ހުކުރު ދުވަހުގެ ރޭ މާލޭގައި ހިނގި ނުރައްކާތެރި އަލިފާނުގެ ހާދިސާގެ ހަނދާންތައް ދިވެހިންގެ ހިތްތަކުގައި މިރޭ ވީ ކަމެއްހެން އަދިވެސް ހަރުލައި އެބަހުއްޓެވެ. އެ ބިރުވެރި ހާދިސާގައި ދެކުދިންގެ މަންމައެއް މި ދުނިޔެއާ އަލްވަދާއު ކިޔާފައިވާއިރު، 400އަށްވުރެ ގިނަ މީހުންނަށް އެކަމުގެ ގެއްލުންތައް ލިބުނެވެ.
އެފަދަ ހާދިސާއެއް ހިނގާފާނެ ކަމަށް ރައްޔިތުން ތިީ ތައްޔާރު ވެގެނެއް ނޫނެވެ. އެހެންނަމަވެސް އެފަދަ ކަމެއް ހިނގާފާނެ ކަމަށްޓަކައި ބަލަންޖެހޭ ކަންކަން ބަލައި ރައްކާތެރިކަމުގެ ފިޔަވަޅުތައް އަޅަންޖެހޭ ދައުލަތުގެ އިސްވެރިންތައް ތިއްބެވީ "ނިދިކުރައްވާފައެވެ." އެބޭފުޅުންނަށް ހަމަހޭވެރިކަންވެ ކަމެއް ވެގެން އުޅޭކަން ރޭކާލީ މާފަހުންނެވެ.
ޕްލޭނިން މިނިސްޓަރު މުހައްމަދު އަސްލަމް ވިދާޅުވާ އިބާރާތުންނަމަ، ކަމެއްގެ ބޮޑުކަން "އެންމެންނަށް"ވެސް އެނގެނީ އެކަމެއް ވުމުންނެވެ. އެއީ އިންސާނީ ތަބީއަތް ކަމުގައި އެބޭފުޅާ ސިފަކުރެއްވިއެވެ.
އެހެންނަމަވެސް ރައްޔިތުން މިއަދު ތިބީ އެވާހަކައިން ތަސައްލީ ހޯދައިގެން ތިބޭ ގޮތަކަށް ނޫނެވެ. ސަރުކާރު އެއަށްވުރެ ޒިންމާދާރުވާން ޖެހޭ ކަމަށް ރައްޔިތުން އެބަ ބުނެއެވެ. އެކި މައްސަލަތަކުގެ ހާއްޔެއްގެ ގޮތުގައި އޮތް މާލޭގެ ކަންކަން ބެލުމަށް ރައްޔިތުންގެ ޓެކްސް ފައިސާއިން ކޮންމެ މަހަކު ބަރާބަރަށް މުސާރަ ދީގެން، އަދި ނުވިތާކަށް ދައުލަތުގެ ކާރުކޮޅުގައި ދަތުރު ކުރައްވަމުންގެންދަވާ ކައުންސިލު މެމްބަރުންތަކެއްވެސް ތިއްބެވިއިރު، އެބޭފުޅުންގެ ޒިންމާ އަކީ ހަމައެކަނި ސަޅިބައިސާ ކެނޑުންތޯ މިއަދު ރައްޔިތުން އެބަ ސުވާލު އުފައްދައެެވެ.
މާލެ ބަލަހައްޓަން އިތުރު މީހުން ނަގަންޖެހޭ ކަމަށް ވަންޔާ އެކަންވެސް ކޮށްގެން ރައްޔިތުން ބޭނުންވަނީ އެމީހުންގެ ރައްކާތެރިކަން ކަށަވަރު ކުރުމަށެވެ. ސިޓީ ކައުންސިލަކީ ސަރުކާރު ހިންގާ މައި ޕާޓީ އެމްޑީޕީގެ މެޖޯރިޓީ ކައުންސިލަކަށް ވާއިރު، އެކައުންސިލަށް ކަންކަން ނުވުމަކީ ހައިރާންވާން ޖެހޭ ކަމެއް ކަމަށް ރައްޔިތުންގެ ތެރެއިން ގިނަ ބަޔަކު ދައްކައެެވެ.
ކުރިން ދައްކަނީ އެކައުންސިލުގެ މަސައްކަތަށް އޭރުގެ ސަރުކާރުން ހުރަސް އަޅާ ވާހަކައެވެ. އެހެންނަމަވެސް މިހާރު އެވާހަކަ ދައްކާނެ ޖާގައެއް ނެތެވެ. ސަރުކާރު އޮތީވެސް ސިޓީ ކައުންސިލަށް ލިބިފައިތާއެވެ. މަގެއްގައި އެއްގަމު އުޅަނދު ދުއްވުން މަނާކޮށްލައި، ކަންމަތީ ބައްދަލުުވުމެއް ބާއްވައިލުމުން އަދި ނުފުދެއެވެ.
ސިޓީ ކައުންސިލު ފެއިލުވެ، އެކައުންސިލް އިސްތިއުފާ ދޭން ޖެހޭ ދަނޑިވަޅުތައް ރައްޔިތުން ދެކެފައިވާއިރު، އިތުރު ބަޔަކަށް ރައްޔިތުން ފުރުސަތު ދިނުމާމެދު ވިސްނާނެ ކަމަށް ގަބޫލު ކުރެެވެއެވެ.
Advertisement
This content is created and paid for by advertisers and does not involve Voice Journalists
