2028 ވަނަ އަހަރު ބާއްވާ ރިޔާސީ އިންތިޚާބުގައި ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ވާދަކުރައްވާނެ ކެންޑިޑޭޓަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަމަޖައްސައި، ޕްރައިމަރީއަކާ ނުލައި އެމަނިކުފާނަށް ރިޔާސީ ޓިކެޓް އެރުވުމަށް އެދި އެ ޕާޓީގެ މަތީ މަޖިލީހަށް މިއަދު ޤަރާރެއް ހުށަހަޅައިފިއެވެ.

ޕީއެންސީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުالله ގެ ރިޔާސަތުގައި ބޭއްވި މި ޖަލްސާއަށް މި ޤަރާރު ހުށަހެޅުއްވީ އެ ޕާޓީގެ ޢާންމު މެންބަރެއް ކަމަށްވާ ޢަބްދުالله އިބްރާހީމެވެ.

ގަރާރު ހުށަހެޅުއްވި ފަރާތުން ފާހަގަކުރެއްވި ގޮތުގައި ރައީސް ޑރ. މުޢިއްޒު ވެރިކަމާ ހަވާލުވެވަޑައިގެންނެވި ފަހުން ރާއްޖޭގެ ބިމުގައި ބޭރުގެ އެއްވެސް އަސްކަރީ ބާރެއް ނެތްކަން ކަށަވަރުކުރައްވައި ޤައުމުގެ މިނިވަންކަމާއި ސިޔާދަތު ހިމާޔަތްކުރެއްވުމުގެ އިތުރުން ކަނޑުގެ ސަރަޙައްދު ބެލެހެއްޓެވުމުގެ ޤާބިލުކަން ވެސް އިތުރުކުރައްވާފައިވެއެވެ.

އެއާ އެކު މާލީ ދަރަނީގެ މައްސަލަތަކަށް ރައްޔިތުންނަށް ދަތިނުވާނެ ގޮތަށް ހަރުދަނާ ފިޔަވަޅުތައް އެޅުއްވުމާއި އިޤްތިޞާދު ސިންދަފާތުކުރެއްވުމާއި ޑިޖިޓަލް މޯލްޑިވްސް 2.0 ފަދަ ޒަމާނީ ވަސީލަތްތައް ތަޢާރަފްކުރެއްވުމާއި ރަސްމާލެ ފަދަ ބޮޑެތި ބޯހިޔާވަހިކަމުގެ މަޝްރޫޢުތައް ހިންގެވުން ވެސް ގަރާރުގައި ފާހަގަކޮށްފައިވެއެވެ. ހަމައެހެންމެ ފަލަސްޠީނު ރައްޔިތުންގެ ޙައްޤުގައި ބައިނަލްއަޤުވާމީ ފެންވަރުގައި ކުރައްވާ ވަކާލާތު ވެސް ގަރާރުގައި ބަޔާންކޮށްފައިވެއެވެ.

ޕީއެންސީގެ އަސާސީ ޤަވާއިދުގެ 88 ވަނަ މާއްދާގެ ދަށުން ރައީސުލްޖުމްހޫރިއްޔާ ކަމުގެ މަޤާމުގައި ހުންނެވި ޕާޓީގެ މެންބަރަކު ދެވަނަ ދައުރަކަށް ކުރިމަތިލައްވާނަމަ ޕްރައިމަރީއެއް ބޭއްވުމެއް ނެތި ޓިކެޓް ލިބިވަޑައިގަންނަވާނެ ކަމަށް ގަރާރުގައި ބުނެފައިވެއެވެ.

 "ދިވެހި ޤައުމާއި އެންމެހާ ރައްޔިތުންގެ ދުރުމުސްތަޤުބަލަށާއި ލާބައާއި މަންފާއަށްޓަކައި ރައީސުލްޖުމްހޫރިއްޔާ ޑރ.މުޙައްމަދު މުއިއްޒަށް ރިޔާސީ ދެވަނަ ދަޢުރެއް ދިނުމަކީ ޤައުމީ ވާޖިބެއް ކަމުގައި ދެކޭ ހިނދު. 2028 ވަނަ އަހަރުގެ ރިޔާސީ އިންތިޚާބުގައި ދެވަނަ ދަޢުރަކަށް ކުރިމަތިލައްވާ ވާދަކުރެއްވުމަށް ޕާޓީގެ އެންމެހާ މެންބަރުންގެ ފަރާތުން ދެންނެވުމަށްޓަކައި ޕީޕަލްސް ނޭޝަނަލް ކޮންގްރެސްގެ މަތީ މަޖިލީހުން މި ޤަރާރު އެއްކަށަވަޅަ އެމަނިކުފާނުގެ ރިޔާސީ ދެވަނަ ދަޢުރަކަށް ވާދަކުރެއްވުމަށް ރަސްމީކޮށް ދެންނެވުމުގެ ގޮތުން މި ޤަރާރު މި މަޖިލީހުން ފާސްކުރެއްވުމަށް ހުށަހަޅަން" ގަރާރުގައި ބުނެފައިވެއެވެ.

މި ގަރާރު ފާސްކުރުމާ މެދު ޕީއެންސީގެ މަތީ މަޖިލީހުން ގޮތެއް ނިންމާނީ ކުރިއަށް އޮތް ތަނުގައެވެ.