އިނގިރޭސިވިލާތުގެ ބޮޑުވަޒީރު ކެއާ ސްޓާމާ ބޮޑުވަޒީރުކަމާއި ލޭބާ ޕާޓީގެ ލީޑަރުކަމުން އިސްތިއުފާ ދެއްވާނެކަން އިއުލާން ކުރައްވައިފިއެވެ.
އިސްތިއުފާ އިއުލާންކުރައްވައި ދެއްވި ބަޔާނެއްގައި ސްޓާމާ ވިދާޅުވީ މަގާމުގައި ހުންނަވައިގެން ނެންގެވި ކޮންމެ ނިންމެވުމަކީ "ގައުމު އެންމެ އިސްކޮށް" ނިންމެވި ނިންމެވުންތައް ކަމަށެވެ.
އަދި މިއަދު ހެނދުނު ރަސްގެފާނަށް ގުޅުއްވައި އިސްތިއުފާ ދެއްވާ ކަމަށް ވިދާޅުވި ކަމަށްވެސް ވިދާޅުވިއެވެ.
މީގެ އިތުރުން ސްޓާމާ ވަނީ ލޭބާ ޕާޓީގެ ނެޝަނަލް އެގްޒެކެޓިވް ކޮމިޓީގެ ކިބައިން ލީޑަރުކަމަށް ޖުލައި 9 ގައި ހުޅުވައި ހޫނު މޫސުމުގެ ޗުއްޓީގެ ކުރިން ހުރިހާ މަރުހަލާއެއް ނިންމައިދެއްވުމަށް އެދިވަޑައިގެންފައެވެ. މީގެ ސަބަބުން ސެޕްޓެމްބަރުގައި ޕާލަމެންޓް އެނބުރި ފެށުމުގެ ކުރިން އާ ލީޑަރެއް ހޮވޭނެއެވެ. އެހެންނަމަވެސް އާ ލީޑަރެއް ހޮވެންދެން ބޮޑުވަޒީރުކަމުގައި ދެމިހުންނަވާނެ ކަމަށް ސްޓާމާ ވިދާޅުވިއެވެ.
ސްޓާމާ އިސްތިއުފާ އިއުލާން ކުރައްވަނީ
ސްޓާމާ ވިދާޅުވި ގޮތުގައި އޭނާއާ ލޭބާ ޕާޓީ ހަވާލުވިއިރު އެ ޕާޓީ އޮތީ "ސިޔާސީ ގޮތުންނާއި މާލީ ގޮތުންނާއި އަޚުލާޤީ ގޮތުން ބަނގުރޫޓުވެފައި" ކަމަށެވެ. ޕާޓީ "ނިމިއްޖެ" ކަމަށް ތަކުރާރުކޮށް ބުނަމުން ދިޔަ ނަމަވެސް "އެ މީހުންގެ ވާހަކަ ދޮގު ކުރެއްވި" ކަމަށާއި ޕާޓީ ބަދަލުކުރެއްވި ކަމަށް ވެސް ވިދާޅުވިއެވެ.
އޭގެ އިތުރުން އަނބިކަނބަލުން ވިކް އަށް ޝުކުރު އަދާކުރައްވައި ދަރިންނަށް "އެންމެ ރަނގަޅު ބައްޕައަކަށް" ވެވަޑައިގަތުމަށް ބޭނުންފުޅުވާ ކަމަށް ވިދާޅުވިއެވެ.
ސްޓާމާގެ ބަދަލުގައި ލީޑަރުކަމާ ހަވާލުވެވަޑައިގެންފާނެ ކަމަށް ބެލެވޭ އެންޑީ ބާންހަމް މިދިޔަ ހަފުތާގައި ބައި-އިލެކްޝަން ކާމިޔާބުކުރެއްވުމަށް ފަހު މެމްބަރެއްގެ ގޮތުގައި ހުވައިކުރެއްވުމަށް މިއަދު ވެސްޓްމިންސްޓާއަށް ވަޑައިގަންނަވާނެއެވެ.
Advertisement
This content is created and paid for by advertisers and does not involve Voice Journalists
