ކުރިއަށް އޮތް 3 ދުވަހު މޫސުން ގޯސް ވާނެ: މެޓް

16 May 2020 | 14:53

މާދަމާއިން ފެށިގެން ކުރިއަށް އޮތް 3 ދުވަހު އަނެއްކާ ވެސް ރާއްޖެ އަށް މޫސުން ގޯސް ވާނެ ކަމަށް މީޓިއޮރޮލޮޖިކަލް އޮފީހުން ހާމަކޮށްފިއެވެ.

މެޓް އޮފީހުގެ އެސިސްޓެންޓް މީޓިއޮރޮލޮޖިސްޓް އަބްދުﷲ ހާފިޒް ވިދާޅުވީ، މިއަދު ރާއްޖެ އަށް ބޯކޮށް ވާރޭ ނުވެހޭނެ ކަމަށާއި ނަމަވެސް މާދަމާ އިން ފެށިގެން އަނެއްކާ ވެސް ބޯކޮށް ވާރޭ ވެހި، ގުގުރުން އެކަށީގެންވާ ކަމަށެވެ.

މެޓް އޮފީހުގެ އޮފިސަލް އިތުރަށް ވިދާޅުވީ މިއަދު ބޯކޮށް ވާރޭ ނުވެހުނު ނަމަވެސް ވައި ގަދަވެ، ގަޑިއަކު 18-25 މޭލާ ދެމެދުގެ ބާރު މިނެއްގައި ވައި ޖެހޭނެ ކަމަށާއި، ވިލާގަނޑުގައި ގަޑިއަކު 50-55 މޭލާ ދެމެދުގެ ބާރު މިނުގައި ވައި ޖެހުމުގެ ސަބަބުން ރާއްޖޭގެ ކަނޑުތައް ގަދަ ވާނެ ކަމަށާއި ކަނޑުދަތުރު ކުރުމުގައި ހާއްސަ ސަމާލުކަމެއް ދެއްވުމަށް އިލްތިމާސް ކުރައްވާ ކަމަށެވެ.

ހުޅަނގު މޫސުމުގެ ވިއްސާރަ ރާއްޖެއަށް ކުރަން ފަށާފައިވާއިރު، އިންޑިއާގެ ބޭއޮފް ބެންގޯލް ސަރަހައްދުގައި މިހާރު އުފެދިފައިވާ ކޮޅިގަނޑު މިއަދު މެންދުރެއްހާއިރު ތޫފާނަކަށް ބަދަލުވެގެންދާނެކަމަށާއި އޭގެ ސީދާ އަސަރު ރާއްޖެއަށް ނުކުރި ނަމަވެސް ކުރިއަށް ވަގުތު ތަކުގައި ވެސް ރާއްޖޭގެ ބޮޑު ސަރަހައްދަކަށް ވައި ގަދަ ވާނެ ކަމަށްވެސް އޭނާ ވިދާޅުވިއެވެ.

ކުރިއަށް މިއޮތް 24 ގަޑިއިރުގެ ތެރޭގައި ދިޔަވަރު ބޮޑުވާ ގަޑިތަކުގައި އުދަ އެރުމުގެ ފުރުސަތު ބޮޑު ކަމަށާއި، އަދި ބައެއް ރަށްތަކަށް ބޯކޮށް ވާރޭވެހި ފެންބޮޑުވާނެކަމަށް ލަފާކުރެ ވެއެވެ.

ހަމައެއާއެކު،ރާއްޖޭގެ ގިނަ ހިސާބުތަކަށް، ޚާއްސަކޮށް މެދުތެރެއާ އުތުރުގެ އަތޮޅަތަކަށް ކަނޑުތައް ވަރަށް ގަދަވެގެންދާނެކަމަށް ލަފާކުރެވޭތީ ކޮންމެހެން ކުރަންޖެހޭ ދަތުރެއް ނޫނީ ނުކުރުމަށް މެޓް އޮފީހުން އިލްތިމާސް ކުރައްވައެވެ.

ރާއްޖެއަށް މިހާރު މިކުރަމުންދާ ހުޅަނގު މޫސުމުގެ ވިއްސާރައާއި ގުޅިގެން ރާއްޖޭގައި ވަނީ ފުރަތަމަ ފަހަރަށް އޮރެންޖް އެލާޓް ނެރެފައެވެ.

Advertisement

ކޮމެންޓް

Advertisement