ސިންގަޕޫރު ކަނޑުއޮޅި ސަރަހައްދުން ދަތުރުކުރި 229 މީޓަރުގެ ބޮޑުމުދާ އުފުލާ ބޯޓެއް، ޗައިނާގެ މަސްބޯޓެއްގައި ޖެހި ހިނގި ނުރައްކާތެރި އެކްސިޑެންޓެއްގެ ބިރުވެރި މަންޒަރުތައް ފެންނަ ވީޑިއޯއެއް ސޯޝަލް މީޑިއާގައި އާންމުވެއްޖެއެވެ.

މި ހާދިސާ ހިނގާފައިވަނީ މިދިޔަ ބުރާސްފަތި ދުވަހު ކަމަށް ބެލެވެއެވެ. "ދަ މެރިޓައިމް އެގްޒެކެޓިވް" އިން ރިޕޯޓްކޮށްފައިވާ ގޮތުގައި، މި ހާދިސާގައި ޖެހިފައިވަނީ ޕެނަމާގެ ދިދަ ޖަހާފައިވާ "ފަސްޓް މާގޯ" ނަމަކަށް ކިޔާ ބޮޑު ކާގޯ ބޯޓަކާއި، ޗައިނާގެ 49 މީޓަރުގެ މަސްބޯޓެއް ކަމަށްވާ "ލޫޗިން ޔުއާންޔޫ 108" އެވެ.

އުޅަނދުފަހަރު ޓްރެކްކުރާ ޕޯލް ސްޓާ ގްލޯބަލްގެ އޭއައިއެސް (AIS) ޑޭޓާތަކާ ހަވާލާދީ ރިޕޯޓްތައް ބުނާގޮތުން، މި ދެ އުޅަނދުވެސް ސިންގަޕޫރު ކައިރީގައި އަޅާފައި އޮތުމަށްފަހު ފުރާފައިވަނީ ގާތްގަނޑަކަށް އެއް ވަގުތެއްގައެވެ. އަދި ދެ ބޯޓުވެސް ވަދެފައިވަނީ ކަނޑުއޮޅީގެ މައިގަނޑު ޝިޕިން ޗެނަލް ނުވަތަ ޓްރެފިކް ސެޕަރޭޝަން ސްކީމްގެ ތެރެއަށެވެ.

މަސްބޯޓުގައި ހުރި މީހަކު ނަގާފައިވާ ކަމަށް ބެލެވޭ ވީޑިއޯއިން ފެންނަނީ، ބިޔަ ބޯޓު އައިސް އެމީހުންގެ މަސްބޯޓުގައި ޖެހޭ މަންޒަރެވެ. ބޯޓުގައި ޖެހުމާއެކު މަސްބޯޓު އެއްފަރާތަކަށް ވަރަށް ބޮޑަށް އަރިއަޅާލައި، ޑެކް މައްޗަށް ބޮޑެތި ރާޅުތައް އަރައިގެންދާ މަންޒަރާއި، ބޯޓުގައި ތިބި ފަޅުވެރިން ސަލާމަތްވުމަށް ކޮޅަށް ހުންނަން މަސައްކަތްކުރާ މަންޒަރު ފެނެއެވެ. ވީޑިއޯ މެދުކެނޑެނީ ދެ އުޅަނދު ޖެހޭ ވަގުތާ ވަރަށް ކައިރިވެފައި ވަނިކޮށެވެ.

ނަމަވެސް، ޓްރެކިން ޑޭޓާތަކުން ދައްކާ ގޮތުގައި މި ހާދިސާއަށްފަހު މަސްބޯޓު އަޑިއަކަށް ނުދެއެވެ. އޭގެ ސިގްނަލް މެދުނުކެނޑި ލިބެމުންދިޔަ ކަމަށާއި، ބޯޓު ކައިރީގައިވާ ބަނދަރަކަށް ވާސިލުވެފައިވާ ކަމަށް ރިޕޯޓްތައް ބުނެއެވެ.

މި ހާދިސާގައި އެއްވެސް މީހަކަށް އަނިޔާވި ކަމެއް ނުވަތަ ފުރާނައަށް ގެއްލުމެއް ލިބުނު ކަމުގެ މައުލޫމާތެއް އަދި ލިބިފައެއް ނުވެއެވެ. އަދި ކަމާބެހޭ އެއްވެސް އިދާރާއަކުން މި ހާދިސާއާ ގުޅޭ ރަސްމީ ބަޔާނެއް އަދި ނެރެފައި ނުވެއެވެ.