އިސްރާއީލުން ޣައްޒާއަށް ދެމުންގެންދިޔަ ލާއިންސާނީ ހަމަލާތަކާއި ޤަތުލްޢާއްމުގެ ސަބަބުން ތިން އަހަރު ދުވަހު ތަޢުލީމުން މަޙްރޫމްވެފައި ތިބި އެތައް ލައްކަ ކުދިންނެއް، ހޮނިހިރު ދުވަހު އަލުން ކްލާސްރޫމްތަކަށް ހާޒިރުވެ ކިޔަވަން ފަށައިފިއެވެ.

ޤަތުލްއާއްމުގެ ސަބަބުން އިމާރާތްތައް ބިމާހަމަވެފައި ވުމުން، ދަރިވަރުން ކިޔަވަމުން ދަނީ ހަލާކުވެފައިވާ އިމާރާތްތަކުގައްޔާއި، ވަގުތީ ގޮތުން ޖަހާފައިވާ ފޭލިގެ ތަކުގައެވެ. ގިނަ ޢާއިލާތަކުގެ އަތްމަތި ދަތިވެފައި ވުމުގެ ސަބަބުން ކުދިންނަށް ޔުނިފޯމާއި، ފޮތާއި، ގަލަން ފަދަ އަސާސީ ތަކެތި ހޯދައިދިނުމަކީ ވެސް ބޮޑު ތަކުލީފަކަށް ވަނީ ވެފައެވެ.

ޔުނިސެފް އިން ހާމަކުރި ގޮތުގައި، އިސްރާއީލުގެ ހަމަލާތަކުގައި ޣައްޒާގެ ސްކޫލްތަކުގެ 98 އިންސައްތަ ވަނީ ސުންނާފަތިވެ ނުވަތަ ބޮޑެތި ގެއްލުންތަކެއް ލިބިފައެވެ. އަދި މި ގަތުލްއާއްމުގެ ސަބަބުން ގާތްގަނޑަކަށް 660,000 ދަރިވަރުންނަށް ޤަވާޢިދުން ތަޢުލީމު އުނގެނުމުގެ ފުރުޞަތު ވަނީ ގެއްލިފައެވެ. ޚާން ޔޫނިސްގެ އެޑިއުކޭޝަން ޑިރެކްޓަރ އިބްރާހީމް ރަމަޟާން ވިދާޅުވި ގޮތުގައި، އިސްރާއީލުގެ ޢުދުވާނުގައި ޣައްޒާގެ 22,000 އަށްވުރެ ގިނަ ދަރިވަރުންނާއި، 532 ޓީޗަރުން ހިމެނޭހެން ތަޢުލީމީ ދާއިރާގައި މަސައްކަތްކުރާ 770 އަށްވުރެ ގިނަ މީހުން ވަނީ ޝަހީދުވެފައެވެ.

ޚާން ޔޫނިސްގެ ޓެންޓެއްގައި ކިޔަވަމުންދާ މުއައްޔަދު އަބޫ މުޞްޠަފާ ބުނީ، މިއީ އުފާވެރިކަމާއި ކާމިޔާބީގެ އަހަރެއް ކަމަށެވެ. އެކަށީގެންވާ ވައިދައުރުނުވާ ޓެންޓެއްގެ ބިމުގައި އިށީނދެގެން، ބޫޓާއި ފޮތްފަންސުރު ނެތް ނަމަވެސް، އަދި ހަނގުރާމައިގައި ގާތް އެކުވެރިން ގެއްލިފައިވީ ނަމަވެސް ކިޔެވުން ކުރިއަށް ގެންދާނެ ކަމަށް އޭނާ ބުންޏެވެ.

އަދި އުމުރުން 15 އަހަރުގެ ސަމަރު އަބޫ ސަލްމީ ބުނީ، "ފޯނުން ކިޔަވަމުން ގޮސް، ޓީޗަރުން ނުފެންނަތާ އެތައް ދުވަހަކަށްފަހު، އެއް ޓެންޓުން އަނެއް ޓެންޓަށް ގޮސްގެން ވެސް ހުވަފެންތައް ޙަޤީޤަތަކަށް ހަދަން އަނބުރާ އައީ" ކަމަށެވެ.

ބައިނަލްއަޤްވާމީ ޖަމްޢިއްޔާތަކާއި ޔުނިސެފްގެ އެހީތެރިކަމާއެކު ފަލަސްޠީނުގެ އެޑިއުކޭޝަން މިނިސްޓްރީން ދަނީ ޓެންޓުތަކާއި، ފިލާ އަދި ޓިނު ބޭނުންކޮށްގެން ވަގުތީ ސްކޫލްތައް ހަދައި، މި އަހަރު މަދުވެގެން 540,000 ކުދިންނަށް ކިޔަވައިދިނުމަށް މަސައްކަތް ކުރަމުންނެވެ. އަދި ކްލާސްތަކަށް ހާޒިރުނުވެވޭ ކުދިންނަށް އޮންލައިންކޮށް ކިޔެވުމުގެ ފުރުޞަތު ވެސް ވަނީ ހުޅުވާލާފައެވެ.

ނަމަވެސް، އިސްރާއީލުން ޣައްޒާއަށް މުދާ އެތެރެކުރުން ހިފަހައްޓާފައި އޮތުމުގެ ސަބަބުން ސްޓޭޝަނަރީގެ އަގުތައް ވަނީ އިންތިހާއަށް އުފުލިފައެވެ. ވިޔަފާރިވެރިން ފާހަގަކުރާ ގޮތުގައި، ކުރިން 1 ޑޮލަރަށް ލިބުނު ފޮތެއްގެ އަގު މިހާރު ވަނީ 5 ޑޮލަރަށް އަރާފައެވެ.

އިސްރާއީލުގެ ހަމަލާތަކުގައި ޣައްޒާއިން 73,000 އަށްވުރެ ގިނަ މީހުން ޝަހީދުވެފައިވާއިރު، އަދިވެސް އެ ސަރަޙައްދުގެ 60 އިންސައްތައަށްވުރެ ބޮޑު ބައެއް އޮތީ އިސްރާއީލު ސިފައިންގެ ބާރުގެ ދަށުގައެވެ. މި ހުރިހާ ބިރުވެރިކަމާއި ދަތިތަކާއެކު ވެސް، ޣައްޒާގެ ކުޑަކުދިން ސާބިތުކޮށްދެމުން ދަނީ ކޮންމެ ހާލެއްގައި ވެސް ޢިލްމު ހޯދައި، އުންމީދު ދިރުވުމަށް އެކުދިންގެ ހިތްތަކުގައިވާ ވަރުގަދަ ޢަޒުމެވެ.