އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ނަރުހެއްގެ ގޮތުގައި މަސައްކަތް ކުރި ފިލިޕީންސްގެ ރައްޔިތެއް ކަމުގައިވާ މޭރީ ގްރޭސް އޮނެޑް ޕިނެޑާ މަރާލި މައްސަލައިގައި އޭނާގެ ފިރިމީހާ މާވިން އެސް. ވައި. ވާގަސް (ޔޫސުފް) ގެ މައްޗަށް ކުށް ސާބިތުވެއްޖެއެވެ.

ކްރިމިނަލް ކޯޓުން މިއަދު ކުރި ހުކުމުގައި މި ކުށް މާވިންގެ މައްޗަށް ސާބިތުވާ ކަމަށް ކަނޑައެޅިއިރު، އަދަބާ މެދު ވާހަކަ ދެއްކުން އޮތީ އަންނަ މަހުގެ އެއްވަނަ ދުވަހުއެވެ.

މާވިންގެ މައްޗަށް ދައުލަތުން ދައުވާ ކޮށްފައިވަނީ 2021 ވަނަ އަހަރުގެ އޮކްޓޫބަރު 19 ވަނަ ދުވަހު މާލޭ މއ. އުދުހޭކޮކާގޭގެ ފުރަތަމަ ފަންގިފިލާގައި ހުންނަ އެޕާޓްމަންޓުގައި މޭރީގެ ބޮލާއި ކަރަށް ހަމަލާ ދީ ނޭވާ ހާސްކޮށްގެން މަރާލި ކަމުގެ ދައުވާއެވެ. މާވިންގެ މައްޗަށް ގަސްދުގައި މީހަކު މެރުމުގެ ދައުވާ އުފުލީ 4 ޖެނުއަރީ 2022 ގައެވެ.

މޭރީގެ ހަށިގަނޑު ހޮސްޕިޓަލަށް ގެންދިޔައީ ފިރިމީހާ މާވިންއެވެ. ފުރަތަމަ މާވިން ބުނީ މޭރީ ދަންޖެހިގެން މަރުވީ ކަމަށެވެ. ނަމަވެސް ހަށިގަނޑުން ދަންޖެހުމުގެ ނިޝާނެއް ފެންނަން ނެތުމުން ފުލުހުން ވަނީ މާވިން ހައްޔަރުކޮށްފައެވެ. މާވިން ހައްޔަރުކުރީ 27 އޮކްޓޫބަރު 2021 ގައެވެ. މޭރީގެ ހަށިގަނޑު އޮޓޮޕްސީ ހެދުމަށް އިންޑިއާ އަށް ފޮނުވައި އޭގެ ފަހުން ފިލިޕީންސްގައި ހުންނަ އާއިލާއާ ހަވާލުކުރީ 7 ނޮވެމްބަރު 2021 ގައެވެ. އޮޓޮޕްސީ ރިޕޯޓުން ދައްކާ ގޮތުގައި މޭރީ މަރުވީ ދަންޖެހިގެން ކަމަށް ޤަބޫލެއް ނުކުރެވެއެވެ.

އޮޓޮޕްސީ ރިޕޯޓުން މޭރީގެ ކަރާއި ބޮލަށް ލިބިފައިވާ ޒަޚަމްތަކުގެ ސަބަބުން މަރުވީ ކަމަށް ދައްކައެވެ. އަދި މޭރީގެ ލޭގައި ސަކްސިނައިލްކޮލީން ހުރި ކަމަށް ފާހަގަކުރެވިފައިވެއެވެ. އެ ބޭހުގެ ބޭނުންކޮށްފައިވާ އިންޖެކްޝަނެއް ލަމްހާގެ ގެއިން ފެނިފައިވެއެވެ.

މާވިންގެ މައްޗަށް ގަސްދުގައި މީހަކު މެރުމުގެ ދައުވާ އުފުލާފައިވާ އިރު އޭނާގެ ލޯބިވެރިޔާ ހަލީމަތު ލަމްހާ ޢަބްދުއްރަޙުމާންގެ މައްޗަށް އުފުލާފައިވަނީ ޤަތުލަށް އެހީތެރިވި ކަމުގެ ދައުވާއެވެ. މި ތިން މީހުންނަކީ ވެސް އައިޖީއެމްއެޗްގެ އީއާރުގައި ނަރުހުންގެ ގޮތުގައި މަސައްކަތް ކުރި މީހުންނެވެ.

ޝަރީޢަތުގެ ތެރޭގައި މާވިންގެ ފަރާތުން ދިފާއުގައި ފަސް ފިލިޕީންސް ރައްޔިތަކު ހެކީންގެ ގޮތުގައި ހުށަހެޅި ނަމަވެސް ހާޒިރުވީ އެންމެ މީހެކެވެ. ދެން ތިބި މީހުން ތަކުރާރުކޮށް ހާޒިރު ނުވުމުން ކޯޓުން ނިންމީ އެ ހެކީންގެ ހެކިބަސް ނެތި ކުރިއަށް ގެންދާށެވެ.

ޝަރީޢަތް ކުރިއަށް ދިޔަ ތެރޭގައި މާވިން ވަނީ ޖަލުގައި ހުރެ އިސްލާމް ދީން ޤަބޫލުކޮށް ނަން "ޔޫސުފް" އަށް ބަދަލުކޮށްފައެވެ.

މި މައްސަލައާ ގުޅިގެން ނާސިން އެންޑް މިޑްވައިފް ކައުންސިލުން ވަނީ މާވިންއާ ލަމްހާގެ ނާސިން ހުއްދައާއި ރެޖިސްޓްރީ ބާޠިލުކޮށް ނަރުހުންގެ ރެޖިސްޓްރީ އިން ނަން އުނިކޮށްފައެވެ.