އާޖެންޓީނާގެ ނުރައްކާތެރި ފޯވަޑް މައުރޯ އިކާޑީ އިންޓަ މިލާން ދޫކޮށް ޕީއެސްޖީއައި ގުޅިއްޖެއެވެ.
އުމުރުން 26 އަހަރުގެ އިކާޑީ ޕީއެސްޖީއައި ގުޅުނީ އެއް އަހަރު ދުވަހުގެ ލޯނު އެއްބަސްވުމެއްގެ ދަށުންނެވެ. މި އެއްބަސްވުމުގެ ދަށުން 65 މިލިއަން ޔޫރޯގެ ފީ އެއް އިންޓައަށް ދެއްކުމަށްފަހު ޕީއެސްޖީއަށް އިކާޑީ ދާއިމީކޮށް ގަތުމުގެ އިހްތިޔާރު ލިބިގެންވެއެވެ.
އިންޓައަށް 219 މެޗް ކުޅެދީ 124 ގޯލް ކާމިޔާބު ކޮށްދީފައިވާ އިކާޑީ މި ޓްރާންސްފާއައި ބެހޭ ގޮތުން ބުނީ، ހުރިހާ މުބާރާތަކުން ރަނގަޅު ކާމިޔާބީއެއް ހާސިލްކުރުމަށް އޭނާގެ ފަރާތުން ދޭންޖެހޭ ހުރިހާ އެހީތެރިކަމެއް ޕީއެސްޖީއަށް ދޭން ތައްޔާރަށް ހުރި ކަމުގައެވެ. ޕީއެސްޖީ އަކީ ފުޓްބޯޅައިގެ ދުނިޔޭގައި މިއަދު ގަދަ ބާރެއް ކަމަށައި އޭގެ ހެއްކަކީ ދުނިޔޭގެ އެންމެ މޮޅެތި ކުޅުންތެރިން އެ ކްލަބައި ގުޅޭ މަންޒަރު ފެނުން ކަމަށްވެސް އޭނާ ބުންޏެވެ.
އިކާޑީއާއެކު މި ސީޒަނުގައި ޕީއެސްޖީއަށް ބަދަލުވި ކުޅުންތެރިންގެ އަދަދު ވަނީ އަަށަކަށް އަރާފައެވެ. އޭގެ ތެރޭގައި މެންޗެސްޓާ ޔުނައިޓެޑް ދޫކޮށް އެ ކްލަބައި ގުޅުނު އެންޑަރ ހެރޭރާ، ރެއާލް މެޑްރިޑް ދޫކޮށްލި ކޭލާ ނާވާސް އަދި އުންމީދީ ޒުވާން ގޯލް ކީޕަރު ސާޖިއޯ ރިކޯ ހިމެނެއެވެ.
ނޭމާ، އެމްބާޕޭ، ކަވާނީ، އަދި އިކާޑީއާއެކު ޕީއެސްޖީއަކީ މި ސީޒަނުގެ ޗެންޕިއަންސް ލީގް ކާމިޔާބު ކުރާނެ ފޭވަރިޓް ޓީމްތަކުގެ ތެރެއިން އެއް ޓީމު ކަމުގައި ފުޓްބޯޅައިގެ ކަންކަން އެންމެ ގާތުން ބަލަމުންދާ ގިނަ ބަޔަކު ދަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
