މިހާރު އޮތް ކައުންސިލްތަކުގެ ދައުރު އިތުރުކުރުމާއި މެދު އެންމެފަހުން ސުޕްރީމް ކޯޓުގެ ލަފައަކަށް އެދެނީ

27 May 2020 | 15:28

ކޮވިޑް-19ގެ ހާލަތާއި ގުޅިގެން ކަނޑައަޅާފައިވާ ތާރީޚުގެ ކުރިން ލޯކަލް ކައުންސިލްތަކުގެ އިންތިޚާބު ނުބޭއްވޭނެތީވެ، މިހާރު އޮތް ކައުންސިލްތަކުގެ ދައުރު އިތުރުކުރުމާއި މެދު ސުޕްރީމް ކޯޓުގެ ލަފައަކަށް އެދެން ހުށައަޅައިފިއެވެ.

މި މައްސަލައާއި ގުޅިގެން ސުޕްރީމް ކޯޓުގެ އިސްތިޝާރީ ލަފައަކަށް އެދުމަށް އެދި ރައްޔިތުންގެ މަޖިލީހުގެ ތަޅުމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވަނީ ގަރާރެއް ހުށައަޅުއްްވާފައެވެ. މި ގަރާރު އެބޭފުޅާ މަޖިލީހަށް ހުށައެޅުއްވީ ގާނޫނު އަސާސީގެ 95ވަނަ މާއްދާގެ ދަށުންނެވެ.

ގާނޫނު އަސާސީގެ 95ވަނަ މާއްދާގައި ބުނެފައިވާ ގޮތުގައި ގާނޫނުގައި ކަން އޮތްގޮތާ މެދު އުފެދޭ މުހިންމު ސުވާލުތަކާ މެދު ނުވަތަ ގާނޫނީގޮތުން ކަމެއް އޮތްގޮތާމެދު ސުޕްރީމްކޯޓުގެ ލަފައަކަށް އެދި ރައްޔިތުންގެ މަޖިލީހުން ފާސްކުރާ ގަރާރަކުން ސުޕްރީމްކޯޓަށް ހުށަހެޅިދާނެއެވެ.

"މިގޮތުން ހުށަހެޅޭ ކަންތައްތަކުގެ ތެރޭގައި ގާނޫނުއަސާސީ މާނަކުރުމުގެ މައްސަލަތަކާއި ވަކި ގާނޫނެއްގެ ސައްހަކަމާ މެދު އުފެދޭ ސުވާލުތައް ހިމެނެއެވެ. މިފަދަ ކަންކަމަށް ސުޕްރީމްކޯޓުން ދޭ ލަފާ ބިނާކޮށްފައިވާ ސަބަބުތައް ބަޔާންކުރުމާއެކު އެ ލަފާ ސުޕްރީމްކޯޓުން ރައްޔިތުންގެ މަޖިލީހަށް ފޮނުވާންވާނެއެވެ. އެ ލަފާ އޮންނާންވާނީ އިސްތިއުނާފު ކުރުމަށް ސުޕްރީމްކޯޓަށް ހުށަހެޅޭ މައްސަލަތަކުގައި އެ ކޯޓުން ނެރޭ ހުކުމްތަކާ އެއްފަދައިންނެވެ"، އެ މާއްދާގައި ބުނެފައިވެއެވެ.

ކައުންސިލަރުންގެ ދައުރުގެ މުއްދަތު ވަގުތީގޮތުން އިތުރުކުރުމާއި މެދު ސުޕްރީމް ކޯޓުގެ ލަފައަކަށް އެދެން ފެނިވަޑައިގަންނަވާފަދަ މޭރުމަކުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުވެސް ވަނީ ވާހަކަފުޅު ދައްކަވާފައެވެ. އެބޭފުޅާ މިހެން ވިދާޅުވީ ކައުންސިލަރުންގެ ދައުރު އިތުރުކުރުމަށް ގާނޫނު އަސާސީއަށް އިސްލާހެއް ގެނައުމާއި މެދު މަޖިލީހުގެ ރޫހު ބައިބައިވެފައިވާ ދަނޑިވަޅެއްގައެވެ.

Advertisement

ކޮމެންޓް