އިބްތިހާލަށް އަނިޔާނުކުރާކަމަށް އާފިޔާ ބުނެފި
ވ.ރަކީދޫގައި ވަރަށް އަނިޔާވެރިކޮށް މަރާލާފައި އޮއްވާ ފެނުނު މުހައްމަދު އިބްތިހާލަށް އަނިޔާކޮށްފައި ނުވާނެކަމަށް އޭނާގެ މަންމަ އާފިޔާ މުހައްމަދު ބުނެފިއެވެ.
އާފިޔާ މިހެން ބުނެފައިވަނީ އިބްތިހާލް މަރުވުމުގެ ކުރިން އެކި ދުވަސްމަތިން އޭނާއަށް އާފިޔާ އަނިޔާކުރި ކަމަށްބުނެ އުފުލާފައިވާ އަމުރަށް ނުކިޔަމަންތެރިވުމުގެ ދައުވާގެ ޝަރީއަތުގެ މަޖިލީހުގައި ވާހަކަ ދައްކަމުންނެވެ.
މީގެ ކުރިން އެ ދައުވާއަށް އެއްބަސްވެފައި ވީނަމަވެސް އާފިޔާ ވަނީ އެފަަދަ ގޮތަށް ބަޔާނެއް ދީފައި ނުވާނެކަމަށް ބުނެފައެވެ. އެގޮތުން އާފިޔާ ވަނީ އޭނާ ސޮއިކުރިކަމަށްބުނާ ބަޔާން ދެއްކުމުން އެފަދަ ބަޔާނެއްގައި އޭނާ ސޮއި ކޮށްފައި ނުވާނެ ކަމަށާއި އެފަދަ ބަޔާނެއްގައި ސޮއިކުރަން އޭނާއަށް ދީފައި ވެސް ނެތްކަމަށް ބުނެފައެވެ.
އޭނާ ވަނީ އިބްތިހާލަށް އަނިޔާކޮށްފައި ނުވާނެކަމަށް ބުނެ ދައުވާއަށް އިންކާރުކޮށްފައެވެ.
އާފިޔާ ވަނީ މި މައްސަލައިގައި ދެން ކުރިއަށްދާން ބޭނުންވަނީ ވަކީލެއްގެ އެހީތެރިކަމާއި އެކުގައިކަމަށް ބުނެފައެވެ. އެހެންކަމުން ގާޒީ ވަނީ އެ އިންތިޒާމު ހަމަޖައްސައިދިނުމަށް ކޯޓުން ކަރެކްޝަންސްގެ ކިބައިން އެދޭނެކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists