ އަސްކަރިއްޔާއަށް ފޮނުވާ އެއްވެސް މުދަލެއް މެލޭޝިޔާ މަގުން ގެންދިޔުމުގެ ފުރުސަތު ނުދެއްވާނެ ކަމަށް އެ ގައުމުގެ ބޮޑުވަޒީރު އަންވަރު އިބްރާހީމް ވިދާޅުވެއްޖެއެވެ. ބޮޑުވަޒީރު މިހެން ވިދާޅުވީ އިސްރާއީލަށް ގެންދަން އުޅުނު ކާގޯ ކޮންޓޭނަރުތަކެއް މެލޭޝިޔާގެ ކަމާބެހޭ ފަރާތްތަކުން ހިފެހެއްޓުމާ ގުޅިގެންނެވެ.
ބްލޫމްބާގް ނިއުސްއިން ރިޕޯޓްކޮށްފައިވާ ގޮތުގައި، މެލޭޝިޔާގެ އެންމެ ބޮޑު އެއް ބަނދަރު ކަމަށްވާ ތަންޖުން ޕެލެޕާސް ޕޯޓުން އިސްރާއީލަށް ފޮނުވަން އުޅުނު ތިން ކޮންޓޭނަރެއް މިދިޔަ އޮގަސްޓް މަހުގެ 19 ވަނަ ދުވަހު ވަނީ ހިފަހައްޓާފައެވެ. މި ކޮންޓޭނަރުތަކަކީ ޗައިނާއިން އިސްރާއީލުގެ އަޝްދޫދު ބަނދަރަށް ގެންދިޔުމަށް ފޮނުވި ތަކެއްޗެވެ.
މިކަމާ ގުޅިގެން އެކްސްގައި ހިއްސާކުރެއްވި މެސެޖެއްގައި ބޮޑުވަޒީރު އަންވަރު އިބްރާހީމް ވިދާޅުވީ، އިސްރާއީލުގެ އަސްކަރީ ގާބިލުކަން އިތުރުކުރުމަށާއި ފަލަސްތީނުގެ ރައްޔިތުންނާ ދެކޮޅަށް ހިންގާ ޖަރީމާތަކަށް އެހީތެރިވެދޭ އެއްވެސް މުދަލެއް އުފުލުމަށް މެލޭޝިޔާގެ ސަރަހައްދު ބޭނުންކުރުމުގެ ފުރުސަތު ނުދެއްވާނެ ކަމަށެވެ. އަދި ޝައްކުކުރެވޭ ކޮންމެ މުދަލެއް މެލޭޝިޔާގެ ގާނޫނުތަކާ އެއްގޮތަށް ބަލައި ފާސްކުރާނެ ކަމަށާއި، ގާނޫނާ ޚިލާފު ކަމެއް ފެނިއްޖެނަމަ ހަރުކަށި ފިޔަވަޅު އަޅުއްވާނެ ކަމަށްވެސް އޭނާ ވިދާޅުވިއެވެ.
މެލޭޝިޔާގެ ބޯޑަރ ކޮންޓްރޯލް އެޖެންސީން ހާމަކުރި ގޮތުގައި، ހިފެހެއްޓި ކޮންޓޭނަރުތަކުގެ މައްސަލަ މިހާރު ދަނީ އިތުރަށް ތަހުގީގު ކުރަމުންނެވެ. މި ތިން ކޮންޓޭނަރު ހިފެހެއްޓުމުގެ ދެ ހަފްތާ ކުރިންވެސް، ފިލިޕީންސުން އިސްރާއީލުގެ އަސްކަރީ ޓެކްނޮލޮޖީ ކުންފުންޏެއް ކަމަށްވާ އެލްބިޓް ސިސްޓަމްސްއަށް ފޮނުވަން އުޅުނު ކޮންޓޭނަރެއްވެސް މެލޭޝިޔާއިން ވަނީ ހިފަހައްޓާފައެވެ.
މެލޭޝިޔާއަކީ އޭޝިއާ ސަރަހައްދުގެ އެންމެ ބާރުބޮޑު ކަނޑުދަތުރުފަތުރުގެ މަގުތަކުގައި އޮންނަ މުހިންމު ޝިޕިންގ ހަބެކެވެ. މެލޭޝިޔާއާއި އިސްރާއީލާ ދެމެދު ސިޔާސީ އަދި ވިޔަފާރީގެ އެއްވެސް ގުޅުމެއް ނޯންނަ ނަމަވެސް، މުދާ ގެންދިޔުމުގައި މެލޭޝިޔާގެ ބަނދަރުތައް ޓްރާންސިޓްގެ ގޮތުގައި ކުރިން ބޭނުންކުރެއެވެ. ނަމަވެސް، މި ފިޔަވަޅުތަކަކީ އިސްރާއީލަށް މުދާ ގެންދިޔުމުގައި މެލޭޝިޔާއިން ގެންގުޅޭ ސިޔާސަތަށް އައި ބޮޑު ބަދަލެއް ކަމަށް ބްލޫމްބާގުން ފާހަގަކުރެއެވެ.
މެލޭޝިޔާއަކީ އިސްރާއީލުން ޣައްޒާއާ ދެކޮޅަށް ހިންގަމުންދާ ޤަތުލްއާއްމާއި، ހުޅަނގު އައްސޭރީގައި ހިންގަމުންދާ ލާއިންސާނީ އަމަލުތަކާ ދެކޮޅަށް ބައިނަލްއަގުވާމީ މައިދާނުގައި އެންމެ އަޑުއުފުލާ އެއް ގައުމެވެ. އެގޮތުން، މިދިޔަ ހަފްތާ ބަންދުގައި ނިއުދިއްލީގައި ބޭއްވުނު ބްރިކްސް ސަމިޓުގައިވެސް އަންވަރު އިބްރާހީމް ވަނީ ހުޅަނގު އައްސޭރީގައި ޔަހޫދީ ވަޒަންވެރިން ހިންގާ ޓެރަރިޒަމްގެ އަމަލުތައް ހަރުކަށި އިބާރާތުން ކުށްވެރިކުރައްވާފައެވެ.
Advertisement
This content is created and paid for by advertisers and does not involve Voice Journalists
