ފިނޭންސް މިނިސްޓަރުކަމަށް އައްޔަނުކުރައްވާފައިވާ ހަސަން ޒަރީރަށް ރުުންދޭން ފެންނަކަމަށް ރައްޔިތުންގެ މަޖިލީހުގެ ސަރުކާރުގެ މަސްޢޫލިއްޔަތު އަދާ ކުރާ މިންވަރު ބަލާ ކޮމިޓީން ފާސްކޮށްފިއެވެ.
މިއަދު ބޭއްވި ކޮމިޓީ ބައްދަލުވުމުގައި ޒަރީރަށް ރުހުންދޭން ފެންނަކަމަށް ފާސްކޮށްފައިވަނީ، ކޮމިޓީގެ މެމްބަރުންގެ އިއްތިފާގުންނެވެ.
ފިނޭންސް މިނިސްޓަރުކަމުގެ މަގާމަށް ރައީސުލްޖުމްހޫރިއްޔާ ޒަރީރު އައްޔަނުކުރައްވާފައިވަނީ، މިހިނގާ ޖޫންމަހުގެ އަށްވަނަ ދުވަހުއެވެ. އެ މަގާމަށް ޒަރީރު އައްޔަނުކުރެއްވީ، އެހާތަނަށް ފިނޭންސް މިނިސްޓަރުކަމުގައި ހުންނެވި މޫސާ ޒަމީރު މަގާމުން އިސްތިއުފާ ދެއްވުމުންނެވެ.
ޤަނޫނުގައިވާގޮތުން ވަޒީރުންގެ މަގާމަށް ބޭފުޅަކު އައްޔަނުކުރުމަށްފަހު، ރައްޔިތުންގެ މަޖިލީހުގެ ރުހުން ހޯދުމަށް ފޮނުވަންޖެހެއެވެ. ރައްޔިތުންގެ މަޖިލީހުގެ ސަރުކާރުގެ މަސްޢޫލިއްޔަތު އަދާ ކުރާ މިންވަރު ބަލާ ކޮމިޓީން ޒަރީރަށް ރުހުން އޮތްކަމަށް ފާސްކުރިއިރު، ދެން އޮންނާނީ، މަޖިލީހުގެ ތަޅުމަށް ޒަރީރުގެ ނަންފުޅު ހުށަހެޅުމެވެ.
ފިނޭންސް މިނިސްޓަރުކަމަށް އައްޔަނުކުރެއްވުމުގެ ކުރިން ޒަރީރު ހުންނެވީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމުގަ އެވެ. އޭގެ ކުރީން ޑެޕިއުޓީ ކޮމިޝަނަރުގެ މަގާމުވެސް ޒަރީރު ވަނީ ފުރުއްވާފަ އެވެ. ޒަރީރަކީ ދައުލަތުގެ އެކި މަގާމުތައް ފުރުއްވާފައިވާ ވަރަށް އިލްމީ ބޭފުޅެކެވެ.
Advertisement
This content is created and paid for by advertisers and does not involve Voice Journalists
