ރާއްޖޭގެ އެކި ކަންކޮޅުތަކުގައި ކަނދުފަތި ބެހެއްޓުމަށް ހިންގާ މަޝްރޫޢުގެ ދަށުން މިހާތަނަށް 106 ކަނދުފަތި ޤާއިމުކޮށް ވަދު ކަނދުފަތީގެ ފުރިހަމަ ވިއުގައެއް އަންނަ އަހަރުގެ ފެބްރުއަރީ މަހުގެ ނިޔަލަށް ނިންމުމަށް އަމާޒު ހިފާފައިވާ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ބުނެފިއެވެ.
މިހާތަނަށް ޤާއިމުކުރެވުނު 106 ކަނދުފަތީގެ ތެރޭގައި 52 ދޮށީ ކަނދުފައްޗާއި 54 ވަދު ކަނދުފަތި ހިމެނެއެވެ.
މަސްވެރިކަމާ ބެހޭ ވުޒާރާއިްނ ބުނީ މި ސެޕްޓެމްބަރު މަހުގެ ތެރޭގައި ވެސް ފަސް ދޮށީ ކަނދުފައްޗާއި ދެ ވަދު ކަނދުފަތި އިތުރަށް ބެހެއްޓުނު ކަމަށެވެ. މިދިޔަ އަހަރު އެކަނި ވެސް 44 ވަދު ކަނދުފަތި ބެހެއްޓި ކަމަށާއި މީގެ ކުރިން އެއްވެސް ސަރުކާރަކުން އެ މިންވަރަށް ކަނދުފަތި ނާޅާ ކަން ވަނީ ފާހަގަކޮށްފައެވެ.
އެ ވުޒާރާއިން މިހާރު ކަނދުފަތި އެޅުމުގެ މަސައްކަތްކުރަނީ ކަނދުފަތީގެ ޑިޒައިނަށް ވެސް ބޮޑު ބަދަލެއް ގެނެސްގެންނެވެ.
ފާއިތުވި 40 އަހަރު ދުވަހު ބޭނުންކުރި ކުރީގެ ޑިޒައިން ދޫކޮށް އައު ޑިޒައިނެއް ތަޢާރަފުކޮށްފައިވާ ކަމަށާއި އެ ބަދަލުގެ ސަބަބުން ކަނދުފަތި އަވަހަށް ކަނޑައިގެންދާ މައްސަލައަށް ދާއިމީ ޙައްލެއް ލިބޭނެ ކަމަށް ބެލެވޭ ކަމަށް އެ ވުޒާރާއިން ބުނެފައިވެއެވެ.
މުޅި ރާއްޖެ ޝާމިލުވާ ވަދު ކަނދުފަތީގެ ވިއުގަ ފުރިހަމަކުރުމުގެ މަސައްކަތް 2027 ވަނަ އަހަރުގެ ފެބްރުއަރީ މަހުގެ ނިޔަލަށް އެއްކޮށް ނިންމައިލެވޭނެ ކަމަށް އެ ވުޒާރާއިން ލަފާކޮށްފައިވެއެވެ.
Advertisement
This content is created and paid for by advertisers and does not involve Voice Journalists
