ރައީސް ޑރ. މުޙައްމަދު މުޢިއްޒުގެ ލީޑާޝިޕްގެ ދަށުން ދުރާލައި ރޭވުންތެރިކަމާ އެކު ދަރަނި ބެލެހެއްޓުމުގެ މަސައްކަތް ސަރުކާރުން ކުރިއަށް ގެންދާ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެއެވެ.  

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން 2019 ވަނަ އަހަރު ސްޓޭޓް ބޭންކް އޮފް އިންޑިއާ މެދުވެރިކޮށް ނެގި 150 މިލިއަން ޑޮލަރުގެ ލޯނުގެ އެންމެ ފަހު 50 މިލިއަން ޑޮލަރުގެ އިންސްޓޯލްމަންޓް މިއަދު ދައްކައި ސަރުކާރުން ވަނީ އެ ދަރަނި އެއްކޮށް ޚަލާޞްކޮށްފައެވެ.

ފިނޭންސް މިނިސްޓަރު ހަސަން ޒަރީރު އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް ޑރ. މުޙައްމަދު މުޢިއްޒުގެ ލީޑާޝިޕްގެ ދަށުން ދުރާލައި ރޭވުންތެރިކަމާ އެކު ދަރަނި ބެލެހެއްޓުމުގެ މަސައްކަތް ސަރުކާރުން ކުރިއަށް ގެންދާ ކަމަށެވެ.

އެގޮތުން ސޮވެރިން ޑިވެލޮޕްމަންޓް ފަންޑަށް ގަވާއިދުން ފައިސާ ޖަމާކުރުން ކުރިއަށްދާ ކަމަށާއި ތެލާއި ކާޑުގެ ބާވަތްތަކާއި ބޭސް މެދުނުކެނޑި ލިބޭނެ އިންތިޒާމުތައް ފުރިހަމައަށް ހަމަޖެހިފައިވާ ކަމަށް ވެސް ވިދާޅުވެފައިވެއެވެ.

ކުރީގެ ރައީސް ސާލިޙުގެ ވެރިކަމުގައި ބަޖެޓް ސަޕޯޓަށް ނެގި މި ފެސިލިޓީން މި ސަރުކާރުން ވަނީ ތިން ބުރެއްގެ މަތިން ފައިސާ ދައްކާފައެވެ. ފުރަތަމަ 50 މިލިއަން ޑޮލަރު ޖެނުއަރީ 2024 ގައި ދެވަނަ 50 މިލިއަން ޑޮލަރު 11 މެއި 2024 ގައި ދެއްކުމަށް ފަހު މިއަދު ދެއްކީ ބާކީ އޮތް އެންމެ ފަހު ބައެވެ.

ފިނޭންސް ވުޒާރާއިން ނެރުނު ބަޔާނުގައި ބުނެފައި ވަނީ މި ދަރަނި އަދާކުރުމުގެ ސަބަބުން ޒަރޫރީ މުދާ އެތެރެކުރުމަށް ބޭރު ފައިސާ ލިބުމުގައި ދަތިވާނެ ކަމަށް ފަތުރަމުންދާ ވާހަކަތަކަކީ އެއްވެސް އަސާސެއް ނެތް ވާހަކަތަކެއް ކަމަށެވެ. އެ ވުޒާރާއިން ފާހަގަކުރި ގޮތުގައި ޒަރޫރީ މުދަލާއި އަސާސީ ޚިދުމަތްތައް މެދުނުކެނޑި ފޯރުކޮށްދިނުމަކީ ސަރުކާރުން އެންމެ އިސްކަންދޭ އެއް ދާއިރާއެވެ.

މޯލްޑިވްސް މަނިޓަރީ އޮތޯރިޓީގެ ހިސާބުތައް ދައްކާ ގޮތުން އޮގަސްޓް 2026 ގެ ނިޔަލަށް ރާއްޖޭގެ ރަސްމީ ރިޒާވް ހުރީ ގާތްގަނޑަކަށް 644 މިލިއަން ޑޮލަރުގައެވެ. ސަރުކާރުން ދަނީ ބައިނަލްއަޤުވާމީ މާލީ އިދާރާތަކާއި ތަރައްޤީގެ ބައިވެރިންނާ އެކު މަޝްވަރާތައް ކުރިއަށް ގެންދަމުން ކަމަށާއި އެ މަޝްވަރާތަކުގެ ނަތީޖާއެއްގެ ގޮތުން ބޭރު ފައިސާގެ ރިޒާވަށް އިތުރު ކުރިއެރުން ލިބޭނެ ކަމަށް ފިނޭންސް ވުޒާރާއިން އުންމީދުކުރެއެވެ.